هویرو باوه‌ڕ كویه‌ن به‌غدایى

شفق نيوز

هویروڕاى خوه‌ى ده‌رخستگه‌و په‌ند له‌ئه‌زموونه‌یل رووژگار وه‌رگرتگه‌، وه‌تایبه‌ت له‌ژیان دویر له‌ شارستانیه‌ت باوه‌ڕه‌یل فراوانیگ هاته‌سه‌ وجوودو تیكه‌ڵ روح و هویره‌وكردن ئاده‌میزاد بوینه‌و تائیسه‌یش له‌گه‌شت شوون و ناوچه‌یگ له‌دونیا تاڕاده‌یگ هه‌ر شوونه‌وارى مه‌ندگه‌. ئنجا هه‌ر ملله‌تیگ وه‌جووریگ فكره‌و كردیان و باوه‌ڕ وه‌ چشته‌یلیگ داشتیان ك وه‌ل ژیان كومه‌ڵایه‌تیا چه‌سپیاویگ  ره‌فتار و هه‌ڵسووكه‌فتیان ك وه‌گووره‌ى رویداین یا نیشانه‌یگ له‌ره‌فتار یا وه‌گووره‌ى خه‌و، دى باوه‌ڕ وه‌ ئه‌وه‌ داشتیان ك چشتیگ رویده‌یگ. ئنجا له‌ى باوه‌ته‌وه‌ مه‌ردم به‌غدایى باوه‌ڕ تایبه‌تیگ داشتن ك تائیسه‌یش هه‌ر باوه‌ له‌ناو فره‌یگ له‌لیان وه‌تایبه‌ت له‌لاى پیره‌یلیان و له‌وانه‌یش:

* ئه‌گه‌ر ده‌س راس باتاگه‌ خوریان، ئه‌وه‌ ماناى ئه‌وه‌سه‌ خاوه‌نه‌گه‌ى خه‌یر ئه‌ڕاى تیه‌یگ  و پویل تیه‌یگه‌ ده‌سى!

* ئه‌گه‌ر چه‌و راس باتاگه‌ پرتانن، وتیان نزیكرترین كه‌سیگ سه‌رداند ئه‌كا.

* ئه‌گه‌ر لویت هاته‌ خوریان، ماناى ئه‌وه‌سه‌ ماسى خوه‌ید.

* ئه‌گه‌ر (موى) كه‌فته‌ بان زووان، ئه‌وه‌ ماناى ئه‌وه‌سه‌ ك سه‌وقاتیگ ئه‌ڕاد تیه‌یگ.

وه‌ل ئه‌وه‌یشا له‌رووژگار كویه‌ن به‌غدایى، هه‌ر ژنیگ شویه‌گه‌ى بچیاتاگه‌ سه‌فه‌ر، تا هاتیاگه‌وه‌ دى ئه‌و ژنه‌ هویچ مادده‌یگ جوانكارى نه‌خستیاگه‌ روخسارى. له‌وه‌یش جوانتر ئه‌وه‌ بوى، هه‌ر وه‌ختى ماڵیگ باتاگه‌ هاوساى ماڵیگ له‌ى شار به‌غدا وه‌تایبه‌ت له‌ناو كورده‌یل فه‌یلى خوه‌مان، ئه‌وه‌ له‌لایه‌ن هاوساگه‌یه‌و ئاگادار كریا(سوو له‌ماڵمان میوانین). وه‌ى جووریشه‌ خوه‌شه‌ویسى و دووسى له‌بان نیه‌ت پاكیگ دروس بویاگ، ك ته‌نانه‌ت ئه‌گه‌ر هاوساگه‌د بچیاتاگه‌ شوونیگ و مانگیگیش ناتاگه‌وه‌، ماڵه‌گه‌ى له‌ ئه‌مان بوى و كه‌سیگ له‌ئه‌ندامه‌یل ماڵه‌ هاوساگه‌ى شه‌و له‌ماڵه‌گه‌ى خه‌فتیاد. یا هه‌ر وه‌ختى كه‌سیگ بار بكرداگ و حه‌وشه‌گه‌ى بفرووشتاگه‌ ماڵیگ تر (كوته‌ نان) یا (شه‌كه‌ر) یا( قورئان)یگ پیرووز له‌ناو ماڵه‌گه‌ى هیشتیاگه‌جى تا بووده‌ مایه‌ى خه‌یر ئه‌را ئه‌وه‌ك ماڵه‌گه‌یان سه‌ندگه‌.

ئه‌وسا له‌ناو كومه‌ڵگاى به‌غدایى وه‌تایبه‌ت له‌لاى كورده‌یل فه‌یلى، هویچ وه‌ختى برا بویچگ  ك خاوه‌ن ژن و مناڵیش بویاتاد له‌وه‌رده‌م باوگ و برا گه‌وراى جغاره‌ نه‌كیشاو هه‌ر وه‌دزیه‌وه‌ جغاره‌گه‌ى ته‌واو كردیاگ و هاتیاده‌ ماڵ، چوینكه‌ ریز و حورمه‌ت نیاگ له‌كه‌سیگ له‌خوه‌ى گه‌وراتر، وه‌لى ئمڕوو نوڕید قلیانیش له‌وه‌رچه‌ویان كیشن و چشتگه‌ فره‌ ئاسایى بویه‌. یا له‌وه‌ختیگ برا گه‌ورا باتیاگ برا بوچگ نه‌تویه‌نست قول له‌بان قول دانیشیگ و یه‌كسه‌ر قولى هاوردیاگه‌ خوار له‌وه‌ر ڕیز و حورمه‌ت.

ئه‌وسا نیه‌ت مه‌ردم جووریگ له‌پاكى وه‌پیه‌وه‌ دیار بوى و ترس خودا هه‌میشه‌ له‌دڵ بوى، ئنجا كه‌سیگ ئه‌گه‌ر چه‌وى بكه‌فتیاده‌ له‌ته‌ نانیگ له‌بان زه‌وى كه‌فتویگ، یه‌كسه‌ر هه‌ڵیگرتیاد و نیاگه‌ى تیوڵ و ماچى كردیادو خستیاده‌ى شوون به‌رز یا تاقیگ ، یا هه‌ر وه‌ختى وه‌ره‌قه‌ى نویسیاگیگ بوینیاتانه‌و خستیانه‌ى شوونیگ پا نه‌چووده‌ بانى له‌وه‌ر ئه‌وه‌ك وتیان نه‌وه‌ك ناو خوداى گه‌ورا له‌بانى نویسیاویگ.

باوه‌ڕه‌یل فره‌یگ له‌لاى مه‌ردم به‌غدایى وجوود داشت، له‌وانه‌یش: هویچ له‌وه‌خت خوه‌رئاوابوین یا مه‌غرب كه‌س گزگ وه‌رماڵى نه‌یا. له‌وه‌خت هاتن یه‌كه‌م رووژ مانگ  (سه‌فه‌ر)یش په‌رداخیگ شیشه‌ یا ده‌فر و پیاڵه‌یگ شیشه‌یین شكانیان تا ئه‌و مانگه‌ وه‌ سه‌ڵامه‌ت له‌بانیان گوزه‌ر بكا. ئه‌یه‌و باوه‌ڕه‌یل فره‌یگ ك تائیسه‌یش هیمان شوونه‌وارى له‌ناو كومه‌ڵگاى به‌غدایى مه‌ندگه‌.