كه‌ی كورده‌یل فه‌یلی وه‌هه‌ق ره‌وایان ئه‌ره‌سن؟

شفق نيوز

سه‌رده‌م و وه‌خت تازه بوی ك گشت كه‌سیگ وه‌هه‌ق ره‌وای خوه‌ی ڕه‌سی، و كورد فه‌یلییش له‌ی ناونیه‌ سوودمه‌نده‌و بوی له‌ی هه‌ق ره‌وا، له‌شوین ئه‌و هه‌مگه‌ مه‌ینه‌تی وسه‌ختی و به‌دبه‌ختی وه‌جووره‌یل ئه‌زیه‌تكردن و كوشتن و بڕین و ئاواره‌ و ‌ده‌ركردن و هویچ بیانگ یا گونایگ نیاشتن ته‌نیا گونایان هاووڵاتی كورد ره‌سه‌ن و دڵسووزیگ ئه‌رای نیشتمانه‌گه‌یان عراق بوین ك وه‌‌رده‌وام فه‌خر و شانازی وعراقی بوینیان ئه‌كردن، چوین له‌بان زه‌وی باوگ و باپیره‌یلیان وه‌دی هاتن و ئیوه‌ت و گه‌ورا بوین، و گیان و هاڵیان فدا و قوربانی و به‌شداری له‌ بناكردن ئی نیشتمانه كردن، و گشت چالاكی و پاكی وو‌ه‌فاداری و دڵسووزییگ ئه‌و ئه‌ركه‌ له‌بان شانیان وه‌ڕێ بردن، وه‌داخه‌و ‌ده‌سڵاتداره‌یل سته‌مكار و هویر شۆفینی ودوژمنه‌یل ئنسانیه‌ت و به‌شه‌ریه‌ت وه د‌ڕندانه‌ترین كرده‌وه‌یگ له‌  وه‌راوه‌ر ئی چین چالاك وخه‌باتگه‌ره‌ وسان، ووه‌ سه‌خترین جووره‌یل توندوتیژی ره‌فتار وته‌عامول وه‌لیان كردن، وگشت وڵاته‌یل جه‌هان له‌ بان ئه‌و‌ تاوانه‌یله ك وه‌هه‌ق گشت ملله‌ت عراقی وه‌تایبه‌ت كورده‌یل فه‌یلی ‌له‌ كوشتن و بڕین هه‌زاران  جایه‌ڵ جوان وه‌ژن و مناڵ و پیر په‌ككه‌فتگ و ‌ده‌ركردن سه‌دان هه‌زاریان وه‌ره‌و سنوور ئیران له‌شوین وه‌خاره‌ت بردن گشت سه‌روه‌ت و سامان و موڵك و ماڵه‌یل و به‌ڵگه‌یلی ك ئسبات وجوودیان له‌ی وڵاته‌ ئه‌كاد خه‌وه‌ر داشتن، و هه‌میش بیجگه‌ ئی هه‌مگه‌ تاوانه‌ ك وه‌هه‌قیان كریا له‌ بان وه‌فاداری ودڵسووزییان ئه‌رای وڵاته‌گه‌یان شه‌ك وگومان ئه‌لیان كریا ك مه‌یل وره‌غبه‌تیان وه‌ره‌و ئیرانه له‌ وه‌ختیگ وڵات ئیرانیش هه‌ساویان وه‌عراقی ئه‌كرد. له‌یره‌و كورده‌یل فه‌یلی هه‌ردو وڵات عراق و ئیران ده‌رانه‌ له‌ وه‌راوه‌ریان به‌سانن ئمجا بڕیگیان ناچاره‌وبوین ڕی وڵات بیگانه‌ بگرنه‌ وه‌ره‌و، و له‌ غه‌ریبی وه‌بیكه‌سی وه‌دویر له‌ نیشتمان و كه‌ش وهه‌وای كوردایه‌تی بژیه‌ن تا خودا ده‌ر ره‌حمه‌ت و فه‌ره‌ج ئه‌را‌یان واز بكاد، و له‌یره‌و وه‌به‌رده‌وام ئی پرسیاره‌ له‌ خوه‌مان ئه‌كه‌یمن ك ئه‌رایچه‌ وڵاته‌یلیگ ده‌م له‌ حقووق و ئنسانیه‌ت ئه‌ده‌ ن، له‌ وه‌راوه‌ر ئی هه‌مگه‌ زوڵم و تاوانه‌یله‌ بیده‌نگ مه‌نن، وه‌خاتر یه‌ ك به‌رژه‌وه‌ندیه‌یلیگ وه‌ل ئه‌و سته‌مكاره‌یله‌ داشتن، و ئمڕوو و له‌ شوون فیشتر له‌ هه‌فت ساڵ وه‌مل له‌ناوچگن ره‌ژیم دكتاتۆری و هاتن وه‌خت و سه‌رده‌م تازه‌یگ و دامه‌زرانن حكوومه‌ته‌یل نیشتمانی شوون له‌ شوون و هه‌ڵوژاردنه‌یل و له‌ یه‌كخستن په‌رله‌مان نیشتمانی، و له‌شوین ئه‌و هه‌مگه‌ زوڵم و زه‌ره‌ده‌ ك وه‌تویش ئی چینه‌ له‌ كورده‌یل فه‌یلی هات، وهه‌زاران جایه‌ڵ جوانه‌یلیان قوربانی گیان و موڵك و سه‌روه‌تیان ئه‌رای خاتر دیمۆكراتی و ئازادی كردن، و یه‌كمین كه‌سه‌یلیگ بوین ك له‌ ساڵ ١٩٦٣ و له‌ شوونی له‌ جاده‌یل به‌غدا، له‌ وه‌راوه‌ر ئه‌و ره‌ژیم دكتاتۆری به‌عسیه‌ وسان، و له‌ ئاكام ‌ئی هه‌مگه‌ كاره‌یل و خه‌باته‌یلیانه‌، بیسه‌روشوین كریان و كوشیان و له‌ وڵات خوه‌یان دویره‌و خریان، وه‌لی وه‌داخه‌و‌ تا ئى وه‌ختمانه كورده‌یل فه‌یلی هویچ چیشتیگ وه‌ده‌س نه‌گرتنه بیژگه‌ له‌ ته‌نیا وه‌عده‌ ‌وه‌عیده‌یلیگ، تا له‌ شوین ئعتراف كردن دادگای جنائی باڵا و ئی كێشه‌ی عادلانه‌یانه‌، و ئه‌و كاره‌ساته ك وه‌حه‌‌قیان كریا، و تاوانه‌یلیگ دژ ئنسانیه‌ت هه‌ساو كریان و هه‌میش دویاجار ئی كیشه‌ی عادلانه‌یانه‌ نریا له‌ وه‌راوه‌ر ئه‌نجوومه‌ن جیگه‌ره‌یل وه‌لی وه‌شیوه‌ی ڕاس و جددییگ هویر و ئهتمام وه‌پی نه‌دان، و له‌یره‌و ئه‌ویشیمنه‌ ئه‌و مه‌سئووله‌یله، ئایه‌ ئی هویره‌و نه‌كردن و بیوه‌فاییه‌ تا كه‌ی دریژه‌ ئه‌كیشی؟