له‌"٣٥"ه‌مين ساڵياد تاوان له‌ناوبردن فه‌يليه‌يل..ته‌نيا ده‌زگا‌گه‌ی دويا هه‌ناسه‌يه‌

شفق نيوز

وه‌ دريژايی چه‌ن ده‌يه‌يگ له‌ سه‌رده‌م ده‌سڵاته‌يل رژيم شوفێنی يه‌ك له‌ شوون يه‌ك له‌ عراق پيكهاته‌ی فه‌يليمان تويش شيوانن ته‌مام ناسنامه‌ی نه‌ته‌وه‌يی و رووشنهويری كوردی هات بيجگه‌ جياكردنه‌وه‌ی له‌ جه‌سه‌ی نه‌ته‌وه‌ی كورد، دی له‌ شوون كه‌فتن ئه‌و رژيميشه‌ هه‌ر بايه‌سه‌ ئه‌و ناسنامه‌ زينگه‌و بوياتاد له‌ڕی ده‌زگايه‌يل هوشياركردن و ره‌سانن و رووشنهويری، ك ئه‌وه‌ بوی حكوومه‌ت هه‌رێم كوردستان جی سوپاسگوزاريه‌ پشتگيری پرووژه‌ی ده‌زگای رووشنهويری و ره‌سانن كورده‌يل فه‌يلی شه‌فه‌ق كرد له‌ساڵ ٢٠٠٤، ك پيكهات له‌ راديۆی شه‌فه‌ق و ماڵپه‌ڕ ئه‌لكترۆنی و دراوردن رووژنامه‌و دو گووڤار وه‌ هه‌ردوگ زووان كوردی و عه‌ره‌بی، يه‌يش بيجگه‌ سازكردن سيميناره‌يل رووشنهويری هه‌فتانه‌ی له‌ڕی ماڵ كورد و دوياخره‌گه‌يشی ئاژانس هه‌واڵه‌يل شه‌فه‌ق نيوز وه‌ زووانه‌يل جوراوجوور ك بويه‌ يه‌كيگ له‌ ديارترين ئاژانه‌سه‌يل ره‌سانن ئه‌لكترۆنی له‌ عراق، ئی ده‌زگايشه‌ بويه‌ يه‌كيگ له‌ ده‌زگايه‌يل كاراو بته‌ويگ له‌ به‌غدای پايته‌خت و تويه‌نست شماره‌يل فريه‌يگ له‌ خاوه‌ن قه‌ڵه‌مه‌يل عراقی ئازاد و رووشنهوير و هونه‌رمه‌ند و ره‌ساننكاره‌يل له‌ گشت پيكهاته‌يل وه‌ره‌و خوه‌ی بكيشيد.

وه‌لی وه‌ل سه‌ره‌تای ساڵ ٢٠١٤و ده‌سوه‌پيكردن قه‌يران دارايی له‌ هه‌رێم كوردستان له‌ ئاكام برين بودجه‌ی هه‌رێم و موچه‌ی كارمه‌نده‌يل له‌لايه‌ن حكوومه‌ت عراقيه‌و، ده‌زگای شه‌فه‌قيش جوور باقی ده‌زگايه‌يل تر ره‌سانن له‌ هه‌رێم كوردستان كه‌فته‌ وه‌ر قه‌يران دارايی تونيگ له‌ ئاكام برين به‌خشينه‌ مانگانه‌گه‌ی، ك ئی كار داخداريشه‌ كاريگه‌ری فريه‌يگ كرده‌ بان كار ده‌زگاگه‌ وه‌ بوونه‌ی قه‌يران داراييه‌و، وه‌لی وه‌رپرسه‌يل ده‌زگاگه‌و كادره‌ ره‌ساننكاره‌گه‌ی له‌وه‌ر باوه‌ڕيان وه‌رده‌وامی دانه‌ خواست كاره‌گه‌يان له‌وه‌ر خاتر خزمه‌تكردن پيكهاته‌گه‌مان و كيشه‌ كورديه‌گه‌ی، ك وه‌رده‌وام بوين له‌ وه‌رگه‌ی ئه‌و قه‌يرانه‌و له‌ هه‌مان وه‌خت وه‌ گيان نه‌ته‌وايه‌تی و نيشتمانيه‌و وه‌رده‌وامی دانه‌ كاره‌گه‌يان وه‌ كه‌مترين توانای ده‌سوه‌ركرياگ و چه‌وه‌ڕی ئه‌وه‌ كرديان ئه‌و ميه‌نه‌تيه‌ گوزه‌ر بدێ و ده‌زگاگه‌ قورتار بكه‌ن له‌ وسيان له‌ كار و چالاكی، ته‌نانه‌ت بريگ له‌ كادره‌يليش ئه‌را ماوه‌ی فيشتر له‌ ساڵيگه‌ بڕه‌ پويل كه‌ميگ وه‌رئه‌گرن ئه‌را وه‌ڕيكردن خواسته‌يل ژيانيان و بريگيش له‌ليان ئه‌را فيشتر له‌ ساڵيگه‌ وه‌بی پويل كار ئه‌كه‌ن له‌وه‌ر خزمه‌تكردن وه‌ پيكهاته‌و كيشه‌گه‌يان وه‌و ئوميده‌ ئی قه‌يرانه‌ نه‌مينيد و كار ده‌زگاگه‌ وه‌رده‌وام بدێ.

