ئومید وه‌به‌خته‌وه‌رى قه‌ڵغانیگه‌ دژ وه‌نائومیدى

شفق نيوز

نه‌مه‌ندگه‌و كه‌س دڵى خوه‌ش نیه‌، دى نوڕید گشت وه‌خت و سه‌عاتیگ بان زووان و بن زووانیان هه‌ر شكایه‌ت و گله‌یى و بیزاریه‌. بیگومان ئى ره‌فتاریشه‌ ڕى له‌ به‌خته‌وه‌رى گریگ و زه‌حمه‌ته‌ یه‌كیگ وه‌و حاڵه‌وه‌ باوه‌ڕ وه‌ به‌خته‌وه‌رى بكا. وه‌لى له‌ڕاسى بایه‌سه‌ گشت ئاده‌میزاد هه‌میشه‌ گه‌شبین بووگ وه‌ ئه‌وه‌ك ژیان به‌خته‌وه‌رى هه‌ر بایه‌سه‌ وجوود داشتووگ و كه‌س له‌ئاستى نائومید نه‌وگ و جویر قه‌ڵغانیگ باریگه‌ى كار دژ وه‌نائومیدى و نیگه‌رانى و بیزارى له‌ژیان.

هویچ وه‌ختى ئاده‌میزاد نه‌بایه‌د پشت له‌دونیا بكاو ژیان و ده‌روین خوه‌ى ناڕه‌حه‌ت بكا، وه‌ل ئه‌وه‌یشا فره‌یگ له‌ فكرمه‌ن و فه‌یله‌سووف و شاره‌زایه‌یل له‌ مه‌یدان ده‌روینیه‌وه‌ گرنگى یا ئه‌همیه‌ت فره‌یگ دانه‌سه‌ باوه‌ته‌گه‌و ئویشن: بایه‌سه‌ هه‌میشه‌ به‌خته‌وه‌رى و خوه‌شى له‌ژیان له‌ هه‌ڵویسته‌یل فره‌یگ باریه‌یگه‌ وه‌رچه‌و جویر چه‌كیگ دژ ته‌نگى و ناخوه‌شى و ناڕه‌حه‌تى.

فكرمه‌ن و فه‌یله‌سووف جه‌هانى(رۆسۆ) وه‌پى له‌یوا بویه‌، ئه‌و وه‌خته‌یله‌ ئاده‌میزاد به‌خته‌وه‌ر بووگ ك له‌ناخ خوه‌یه‌وه‌ ئازاد بووگ و تواناى ئه‌وه‌ بیاشتووگ له‌وه‌رانوه‌ر هووكاره‌یل ده‌ره‌كى كومه‌ڵگا بته‌و بووگ، ئه‌ویش وه‌ ئه‌وه‌ك وه‌ سروشتى مامڵه‌ بكا تا بتویه‌نیگ بڕه‌سیگه‌ خاڵیگ دیاریكریاگ له‌ به‌خته‌وه‌رى.

(یۆنگ) ده‌روینناس جه‌هانى له‌ى باوه‌ته‌وه‌ ئویشیگ : ئه‌و كار وكاردانه‌وه‌یله‌ ك له‌ژیان كه‌فنه‌ وه‌ر هسه‌یلمان، تام و له‌زه‌تیگ وه‌ختى وه‌پیمان به‌خشن و له‌چوارچیوه‌ى مه‌رز ده‌روین مینن و هه‌ر له‌وه‌ر ئه‌وه‌یش تام و له‌زه‌ت وه‌ختییگ ده‌نه‌ پیمان، وه‌لى ئه‌و ئاڵشتكاریه‌یل خوه‌ش ژیانه‌ ك له‌سه‌نته‌ر ده‌روینه‌وه‌ هه‌ڵقوڵیه‌ن و تیه‌نه‌وه‌ ئه‌را ناخ ده‌روین، ئه‌وه‌ به‌خته‌وه‌رى هه‌میشه‌ به‌خشنه‌ ئاده‌میزاد. هه‌ر له‌وه‌ر ئه‌وه‌یش بایه‌سه‌ ئیمه‌ى ئاده‌میزاد هویچ وه‌ختى بیبه‌ش خوه‌مان نه‌كه‌یم له‌ ئومید وه‌ به‌خته‌وه‌رى خوه‌مان له‌لى نزیكه‌و بكه‌یم و له‌ هه‌مان وه‌خت گام بنه‌یم وه‌ره‌و خاڵه‌یل دڵخوه‌شكه‌ر و خاسیه‌یلى هه‌ڵوژنیم.

ئه‌و كه‌سه‌یله‌ ك وه‌ئومیده‌وه‌ هویره‌و كه‌ن له‌ژیان، ئه‌وانه‌ بیگومان ره‌سنه‌ به‌خته‌وه‌رى و تیكه‌ڵ وه‌ژیان خوه‌شى بوون، وه‌ل ئه‌وه‌یشا زانن ك نائومیدى مه‌حاڵه‌ كه‌سیگ بڕه‌سنیگه‌ كنار به‌خته‌وه‌رى. هه‌ر له‌وه‌ر ئه‌وه‌یش دوینید هه‌میشه‌ له‌گشت كیشه‌و گرفتیگ ئومید وه‌خوه‌یان به‌خشن و له‌ژیانیان سه‌ركه‌فتن وه‌ده‌س تیه‌رن.

گه‌شبینى و نوڕستن خاسیگ ئه‌را ئاینده‌ موڵك گشت لایگمانه‌و نه‌بایه‌د خوه‌مان له‌لى بیبه‌ش بكه‌یم، بایه‌سه‌ وه‌ گه‌شبینیه‌وه‌ ته‌ماشاى رویداگه‌یل ده‌وروه‌رمان بكه‌یم وه‌ ئه‌وه‌ك ئاڵشتكارى خاسیگ په‌یا بووگ و قوناغ مه‌ینه‌تى و ناڕه‌حه‌تى بیلیمنه‌ جى و بچیمنه‌ دونیاى ئاسووده‌یى و دڵنیایى.