له‌لاى په‌يكه‌ر شه‌هيده‌يل ريخ برايى بنه‌نه‌ چاڵ

جه‌مال ئه‌ركه‌وازى

شه‌فه‌ق نيوز/ كورده‌يل فه‌يلى وه‌ دريژايى ده‌يان ساڵه‌ چه‌وه‌ڕى ئه‌وه‌ ئه‌كه‌ن چاره‌ى كيشه‌و گرفتيان بڕه‌سێده‌ پاى ئنساف و هه‌ناسه‌ى ئووخه‌ى وه‌ وه‌رگرتن مافه‌يل ره‌وايان هه‌ڵكيشن، هه‌ر وه‌و خاتريشه‌ وه‌رده‌وام له‌ناو خه‌ياڵ پڕ ئه‌زره‌ت و ئومێد ژيه‌ن.

 

ئمڕوو له‌ى عراق هه‌ركه‌ڕاخوه‌ى و له‌ى وڵات پڕ كيشمه‌كيش سياسى و تايفيه‌، گشت چين و پيكهاته‌يگ نوێنه‌ر خوه‌يان له‌ حكومه‌ت و په‌رله‌مان ديرن، ته‌نيا پيكهاته‌ى سته‌مديده‌و زوڵمليكرياگ كورد فه‌يلى نه‌ود ك سيستم كۆتايش وه‌ قسمه‌تى نه‌كرياو حزب و لايه‌نه‌يل ده‌سڵاتدار و به‌رژه‌وه‌نديخواز رووژگار پڕ هه‌وه‌جه‌ پشت له‌ى مه‌ردم نيشتمانپه‌روه‌ره‌ كردن و هويچ هه‌وڵ و ته‌قلايگ وژدانى و ئنسانى نه‌يان ئه‌را قورتاركردن فه‌يليه‌يل له‌ى مه‌ينه‌تى و حه‌سره‌ت كاڵه‌ ك له‌تى ژيه‌ن.

 

فريه‌جار قسه‌وباس ئه‌وه‌ ژنه‌فيم ك مه‌ردم ئى پيكهاته‌ چويچيانه‌و به‌شبه‌شه‌و بوينه‌، وه‌و مانا ك مه‌ردمه‌گه‌ ته‌رفتوين بوينه‌ له‌ناونى حزب ولايه‌نه‌يل كورد و غه‌يره‌ كورد و يه‌يش زه‌ره‌د ئاشكرايگ له‌ ئاينده‌و چاره‌نويس فه‌يليه‌يل داگه‌.

 

ئيمه‌ ئه‌گه‌ر بتوايم دگان وه‌ڕاسيه‌و بنه‌يم، بايه‌سه‌ حاشا له‌ى حاڵه‌ته‌ نه‌كه‌يم ك ئاماژه‌ وه‌پى كرديم و پيكهاته‌ى فه‌يليمان ماوه‌يگه‌ تويش گه‌رده‌لويلان چويچيان هاتگه‌و هه‌وه‌جه‌ وه‌ كه‌شيگ پڕ له‌ گرده‌وبوين و نزيكايه‌تى ديرن له‌وه‌ر داناين نه‌خشه‌ى ئاينده‌و هاوردنه‌وه‌ى قورسايى و پايه‌ى كۆمه‌ڵايه‌تيان جوور هه‌ر پيكهاته‌يگ تر ئى وڵاته‌.

 

ئمڕوو له‌ ده‌ركه‌فتن په‌يكه‌ر تازه‌يگ شه‌هيده‌يل و دامه‌زراننى له‌ناوڕاس به‌غداى پايته‌خت، تاڕاده‌يگ خه‌ملاده‌ره‌ ئه‌را كه‌س وكار قوربانيه‌يل و بيسه‌روشوونه‌يل، يه‌يش وه‌و ماناسه‌ ك هيمان ئى پيكهاته‌ى ره‌سه‌نه‌ تواناى جموجويليان وه‌كاره‌و ئه‌گه‌ريش بخوازن بڕه‌سنه‌ مافه‌يل ره‌وايان بيگومان ئى كاريشه‌ مه‌حاڵ نيه‌و ئه‌تويه‌نن وه‌ل ته‌مامبوين ئه‌و په‌يكه‌ره‌ و وازكردنى ريخ برايى بنه‌نه‌ چاڵ و خوين پاك ئه‌و شه‌هيده‌يله‌ ك رژيم رمياگ به‌عس رشانه‌ى بارنه‌ ياد و ده‌س بكه‌نه‌ خه‌بات و هه‌وڵه‌يل تر تازه‌يگ وه‌ يه‌كده‌نگى و يه‌كڕه‌نگى ئه‌را ئه‌وه‌گ بنبڕ بيبه‌شى و مه‌ويسى بكه‌ن و خوه‌يان بخزننه‌ ناو پرووسه‌ى تازه‌ى سياسى و هه‌ڵوژاردنه‌يل ئاينده‌و حاشا له‌ به‌شبه‌شى و چويچيان بكه‌ن و له‌نوو ماڵ فه‌يلى ئاوه‌دانه‌و بكه‌ن.

جه‌ماڵ ئه‌ركه‌وازى