سه‌ختترین ژیان كى دیه‌ى چه‌و؟

شفق نيوز

له‌ساڵه‌یل بیس سه‌ده‌ى وه‌رینه‌وه‌ جویر نموونه‌یگ  تیه‌ریمنه‌وه‌ یاد نه‌وه‌یل تازه‌ ئه‌را ئه‌وه‌ك بزانن ئى وڵاته‌ هویچ وه‌ختیگ  له‌كیشمه‌كیش و كوشتن و ماڵویرانى و دوچه‌وه‌كى و مه‌سه‌له‌ى جیاوازیكردن ڕه‌گه‌زایه‌تى و نه‌ته‌وایه‌تى خالى نه‌ویه‌و هه‌ر بایه‌سه‌ نه‌ته‌وه‌یگ یا چین و تایفه‌یگ له‌تى ژیرده‌سه‌و ناهمى و هه‌قخوریاگ بویاتاگ و جویر بیگانه‌ ته‌ماشا بكریاتاگ.

بیگومان كورد وه‌گشتى له‌سه‌رده‌م مه‌له‌كى تا سه‌رده‌م كوومارى و هاتن دڕه‌نده‌ترین دكتاتۆر ئه‌را بان ته‌خت ده‌سڵات ك سه‌دام خوینمژ و داروده‌سه‌گه‌ى بوین، له‌شوون ژیانیگ  گه‌ردى ئازاد و سه‌روه‌خوه‌ى، وه‌لى هه‌میشه‌ كه‌فتیاگه‌ وه‌ر قه‌ده‌ر ڕووژگار ك وه‌دریژایى سه‌ده‌یگ تام ئوخه‌ى نه‌كرد و هه‌ر وه‌ ئاگر و ئاسن جواوه‌و دریاو ئه‌نفال و كیمیاواران كردنه‌ به‌شى ك بویه‌ مایه‌ى له‌ناوبردن ڕوڵه‌یل ملله‌ته‌گه‌و هه‌ر له‌وه‌ر ئه‌وه‌یش كورد خه‌بات چه‌كدارى هه‌ڵوژان و جه‌وه‌ڵه‌یل كوردستان كرده‌ پشت و په‌نا، له‌وه‌ختیگیش زانست دانیشتن و زوان گفتوگوو هویچ قانجازیگ وه‌ل داگیركارا له‌لى نه‌كه‌فته‌وه‌و هه‌ر زووان هه‌ڕه‌شه‌ هاورده‌ كار، ده‌سكرده‌ راپه‌ڕین و شووڕشكارى ئه‌را وه‌ده‌سهاوردن هه‌قه‌یل ڕه‌واى. وه‌لى ئیمه‌ له‌یرا توایم بزانیم سه‌ختترین ژیان كى دیه‌ى چه‌و له‌ى وڵات خاوه‌ن پیكهاته‌و چینه‌یل جووراو جووره‌؟ بیگومان تاریخ شایه‌ته‌ ك كورده‌یل فه‌یلى كه‌فتنه‌ وه‌ر ئه‌و سه‌ختى ژیانه‌و تاوانه‌یل نائنسانى فره‌یگ  ده‌رهه‌قیان ئه‌نجام دریا جویر ئه‌وه‌ك سه‌رچه‌وه‌ى گه‌وراى دینى شیعه‌ سه‌ید(عه‌لى سیستانى) له‌وه‌خت دیدار سه‌ركوومار عراق فیدراڵ وه‌لیا له‌ نه‌جه‌ف له‌باوه‌ت ئى چین كورده‌وه‌ وت: كورده‌یل فه‌یلى فره‌ترین و سه‌ختترین زوڵم و زوور له‌لیان كریا له‌ى عراقه‌. دویاى ئه‌وه‌یش جویر ئه‌وه‌ك دیار و ئاشكراس ك رژیم دكتاتۆر ئه‌وه‌نه‌ خوسه‌و كینه‌ت خوه‌ى وه‌ل كورده‌یل فه‌یلیا هاورده‌ كار زیاتر له‌گشت چینه‌یل كوومه‌ڵگا، چوینكه‌ تا ئیسه‌یش گشت ئه‌و قه‌وره‌یل وه‌جه‌مه‌ ك له‌شوونه‌یل جیاجیاى وڵاته‌گه‌ كریاسه‌ دى و ته‌رم ڕوڵه‌يل ملله‌ت بیتاوان له‌تیان دوینریاسه‌وه‌، وه‌داخ فره‌یگه‌وه‌ هیمان ته‌رم جایه‌ڵ جوانیگ كورد فه‌یلى له‌تیان نه‌دوینریاسه‌وه‌ تا بزانیم ڕوڵه‌یلمان له‌كوورا زنگ  وه‌چاڵ كریان و چه‌ وه‌سه‌ریان هات ك یه‌یش چشتیگ  ئاشكرا حاشا هه‌ڵنه‌گره‌ ك زوورم داڵگه‌یل رووفات ئه‌زیزه‌یلیان دینه‌ چه‌و ته‌نیا داڵگه‌یل جگرسزیاگ فه‌یلى نه‌وگ ك هیمان وه‌ ته‌ماى هه‌واڵیگن. گشت ئه‌یانه‌ ئه‌و راسیه‌ ده‌رخه‌ن ك فه‌یلیه‌یل سه‌ختترین وه‌زع داشتنه‌و ئه‌و مامڵه‌ى دڕندانه‌ ك رژیم رمیاگ وه‌لیانا كرده‌سه‌ى وه‌ل هویچ چین و تایفه‌یگا نه‌كرده‌سه‌ى، هه‌ر له‌وه‌ر ئه‌وه‌یش تویه‌نیم بویشیم له‌ نیمه‌ى دویه‌م سه‌ده‌ى وه‌رین ڕووژگاره‌یل فره‌ سه‌ختیگ  هاته‌ تویش كورده‌یل فه‌یلى ك هویچ ملله‌ت و مه‌ردمانیگ  نه‌یه‌سه‌ى چه‌و، وه‌ل ئه‌وه‌یشا هویچ پشت و په‌نایگ  نه‌یاشتن ته‌نیا ئیراده‌ى پوڵایین و سه‌بر و چه‌وه‌ڕى دویر و دریژ خوه‌یان نه‌وگ.