ئيمه‌ ئاگاداريم له‌ی بار سه‌خت ئابووريه‌ ك حكوومه‌ت هه‌رێم كوردستان وه‌پيه‌و گوزه‌ر ئه‌كا وه‌ بوونه‌ی بڕين بودجه‌گه‌ی له‌لايه‌ن حكوومه‌ت به‌غداو ئه‌و جه‌نگ ترۆره‌ ك چه‌سپياسه‌ بانی و بيجگه‌ وجوود فيشتر له‌ دو مليۆن په‌نابه‌ر و كووچبه‌ر سوری و عراقی، وه‌لی وه‌ل ئه‌وه‌يشا بايه‌سه‌ له‌بان حكوومه‌ت هه‌رێم چه‌وپووشی له‌ بڕيگ كار جوور پرووژه‌يل نه‌ته‌وه‌يی نه‌كا ك چاڵاكييگه‌ ئه‌را ئی بار سه‌خته‌ وه‌ل ئه‌و قه‌يران دراييه‌ ك وه‌پيه‌و ناڵنيد.

حكوومه‌ت هه‌رێم بايه‌س بوی وه‌ ديد سياسی ته‌ماميگه‌و نه‌نوڕيده‌ ده‌زگای رووشنهويری و ره‌سانن كورده‌يل فه‌يلی، به‌ڵكوو بايه‌سه‌ له‌ڕوی ئه‌ركه‌يل نه‌ته‌وه‌يی ته‌ماميگه‌و ته‌ماشای بكاو وه‌رده‌وام بدێ له‌ پشتگيريكردنی جوور نوڕستنی ئه‌را كيشه‌يل تر نه‌ته‌وه‌يی جوور كيشه‌ی كۆبانی، ك هه‌رچه‌نی پێشمه‌رگه‌يل پاڵه‌وان خه‌ريكن وه‌ جه‌نگ ناوخوه‌يی مه‌رزه‌يل هه‌رێم كوردستان دژ ترۆريسته‌يل داعش، وه‌لی وه‌ل ئه‌وه‌يشا سه‌رۆك مه‌سعود بارزانی غافڵ نه‌وی له‌ كيشه‌يل تر نه‌ته‌وه‌يی و له‌وانه‌يش كلكردن هيزه‌يل پێشمه‌رگه‌ ئه‌را كۆبانی جوور خواستيگ نه‌ته‌وه‌يی و پشتگيری وه‌رده‌وام حزبه‌يل و هيزه‌يل سياسی له‌ خوه‌رئاواو خوه‌رهه‌ڵات كوردستان، ك هه‌رچه‌نی قه‌يران داراييش وجوود داشت، يه‌يش بيجگه‌ وجوود هه‌زاران خيزانه‌يل كورد له‌ خوه‌رئاواو خوه‌رهه‌ڵات كوردستان ك له‌ناو كه‌مپه‌يل هه‌رێم كوردستان ئه‌ژيه‌ن و گشت ئه‌يانه‌ ئه‌چنه‌ خانه‌ی پشتگيری نه‌ته‌وه‌يی و بايه‌سه‌ فه‌يليه‌يليش وه‌لای كه‌مه‌و به‌شيگ بوياتان له‌و توانايه‌يله‌ دويای وه‌سه‌رچگن فيشتر له‌ ٤٠٠ رووژ ك ده‌زگای شه‌فه‌ق وه‌و قه‌يران داراييه‌ گوزه‌ر ئه‌كاو هويچ ته‌مويليگ تر نه‌يريد له‌وه‌ر هه‌ڵويست و رينمايه‌يل و پايه‌به‌نديه‌يلی وه‌ كيشه‌ی نه‌ته‌وايه‌تی.

