هه‌ڕه‌شه‌كردن له‌ساى ده‌وڵه‌ت یاسا چه‌ وه‌پى ئویشن!

شفق نيوز

هه‌ڕه‌شه‌ له‌ژیان مه‌ردم بكه‌ن وه‌هویچ  مه‌هانه‌و شیوازیگ  یا وه‌بوونه‌ى ئنتماى ره‌گه‌زى یا نه‌ته‌وه‌یى یا دینى و چینایه‌تى، چوینكه‌ له‌هویچ وڵاتیگ له‌دونیا ئى جووره‌ مه‌سه‌له‌یگ ڕى یاسایى نه‌یرێد، ئنجا میكانیزمه‌یل یاسایى قه‌یه‌غه‌ى ئى جووره‌ مه‌سه‌له‌یگ كردنه‌و سزاى دادوه‌رى و یاسایى له‌ڕى دادگایه‌یل ده‌وڵه‌ته‌و ئه‌را ئى ره‌فتاره‌یله‌ دانریاگه‌.
وه‌ل ئه‌وه‌یشا ئه‌گه‌ر باێدو هه‌ر كه‌سیگیش له‌ئاكام تون و تیژى و هه‌ڕه‌شه‌كردن په‌نا بووه‌یده‌ وه‌ر شكایه‌ت له‌لاى دادگا، ئه‌وه‌ بیگومان دادگایش له‌لایه‌ن ده‌سڵات تاوانكارى و دادوه‌رى په‌یوه‌ندیداره‌و یه‌كسه‌ر وه‌بى دویاخستن مه‌سه‌له‌گه‌ نوڕیده‌ حاڵه‌ته‌گه‌و بڕیار هه‌ڵه‌په‌ڵه‌ى خوه‌ى له‌ى باوه‌ته‌و ده‌رئه‌كاو كه‌سه‌یل تاونبار خریه‌نه‌ وه‌رده‌م پرس وپرسكارى و سزاى دادوه‌رى له‌بان بنه‌واى بڕگه‌و مادده‌یل یاساى تاوانه‌یل تایبه‌ت وه‌ى مه‌به‌سه‌.
ئنجا خود ده‌وڵه‌ت ك وه‌رپرسه‌ له‌بان گشت دام و ده‌زگایه‌یل وڵات، شایسته‌ى ئه‌وه‌ نیه‌ چه‌وپووشى له‌ره‌فتار تاوان مه‌ترسیداریگ جوور مه‌سه‌له‌ى هه‌ڕه‌شه‌كردن بكا، ئه‌ویش له‌وه‌ر ئه‌وه‌ك ئى جووره‌ كرده‌وه‌ هه‌ڕه‌شه‌ له‌ئاسایش گشتى كوومه‌ڵایه‌تى ئه‌كاو ژیان چین ولایه‌ن و پیكهاته‌یل كوومه‌ڵایه‌تى خه‌یده‌ وه‌ر مه‌ترسى فره‌یگ و بیجگه‌ ئه‌وه‌یش ئه‌گه‌ر یا ئحتمال كووچكردن و ده‌رچگنیش ئه‌را شوون و ناوچه‌یل تر له‌لى بكه‌فێده‌و، یه‌یش بیجگه‌ ئه‌گه‌ره‌یل كوشتن و له‌ناوبردن و په‌یابوین خوسه‌و كینه‌ت و سه‌رنه‌گرتن سه‌قامگیرى و ئاسایش.
بیگومان ئى جووره‌ ره‌فتار و كرده‌وه‌یلیگ ناڕه‌وا له‌وڵاته‌یلیگ جوور وڵاته‌یل خوه‌رئاوا یه‌كسه‌ره‌ ڕى یاسایى بایه‌سه‌ بگرنه‌وه‌ر و بكه‌فێده‌ ژیر پرس وپرسكارى یاساى بى غه‌ل وغه‌ش، ئنجا دادگایش له‌ى حاڵه‌ته‌ ده‌ور تایبه‌ت خوه‌ى دوینێدو وه‌بى ئه‌وه‌ك چه‌وه‌ڕى بڕیار ده‌وڵه‌ت بكا، هه‌ر له‌وه‌ر ئه‌وه‌یش سزاى یاسایى ده‌رهه‌ق به‌دڕه‌فتاره‌یل جیوه‌جى بوود.
