جه‌نگه‌گه‌ى مالكى

شفق نيوز

  گومان له‌وه‌ نیه‌ ك هه‌ڵكه‌فت جوگرافى و سیاسى و ناكوكیه‌یل مه‌زه‌وى عراق خاسترین ژینگه‌ن ئه‌رت شوونكردنه‌وه‌ى گرووپه‌یل تونڕه‌و، وه‌تایبه‌ت ریكخریاگیگ جوور قاعیده‌و لقه‌یلى تویه‌نستنه‌ عراق و ناكوكیه‌یله‌ ناوخوه‌یه‌گه‌ى جوور خاسترین ده‌رفه‌ت ئه‌را گه‌شه‌سه‌ندن خوه‌یان بارنه‌ كار و تویه‌نستنه‌ فریه‌ وه‌خاسى نه‌ف له‌و كه‌لینه‌یل ئاسایشیه‌ وه‌ربگرن.

عراق ئه‌را گرووپه‌یل تونڕه‌و و كیشمه‌كیشه‌یل هه‌رێمایه‌تى بویه‌سه‌ خاسترین مه‌یدان، وه‌ل ئه‌وه‌یشا بویه‌سه‌ هووكاریگ فریه‌ ئاسان و ده‌سمیه‌تده‌ر تا بڕیگ لایه‌ن له‌عراق له‌پاڵ ئه‌و گرووپه‌یل تونڕه‌وه‌ ئامانجه‌یل خوه‌یان جیوه‌جى بكه‌ن له‌بان هیز و نه‌ته‌وه‌و مه‌زه‌وه‌یل تر و نه‌یاره‌یلیان، جوور ئه‌وه‌ك له‌ سه‌ره‌تا نورى مالكى په‌یڕه‌وى كردو تا ئیسه‌یش وه‌رده‌وامى دیرید.

هویچ ئاماژه‌یگ ئسپاتكریاگ له‌وه‌رده‌س نیه‌ شه‌یه‌تى ئه‌وه‌ بیه‌ید ك مالكى راسه‌وخۆ په‌یوه‌ندى وه‌گشت كرده‌وه‌یل ترۆریستى و ریخوه‌شكردنه‌و دیرید ئه‌را ئامانجه‌یل ئه‌و گرووپه‌یل ترۆریستیه‌ ك رووژانه‌ خوین عراقیه‌یل حه‌ڵاڵ كردنه‌، وه‌لى رویداگه‌یل و له‌ یه‌ك نزیكى كیشه‌یل سیاسى و سه‌رهه‌ڵداین وه‌ختى نه‌خش گرووپه‌یل تونڕه‌و، نیشانه‌ى ئاشكران ئه‌را نه‌فوه‌رگرتن له‌و هیزه‌یله‌ له‌وه‌خته‌یل جیاجیا.

ئیسه‌ قه‌یرانه‌یل عراق كه‌ڵه‌كه‌ بوینه‌و بار ناوچه‌گه‌ ناسه‌قامگیره‌و له‌ولایشه‌و قه‌یران سوریایش راسه‌وخۆ په‌یوه‌ندى وه‌ نه‌خشه‌ى سیاسى عراقه‌و دیرید، ئنجا دوباره‌ له‌یرا مالكى گرووپه‌یل تونڕه‌و هاورده‌سه‌ كار ئه‌را مه‌رامه‌یل خوه‌ى و حزبه‌گه‌ى، وه‌تایبه‌ت كیشانن سووز شیعه‌ و دویاى ئه‌وه‌یش ئه‌و چه‌ن ریككه‌فتنه‌یل سه‌ربازییشه‌ ك ئمزا كریان ئاماژه‌ن ئه‌را مه‌یل سێباره‌ وه‌رگرتنه‌وه‌ى پۆست سه‌رۆك وه‌زیره‌یل له‌لایه‌ن مالكیه‌و.

وه‌ل گشت ئه‌و شیه‌وكردن و له‌یكه‌وداینه‌یله‌، راپۆرته‌یل رووژنامه‌گه‌رى و لێدوان وه‌رپرسه‌یل باڵاى عراقى ئاشكراى ئه‌وه‌ ئه‌كا ك مالكى له‌وه‌ر خاتر خوه‌ى و حزبه‌گه‌ى و ئامانجه‌یل خوه‌ى جه‌نگ دروس ئه‌كاو هویچ ده‌رفه‌تیگ نه‌یشته‌سه‌و ئه‌را شیه‌وكردن تر.

دلێر عه‌بدولقادر

ج . أ