قادریه‌ جه‌عفه‌ر: حكوومه‌ت نوو متمانه‌ وه‌ ژن نه‌یرى

شفق نيوز

كوومه‌ڵایه‌تى و وه‌رزشى؛ و ئه‌وه‌یشه‌ دوینیمن ك له‌ فره‌ له‌ ده‌وڵه‌ته‌یل ژن پۆسته‌یل گرنگ و به‌رز وه‌رگردیه‌ و نه‌خش و ده‌ور گه‌ورایگ داشتیه‌ له‌ سه‌ركردایه‌تى كوومه‌ڵگا جوور ڕاوێژكار یا مستشاره‌ى ئه‌ڵمانیا ئه‌نگڵا مێركڵ، و وه‌زیر خارجیه‌ى ئه‌مریكا هیلارى كلینتۆن، و وه‌زیر دارایى فه‌ره‌نسا كریستین لاگارد، و جیگر سه‌رۆك وه‌زیره‌یل پاكستان بینه‌زیر بۆتۆى ڕه‌حمه‌تى، و سه‌رۆك ئه‌نجوومه‌ن نوێنه‌ره‌یل ئه‌مریكا نانسى پیلۆسى...هتد. له‌ وه‌رانوه‌ر ئه‌وه‌یش له‌ كوومه‌ڵگایه‌یل جه‌هان سێیم وه‌تایبه‌تى له‌ عیراق ئه‌وه‌ دوینیمن ك ژن تویش مه‌ینه‌تى دویره‌وخستن و له‌ په‌راوێزخستن یا تهمیش هاتیه‌ و له‌ زوورمى ئه‌و كاروباره‌یله‌ ك ڕووزگار و ئاینده‌ى وڵات دیارى كه‌ید، هویچ نه‌خش و ده‌وریگ نه‌دریاسه‌ پى.

ماڵپه‌ڕ شه‌فه‌ق له‌ى باوه‌ت گرنگه‌ وه‌خاس زانست ك دیداریگ وه‌ل خانم قادریه‌ جه‌عفه‌ر خالد به‌رپرس یه‌كێتى ژنه‌یل كوردستان / ئه‌نجوومه‌ن پارێزگاى به‌غدا ساز بیه‌ید، و ئى پرسیاره‌یله‌ ئاراسته‌ى كردیمن:

* ئه‌وه‌ نیه‌دوینید ك ژن له‌ نه‌خش و ده‌وره‌یل كارا له‌ كوومه‌ڵگاى عیراقى دیار نیه‌، هه‌رچه‌نى ك به‌ش گه‌ورایگه‌ له‌ پێكهاته‌یل ملله‌ت عیراق ؟

- له‌ زوورمى وڵاته‌یل و كوومه‌ڵگایه‌یل، ئاماده‌بوین فراوانیگ ژن وه‌چه‌و دوینریه‌ید، چوینكه‌ ژن وزه‌یگه‌ بن نه‌یرى له‌ كوومه‌ڵگا...ژن عیراقییش نه‌خش و ده‌وره‌یل گرنگ كارایگ داشتنه‌ له‌و پۆسته‌یله‌ ك وه‌ریان گردیه‌، و منیش ئه‌وه‌ دوینم ك توانا دیرى وه‌ شیوه‌یگ كارا سه‌ركردایه‌تى كوومه‌ڵگا بكه‌ید؛ وه‌ل جه‌خت كردنم له‌ بان توانایه‌یلى له‌ مه‌یدان سازداین بڕیاره‌یل یه‌كلاكه‌ر.

* وه‌ ڕاى ئیوه‌، هووكار (سبب) سسى و كه‌مه‌وكردن نوێنه‌رایه‌تى ژن له‌ حكوومه‌ت نوو چه‌س؟

- وه‌ ڕاى من، فراكسیۆنه‌یل سیاسى به‌رپرسن له‌ كاندید نه‌كردن ژن ئه‌را هه‌ڵگردن جانتایه‌یل وه‌زارى، وهه‌ر ئه‌وانیش بوینه‌ هووكار ئه‌وه‌ ك ژن ئه‌و پله‌ و پایه‌ وه‌ر نه‌گرى ك شایان خوه‌یه‌ و لایقه‌ وه‌خوه‌ى.

* ڕیكخریایه‌یل كوومه‌ڵگاى مه‌ده‌نى بایه‌ته‌ چه‌ بكه‌ن ئه‌را چالاكه‌وكردن نه‌خش و ده‌ور ژن له‌ بیناكردن عیراق نوو؟

- فره‌ گرنگه‌ ك ڕیكخریایه‌یل كوومه‌ڵگاى مه‌ده‌نى مكوڕ بوون له‌ بان داواكردن ئنسافكردن ژنه‌یل و جیوه‌جیكرن داواكاریه‌یلیان، هه‌ر وه‌ك پیاو؛ له‌ وه‌ڕیه‌وبردن هه‌ر چشتیگ، و له‌و كاروباره‌یل ك بایه‌ته‌ ئه‌نجام بدریه‌ن جه‌ختكردنه‌ له‌بان ئه‌و ك ژنه‌یل به‌رزترین پله‌ وپایه‌ له‌ناو كوومه‌ڵگا وه‌ربگرن.

*ئه‌وه‌ دوینریه‌ید ك زوورمى فراكسیۆنه‌یل سیاسى وه‌ ده‌م و زووان بانگه‌واز یا ده‌عوه‌ت ئه‌را گوڕداین وه‌ به‌شداریكردن ژن كه‌ن له‌ حكوومه‌ت نوو، وه‌لى له‌ ڕاسى وه‌ئه‌وه‌زى ئه‌وه‌ دوینیمن، ئیوه‌ له‌ى باوه‌ته‌ چه‌ ئویشین؟

- حكوومه‌ت نوو متمانه‌ وه‌ ژنه‌یل نه‌یرى، و هاله‌ بان ئه‌و باوه‌ڕه‌ ك ژن توانا نه‌یرى هویچ چشتیگ ته‌واو بكه‌ید، و له‌هه‌مان وه‌ختیش هه‌وڵ ئه‌وه‌یشه‌ ده‌ید له‌ شانیه‌ت ژن كه‌مه‌و بكه‌ید.

* ئایا تواید قسه‌یگ ئاراسته‌ى ژنه‌یل عیراقى بكه‌ید وه‌ گشت لایه‌نه‌یلیانه‌وه‌، ئه‌را په‌یا كردن ڕوى وه‌ر فراوانتریگ ئه‌را سابتكردن توانایه‌یل خوه‌ى؟

- قسه‌یلم ئاراسته‌ى گشت ئه‌و ژنه‌یله‌ كه‌م ك تواناى سه‌ركردایه‌تى كردن دیرن، به‌شداریكردن له‌ سازداین بڕیاره‌یل و ده‌ركردن ژن له‌و بارووه‌زع گه‌ن حازریه‌ ئه‌را بارووه‌زعیگ تر ك ماوه‌ بیه‌یده‌پى بچووده‌ ڕیز یه‌كم له‌ گشت لاینه‌یل ژیان، و داوایش له‌لیان كه‌م وه‌گشت قه‌وه‌تیگه‌و داواى هه‌قه‌یل ڕه‌واى ژنه‌یل عیراقى بكه‌ن له‌ گشت بواریگ.

 

هه‌ڵه‌وگه‌ردانن/ ماجد سوره‌مێرى