ئنجا هه‌ر له‌وه‌ر ئه‌وه‌یش بایه‌س بوى له‌بان دادگاو ده‌سڵاته‌یل تاوان و دادوه‌رى عراقى وه‌رجه‌ گشت دام و ده‌زگایگ  كاریگه‌رى گه‌وراى خوه‌یان له‌ى باوه‌ته‌و نیشان بیاتان له‌وه‌ختیگ  هه‌ڕه‌شى فه‌وج 9 به‌در ئاشكرا بوى.
مه‌سه‌له‌ى هه‌ڕه‌شه‌كردن ئه‌و گرووپه‌ بایه‌سه‌ له‌ساى ده‌وڵه‌ت یاسا وه‌ خوه‌یان و سه‌ركرده‌یانه‌و بخریه‌نه‌ ژیر ده‌سڵات یاساى هه‌ڵه‌په‌ڵه‌و گورجیگ ، چوینكه‌ ئه‌یانه‌ مه‌حاڵه‌ وه‌ى هه‌ڕه‌شه‌یله‌ واز بارن ئه‌گه‌ر سزاى یاسایى نه‌دریه‌ن، چوینكه‌ له‌شوون ئه‌و هه‌ڕه‌یشه‌ باره‌گایه‌یل كورد له‌ناوچه‌یل عه‌ره‌بنشین ته‌قیاوه‌و یه‌یش ماناى ئه‌وه‌سه‌ ترس یاسایى نه‌مه‌ندگه‌ له‌ساى ده‌وڵه‌ت یاسا.
وه‌ل ئه‌وه‌یشا دوینێد"ده‌وڵه‌ت یاسا"یش ئه‌و جموجویله‌ له‌ى باوه‌ته‌و نه‌یا خوه‌ى و بڕیار ده‌سگیركردن ئه‌و عه‌سابه‌یله‌ نه‌یا، بیگومان یه‌یش هووكاریگ دیرێدو هووكاره‌گه‌یش ئه‌وه‌سه‌ ك ده‌وڵه‌ت یاسا خود خوه‌ى وه‌بى یاسا كاره‌یلى ئه‌نجام ده‌ێدو هویچ وجوودیگ نه‌یرێد، هه‌ڵبه‌ته‌ یه‌یش راسیه‌و دروو نیه‌، چوینكه‌ ئمڕوو ده‌ور گرووپه‌یل و پیاوكوشه‌یل له‌عراق له‌ده‌ور ده‌وڵه‌ت یاسا زیاتره‌ له‌ده‌ركردن بڕیار ته‌كلایه‌نى و هویچ یاساو ده‌ستووریگ كاریگه‌رى نه‌كرده‌سه‌ بان ره‌فتار خراو و كاولكاریان و هویچ ترسیگیش له‌ده‌وڵه‌ت نه‌یرن و شایه‌ت فره‌یگیش له‌لیان خود ده‌وڵه‌ت پشتگیرى له‌لیان بكا، ئنجا ئایا هه‌ڕه‌شه‌كردن له‌ساى ده‌وڵه‌ت یاسا چه‌ وه‌پى ئویشن!!؟
له‌هه‌مان وه‌خت دوینیم ئى جووره‌ هه‌ڕه‌شه‌یگ له‌لایه‌ن گرووپ و كه‌سه‌یلیگه‌و پشتگیرى لایه‌نه‌یل تر سیاسى وه‌ دنگه‌ى سه‌ره‌كى خوه‌یان نانه‌و له‌وه‌رجه‌ ئه‌نجامداین هه‌ر ره‌فتاریگ ئشاره‌ت سه‌وز پشتگیرى وه‌رگرتنه‌.
بیگومان وه‌بوونه‌ى ئى كاره‌یله‌و مه‌سه‌له‌ى تون و تیژى و تونڕه‌وى هویچ وه‌ختیگ كووتایى وه‌پى نیاێدو روڵه‌یل كوومه‌ڵگاى عراقى ره‌سه‌ن له‌تى بوونه‌ قوربانى، ك یه‌یش مه‌ترسى گه‌ورایگ دیرێد له‌بان ئاینده‌ى عراق و ژیان ئاسووده‌یى

نه‌سرین مێرزا


ج