ئمجا له‌"35"ه‌مين ساڵياد تاوان له‌ناوبردن وه‌جه‌م كورده‌يل فه‌يلی ته‌ماشای ئه‌وانه‌ ئه‌كه‌يم ك باوه‌ڕ وه‌ مافه‌يل ملله‌ت كورد و زينگه‌وكردن كيشه‌ی پيكهاته‌يگ له‌ی ملله‌ته‌ ديرن، ئنجا له‌وه‌ختيگ ك هه‌ف مليۆن كه‌س له‌ به‌غدا وجوود ديريد، ته‌نيا راديۆيگ كوردی و ته‌نيا ده‌نگيگ وه‌رگيريكه‌ر هه‌س ك وه‌رگری له‌ ناسنامه‌ی نه‌ته‌وه‌يی فه‌يليه‌يل ئه‌كاو ئيمه‌يش وه‌ بيده‌نگ نوڕيمنه‌ ئی ته‌نيا خه‌ڵات گرانبه‌ها له‌ حكوومه‌ت هه‌رێمه‌و ئه‌را كورده‌يل به‌غداو فه‌يليه‌يل وه‌ تايبه‌ت له‌ بوار ره‌سانن ك بويه‌سه‌ هه‌ڵقه‌ی په‌يوه‌سكردن ناونی ملله‌ت كورد و باقی پيكهاته‌يل تر عراقی ئه‌را فيشتر له‌ ١٠ ساڵه‌و وه‌شايه‌تی گشت كه‌سيگ ك چوين مه‌شق نه‌خش خوه‌ی كردگه‌ له‌ناونی ده‌زگايه‌يل تر فريه‌يگ له‌ مه‌سه‌له‌ی كوشاننه‌وه‌ی ئاگر جه‌نگ و جياوازيكردن و هه‌ر وه‌و خاتريشه‌ په‌ياميگ ئاشتی و زووان حاڵ ئه‌و كه‌سه‌يله‌ بوی ك باوه‌ڕ وه‌ دادگه‌ری ئنسانی ديرن.

ئوميد وه‌ حكوومه‌ت هه‌رێم ديريم وه‌ تايبه‌ت ريزدار نه‌يچێروان بارزانی ك وه‌رده‌وام بدێ له‌ هه‌ڵويست و ريڕه‌و ئاشكرای ده‌رهه‌ق كورده‌يل فه‌يلی و باقی پيكهاته‌يل تر ملله‌ت كورد ئه‌را پشتگيری ده‌زگای رووشنهويری و ره‌سانن كورده‌يل فه‌يلی شه‌فه‌ق، وه‌ ئه‌وه‌ك له‌ دو رويه‌و كار ئه‌كا، يه‌كه‌ميان زينگه‌وكردن ناسنامه‌ی نه‌ته‌وه‌يی پيكهاته‌ سته‌مديده‌گه‌مان و دويه‌ميش ريڕه‌و خزمه‌تكردن كيشه‌ی كورد وه‌ ديد نه‌ته‌وه‌يی له‌ به‌غدای پايته‌خت.

دوياخريش وه‌ی بوونه‌ی ٣٠ه‌مين ساڵياد له‌ناوبردن كورده‌يل فه‌يليه‌ ئويشيمه‌ رووڵه‌يل پيكهاته‌گه‌مان ناخوازيم زه‌خميگ قويلتر و گه‌وراتر بخه‌يمنه‌ پاڵ ئه‌و زه‌خمه‌يله‌ ك تائيسه‌يش ساڕيژ نه‌ويه‌ له‌وه‌ختيگ ك بوينيم ته‌نيا ده‌زگايگ رووشنهويری كورده‌يل فه‌يلی له‌ به‌غدا دويا هه‌ناس ئه‌ياد دوای چه‌نه‌ها ساڵ له‌ كاركردن وه‌رده‌وام و نويسانن مێژوو ئه‌را زينگه‌وكردن شيوه‌زووانيگ ره‌سه‌ن و ئه‌رشيفكردن هه‌زاران كيشه‌ی تايبه‌ت وه‌ پيكهاته‌گه‌مان، ك هه‌ر وه‌و خاتريشه‌ خواسته‌ له‌بان ئه‌وانه‌ك ئه‌تويه‌نن وه‌رگه‌ی وه‌رپرسيارێتی بگرن ته‌كان بيه‌نه‌ خوه‌يان و ده‌سبه‌سياگ نه‌وسيه‌ن، به‌ڵكوو بايه‌سه‌ وه‌ره‌ده‌وام ده‌سميه‌ت نويسانن ئی مێژوو و فكره‌ی گورجه‌ بيه‌ن ك خزمه‌ت وه‌ كيشه‌ی كورده‌يل فه‌يلی ئه‌كا له‌ نه‌وين ده‌زگای شه‌فه‌ق وه‌ ده‌نگ و قه‌ڵه‌می، ك ئيسه‌يش باوه‌ڕم ئه‌وه‌سه‌ گشت چشتيگ ئه‌را گشت كه‌سيگ ئاشكراس.

جه‌واد كازم مه‌ڵگشايی

ج . أ