دویاى هه‌فت ساڵ، هه‌ناس ئووخه‌ى هه‌ڵمژیمن...دادگاى باڵاى تاوان كوشتن كورده‌یل فه‌یلى وه‌جینۆساید ناسنێد

شفق نيوز

و چه‌وه‌ڕى كه‌ن پرسه‌ى ناودڵ پڕخوین داڵگ وخوه‌یشكه‌یلیان بووده‌ سروودیگ شادى و ته‌مام ڕویوه‌ر جوگرافیاى ڕووژهه‌ڵات دجله‌ بگریده‌وه‌ر ... ده‌یان ساڵه‌ شه‌هیده‌یل كورد فه‌یلى چه‌وه‌ڕى كفنیگ  كه‌ن تا ئه‌سر خوینین ناو چه‌وه‌یل كزاهاتى داڵگه‌یل وخوه‌یشكه‌یل بى كه‌سیان بسڕنه‌وه‌...ده‌یان ساڵه‌ ماڵه‌یل كفاح و سه‌دریه‌ و عگدالاكراد و ئه‌بوسێفێن و ئه‌بوده‌وده‌و و جه‌میله‌ و سه‌وره‌ و ته‌مام شوونه‌یل كوردنشین به‌غدا چه‌وه‌ڕى كه‌ن ده‌س و په‌نجه‌ى ڕه‌نگاوڕه‌نگ خاوه‌نه‌یلیان ڕه‌نگ ژیان له‌ كویچه‌یلیان بكاڵن، و داڵگه‌یل چوى جاخ جاران خنیه‌به‌نان ده‌س و په‌نجه‌ى دویه‌ته‌یلیگ بكه‌ن ك ئاره‌زوو داشتن زه‌ماوه‌نیان بارن ئه‌را ناو ئه‌و ماڵه‌یله‌ ك بوو مه‌رگ و غاز كیمیاوى و بوو سیانه‌ و قیڕه‌ و خوڕین به‌عسى و شوینپاى سیه‌ى چه‌كمه‌گانیان و ئینجا بوو باروود و تووفان مه‌رگ سیفۆر(C4)  و تى ئێن تى (TNT) تیرۆریسته‌یل خنكانیه‌سه‌ى...

مزگانى ئه‌ى شه‌هیده‌یل ... مزگانى ئه‌ى ئه‌و كه‌سه‌یله‌ ك نیه‌زانیم ڕوى بكه‌یمنه‌ كام لاى وڵات و ئى خه‌وه‌ر خوه‌شه‌ بڕه‌سنیمنه‌ گووشه‌یلدان ... مزگانى ئه‌ى داڵگه‌یلیگ له‌ وڵاته‌یل غه‌ریبى وه‌چه‌و چه‌وه‌ڕیه‌و ئه‌را ئاخر جار چه‌و نویقانین ... مزگانى ئه‌ى یه‌تیمه‌یل باوگ خوه‌ى نه‌دى، ئه‌ى خوه‌یشكه‌یل هه‌میشه‌ عازیه‌تبار، ئه‌ى باوگه‌یل كووس كه‌فتى پشتشكیاى ... مزگانى ئه‌ى كویچه‌ و بازاڕه‌یل ڕه‌شپووش به‌غدا... مزگانى كوردستان ... مزگانى عیراق!!.

به‌ڵى دویاى هه‌فت ساڵ چه‌وه‌ڕى له‌ سه‌رده‌م ئازادى و دیموكراسى و ماف ئنسان ... دویاى ئه‌وه‌زكردن 3 دادوه‌ر و 44 نیشتن دویر و دریژ  دادگاى باڵاى تاوان، ئه‌وه‌ له‌ ڕووژ دوشه‌ممه‌ 29 ته‌شرین دویم ساڵ 2010 ئى جاره‌ "داد" قسه‌ كرد و "بیداد" بى بیده‌نگ و لاڵ بوى و هه‌ى داد و بیداد له‌ده‌ممان بویه‌ ناڵه‌ى الله اكبر و الحمد لله و چه‌ودڵمان وه‌بڕیار دادگاى باڵاى تاوان ڕووشنه‌و بوى، وه‌ختى دادوه‌ر سعد یحیى عبدالواحد حوكمه‌یلیگ خوه‌نى چوى ئاو سازگار و سه‌رد ڕشیا بان كویره‌ى ئاگرین دڵ و ده‌روینمان و ئه‌را هه‌میشه‌ خامووشى كرد و تویه‌م شادى و سه‌رفرازى و ئووخه‌ى له‌ شوونى كاڵى ... هه‌ر له‌ى نیشتن شماره‌ 44 دادگاى باڵاى تاوانه‌ هه‌زاران هه‌ست و سووز جیاجیامان تیكه‌ڵا بوى وه‌ختى وه‌ جینۆساید ناو ئه‌و تاوانه‌یله‌ برد ك ڕژیم به‌عس له‌ناوچى ده‌رهه‌ق ڕووڵه‌یل بیگونامان ئه‌نجامى دا و ماڵه‌یل و دوكان وبازاڕه‌یل كارخانه‌یلمان زه‌فت و چه‌پاوكرد و خیزانه‌یل بیتاوانمان شاروه‌ده‌ر وڵاته‌یل غه‌ریبى و بینه‌وایى كرد...

