ئوميد چه‌ بكه‌يد له‌ ملله‌ت دوياكه‌فتگ؟

شفق نيوز

 

وه‌لی ئه‌گه‌ر بايمنه‌ ته‌ماشای ئامانج و نيازه‌يل پڕ له‌ شۆفێنيه‌ت بڕيگ له‌ سه‌ركرده‌يل عه‌ره‌ب و مه‌ردم وڵاته‌يل عه‌ره‌بی، ئه‌وه‌ ئه‌رامان ده‌ركه‌فيد ك خود خوه‌يانيش متمانه‌ وه‌ ئه‌زموون و سه‌نگ و قورسايی خوه‌يان نه‌يرن و گومانن له‌ دبلۆماسيه‌ت خوه‌يان و شايه‌تی له‌بان شكه‌ست خوه‌يان ده‌ن وه‌ ئه‌وه‌ك هيمان هويچ پيشكه‌فتنيگ ده‌رسه‌وه‌ر نه‌كردنه‌ له‌ڕوی ديموكراسيه‌ت و ژيانيگ ئازاد.

سه‌مير عه‌تاڵڵا ك رووژنامه‌نويسيگ ناودار لوبنانيه‌و له‌ چه‌نه‌ها رووژنامه‌يل ناودار كار كردگه‌، له‌ يه‌كيگ له‌ باوه‌ته‌يلی له‌ژير ناونيشان"دبلۆماسيه‌ت زانايه‌يل"ئويشيد: من جوور هه‌ر عه‌ره‌بيگ تر وه‌ دريژايی عومرم پرسيار ئه‌وه‌ له‌ خوه‌م ئه‌كه‌م ئايا هووكار شكه‌ستمان و سه‌ركه‌فتن غه‌يره‌مان چه‌س؟ دويای ئه‌وه‌يش پرسيد و ئويشيد: ئايا ئيمه‌ ئمڕوو ته‌نيا ملله‌تيگيم خراوه‌كار له‌بان نه‌خشه‌ی زه‌وی؟ ئه‌ی ئه‌راچه‌ ئيمه‌ هايمنه‌ نوای دوياكه‌فتگه‌يل و دويای پيشكه‌فتگه‌يل؟ ئه‌راچه‌ ئيمه‌ ئيمه‌ كه‌فتيمه‌ وه‌ل زيمبابۆی و كۆنگۆ و ئه‌را ته‌نيا جاريگ نزيكه‌و نادويم له‌ فنله‌نداو پۆڵه‌نداو ئايسله‌نداو هۆڵه‌ندا؟

وه‌ل ئه‌وه‌يشا دكتۆر عه‌لی وه‌ردی تاريخنويس و كومه‌ڵناس عه‌ره‌ب باسه‌يل فريه‌يگ له‌باوه‌ت دوياكه‌فتن كوومه‌ڵايه‌تی و رووشنهويريه‌ت نه‌ته‌وه‌گه‌ی نويساگه‌و جوور خاوه‌ن ئه‌قڵيه‌ت كووچكه‌ر تاريفيان كردگه‌ له‌ڕوی گفت و هوير زانستی و فه‌لسه‌فيه‌و، ك يه‌يش مانای ئه‌وه‌سه‌ هيمان عه‌ره‌ب له‌ سه‌رده‌م نه‌فامی ژيه‌يدو گام وه‌ره‌و نوا نه‌ناگه‌ له‌جه‌هان تازه‌ی ماريفه‌ت و پيشكه‌فتن و هه‌ر وه‌و خاتريشه‌ هه‌ميشه‌ ريگره‌ له‌وه‌رده‌م تازه‌گه‌ری و چاره‌نويس و ژيان ئاسووده‌ی ملله‌ته‌يل تر ده‌وروه‌ری، وه‌تايبه‌ت ئه‌را ملله‌تيگ جوور كورد ك تائيسه‌يش عه‌ره‌ب وه‌ ته‌مامی دگان وه‌ وجوود كورد نه‌ناگه‌ جوور مه‌ردمانيگ شايسته‌ی ئازادی و دياركردن چاره‌نويس و وه‌رگرتن هه‌قه‌يل داگيركرياگی.

هه‌ڵبه‌ته‌ ئيمه‌ ناخوازيم له‌ شانيه‌ت و كه‌سايه‌تی هه‌ر ملله‌تيگ كه‌مه‌و بكه‌يم، وه‌لی ملله‌تيگ ك فه‌توای حه‌رامكردن داگيركاری و نانبڕين وه‌زيفه‌كار و هاووڵاتيه‌يل وڵاته‌گه‌ی نه‌ياو پشتگير ناهه‌ق و سته‌مكار بوی، ئه‌يه‌ چ ملله‌تيگه‌و چ دوياكه‌فتنيگه‌ له‌ڕوی ئه‌قڵيه‌ت و ئنسانيه‌ت؟

ئمجا ئايا ئوميد چه‌ بكه‌يد له‌ی جووره‌ ملله‌تيگ دوياكه‌فتگ و چوين بتويه‌نيد باوه‌ڕ وه‌پی باريد ك ملله‌تيگ هه‌ن تا دويه‌كه‌ چه‌وسياگ ژيرده‌س ئيوه‌ بوينه‌و خاك و نيشتمانيان وه‌ زوڵم داگير كردينه‌و ناهه‌قی ده‌رهه‌قيان ئه‌نجام داينه‌، تا به‌شكه‌م كه‌ميگ بنوڕنه‌ ژيان مه‌ردم وڵاته‌يل تر و په‌ند و عبره‌ت وه‌ربگرن و پيشكه‌فتن له‌ژيان بارنه‌ وجوودو كه‌م باس عرووبه‌ت و دروشمه‌يل بی قانجاز بكه‌ن و كه‌م ته‌نيا خوه‌يان وه‌ خاوه‌ن ماڵ بزانن و مه‌ردمان تر وه‌ بيگانه‌.

ئارام عه‌بدولڕه‌حيم

ج . أ