ته‌كنۆلۆجیاو مقه‌یه‌تیكردن ژینگه‌

شفق نيوز

  له‌ هه‌ر بواریگ زانستى ك پیشكه‌فتن له‌تى په‌یا كریه‌ید، بایه‌سه‌ له‌وه‌وه‌ ده‌س وه‌پى بكه‌یم ك مه‌ردمان تر وه‌پى ره‌سینه‌، ئنجا ئه‌و پیشكه‌فتن بووده‌ موڵك گشت مه‌ردمیگ و نیه‌ود له‌ بواره‌یل ژیان هه‌میشه‌ بچیم له‌ سه‌ره‌تاوه‌ ده‌س وه‌پى بكه‌یم.

له‌باوه‌ت ژینگه‌ له‌ بوار جیوه‌جیكردن، پیشكه‌فتن گه‌ورایگ هاته‌سه‌ ده‌س وه‌تایبه‌ت له‌ بوار مقه‌یه‌تیكردن و خاسكردنى، هه‌ر له‌وه‌ر ئه‌وه‌یش بایه‌سه‌ نه‌ف له‌و ئاكام و ته‌كنۆلۆجیاو ئامێره‌یله‌ وه‌ربگریم ك وڵاته‌یل تر وه‌پى ره‌سینه‌.

له‌باوه‌ت قورتابوین له‌ له‌ كاڵاى وه‌كارهاتگ ، "ئیتۆ سایورۆ" وه‌ڕیه‌وبه‌ر كومپانیاى"ئیبارا" فریه‌ دژ ئه‌و سیستم دویاكه‌فتگ وڵات ئیمه‌ بوى ك پسى و زبڵ وه‌بى وه‌كارهاوردن هویچ مادده‌یگ سزنن یا خه‌نه‌ى ژیر خاك!.

چوینكه‌ له‌ى سه‌رده‌مه‌ وه‌ مه‌رام دوباره‌كردن و دروسكردنه‌وه‌ى جاریگ تر، مه‌سه‌له‌ى پاشمه‌نده‌ى كاڵاو پاشمه‌نده‌ى چشته‌یل فڕه‌دریاگسه‌رمایه‌ى فریه‌ گه‌ورایگه‌ له‌ڕوى ئابووریه‌و ، ك كریه‌ید وه‌ سیستم خاسیگ مامڵه‌ى گونجیاگ وه‌لیا بكریه‌ید.

ئنجا ئه‌را چوینیه‌تى نه‌فوه‌رگرتن له‌ى مه‌سه‌له‌یشه‌ "ئیزاوا تاداشى"جیگر سه‌رۆك سه‌نته‌ر هاوكارى ناوده‌وڵه‌تى یابان- JICA جه‌خت له‌بان ئه‌وه‌ كرد ك ئه‌وان ئه‌گه‌ر ریككه‌فتننامه‌ وه‌لیانا بكریه‌ید تویه‌نن له‌ بوار ژینگه‌ ده‌سمیه‌ت هه‌ر وڵاتیگ بیه‌ن جوور ئه‌وه‌ك ئیسه‌ له‌ ئوردن و مسر و تونس و عومان و قه‌ته‌ر و سعودیه‌ و یه‌مه‌ن...هتد پیشكه‌شى كه‌ن له‌ بواره‌یل بانك زانیارى چه‌ودیرى وه‌ڕیه‌وبردن.

یه‌یش بیجگه‌ بانك یابان ئه‌را هاوكارى ناوده‌وڵه‌تى ك سه‌رۆك ئه‌و بانگه‌ وت: ئه‌وان له‌ڕى باڵوێزخانه‌ى خوه‌یانه‌و له‌ هه‌ر وڵاتیگ په‌یوه‌ندى دروس كه‌ن ئه‌را هاوكارى له‌ بوار ژینگه‌و هه‌ر له‌ى باوه‌تیشه‌و یابان ئاماده‌س له‌بوار مقه‌یه‌تیكردن ژینگه‌ وه‌ل وزاره‌ت شاره‌وانى و ژینگه‌ى عراق هاوكارى بكاو ئیمه‌یش ئه‌تویه‌نیم نه‌ف له‌و پرووژه‌یله‌ وه‌ربگریم ك له‌ى بواره‌و ئاماده‌ كریه‌ن.

بیجگه‌ یابان، له‌ وڵاته‌یل تر ئۆرپى و ئه‌مریكییش پرووژه‌یل كرده‌وه‌یى و جیوه‌جیكارى فریه‌یگ هه‌ن ك بوود نه‌ف له‌لیان وه‌ربگریم ئه‌را ئه‌وه‌ك ژینگه‌ له‌ رینمایى و نه‌زه‌ریه‌و بچه‌رخنیم وه‌ره‌و چاره‌سه‌ر ته‌كنۆلۆجى و جیوه‌جیكردن.

عه‌بدولڕه‌حمان سدیق

ج . أ