له‌ى نیشتن دادگا ئه‌وه‌ ئه‌رامان سابت بوى ك ئیمه‌ دى بیكه‌س نیمن چوینكه‌ كه‌سه‌یلمان فره‌ بوین... ئه‌وه‌ نیه‌ عه‌لى حوسێن فه‌یلى ئه‌ندام په‌رله‌مان كوردستان پیشوازى كرد له‌ وه‌زیر شه‌هیده‌یل و ئه‌نفالكریایه‌یل كوردستان د. مه‌جید حه‌مه‌ ئه‌مین ك ده‌س ناویده‌ ناو ده‌س به‌ختیار ئه‌مین وه‌زیر پیشین ماف ئاده‌میزاد كوردستان و شێخ كامل قادر سه‌عید مستشار وه‌زاره‌ت كاروبار شه‌هیده‌یل و ئه‌نفالكریایه‌یل كوردستان و بورهان حه‌مدى حوسێن به‌ڕێوه‌به‌ر گشتى له‌ هه‌مان وه‌زاره‌ت و شوان محمود عبد المجید و محسن حسن شێروانى نجم الدین حه‌مه‌ سعید حه‌مه‌ ئه‌مین و مهند ئه‌نوه‌ر سه‌رتیپ و گشتیان سه‌دان كێلومه‌تر بڕین و هه‌ر له‌ شه‌وه‌كى ئه‌و ڕووژه‌ ئاماده‌ بوین ئه‌را پشتگیریمان.

ئه‌وه‌ نیه‌ صفیه‌ تالب السهیل ئه‌ندام ئه‌نجوومه‌ن نوێنه‌ره‌یل عیراق فیدراڵ هات و یه‌كه‌یه‌كه‌ ده‌س گشتمان سه‌ن و ماچ ئه‌و داڵگ و خوه‌یشكه‌یله‌ كرد ك له‌ى نیشتنه‌ ئاماده‌بوین؟.

ئه‌وه‌ نیه‌ ئه‌وانه‌گ هه‌میشه‌ خوه‌یان وه‌خاوه‌ن ئى مه‌سه‌له‌ زانستنه‌ هه‌ر له‌ شه‌وه‌كیه‌و چه‌وه‌ڕى نیشتنه‌گه‌بوین، ئه‌وه‌نیه‌ فه‌ره‌ج حه‌یده‌رى سه‌رۆك كۆمسیۆن باڵاى هه‌ڵوژاردن وعیسا فه‌یلى ڕیكخه‌ر وه‌رین حكوومه‌ت هه‌رێم كوردستان ئه‌را كاروبار كورده‌یل فه‌یلى و حه‌مدیه‌ نه‌جه‌ف وسامیه‌ عزیز  و ئه‌زهار ره‌حیم و نه‌زیره‌ ئسماعیل و فیروز حاتم و عامر عبدالكریم و حسین الحیدرى و شاكر فه‌یلى و وداد رجب و سمیره‌ ره‌مه‌زان ره‌حیم و چه‌ندین كه‌سیگتر ئاماده‌ى ئى نیشتنه‌ بوین ك بایه‌ته‌ بكه‌یمنه‌ى ڕووژ له‌داڵگ بوینمان و له‌ ڕه‌گه‌زنامه‌ى عیراقى كوانه‌و نوومان وه‌ ئاو ته‌ڵا بنویسیمنه‌ى...

دڵنیابوون ئه‌ى برایه‌یل و ئه‌ى خوه‌یشكه‌یل فه‌یلى ك یه‌ سه‌ره‌تاى نوویگه‌ له‌ تاریخمان و له‌یه‌ولا بایه‌سه‌ گشتمان ده‌س بنه‌یمنه‌ ناو ده‌س یه‌كترى و وه‌گشت هێز و توانایگمانه‌و پاڵ بنه‌یمن و فشار بخه‌یمنه‌ سه‌ر لایه‌نه‌یل په‌یوه‌ندیدار وه‌ كێشه‌گه‌مانه‌و تا ئى یه‌كه‌م هه‌نگامه‌ ك وه‌جینۆساید ناسین تاوانه‌گان ڕژیم وه‌رین بوى دژ وه‌ئیمه‌ى بیتاوان، هه‌نگامه‌یلیگ تر له‌ شوونى بوود؛ ئه‌ویش وه‌ كاركردن هاوبه‌ش وه‌ خوه‌مان و برایه‌یلمان له‌ هه‌رێم كوردستان و ته‌مام دووسه‌یلمان له‌ ناو و له‌ده‌یشت عیراق ئه‌را ئه‌وه‌گ له‌ ئه‌نجوومه‌ن نوێنه‌ره‌یل عیراقیش هه‌مان هه‌نگام هه‌ڵبگریه‌ید و ئى تاوانه‌ چوى كه‌سه‌یلمان له‌ كوردستان و برایه‌یلمان له‌ باشوور وڵات وه‌ بڕیاریگ سیاسى دگان وه‌ ڕاسیه‌گه‌یه‌و بنریه‌ید و هه‌ق ڕه‌وامان وه‌گووره‌ى قانوون سابت بكریه‌ى...

چه‌و دوشمنه‌یلمان كوور بوود و چه‌وودڵ خوه‌مان و كه‌س و كار و دووسه‌یلمان ڕووشن بوود، و مه‌منوون ئه‌و كه‌سه‌یلیمن له‌ گه‌وراترین ئاست تا ڕه‌سیده‌ بویچگترین هه‌وڵ ك نه‌خش وده‌ور داشت له‌ ده‌رچوین ئى بڕیاره‌.