نه‌فت كوردستان سه‌رچه‌وه‌ى ئاشتیه‌

شفق نيوز

 

له‌ گوزه‌یشته‌ هه‌میشه‌ نه‌فت مایه‌ى ده‌رده‌سه‌رى و كوشتار بوى ئه‌را ملله‌ت كورد، رژیم دیكتاتۆرى به‌عس نه‌فت و غاز وڵاته‌گه‌ى فرووشتیادو له‌وه‌رانوه‌ر ئه‌وه‌یش ته‌قه‌مه‌نى و غازكیمیاوى وه‌پى سه‌ندیاد و له‌بان ملله‌ت كورد تاقییه‌و كردیاد و كوشتیاده‌مان وه‌پى.

 

ئمڕوو ده‌ستوور هه‌میشه‌یى عراق ك زوورم خه‌ڵك عراق ده‌نگ ئه‌ڕاى دان، ڕى داسه‌ هه‌رێم كوردستان ك نه‌ف له‌ سه‌رچه‌وه‌یل سروشتیه‌یلى وه‌ربگرید جوور غاز و نه‌فت و چاڵه‌یل نه‌فت هه‌ڵكه‌نید و نه‌فت كلبكاده‌ ده‌یشت وڵات، ك داهاته‌گه‌یشى چووده‌ بان داهات گشتى عراق فیدراڵ و له‌ورا دوباره‌ دابه‌ش كریه‌یده‌ بان عراقیه‌یل.

 

هه‌رێم كوردستان ئى گامه‌یل ده‌ستووریه‌ گرته‌سه‌ وه‌ر و فره‌یش وه‌ ئاگاداریه‌و ئاقڵانه‌ ریككه‌فتن ئه‌نجام داگه‌، سیاسه‌ت نه‌فت كوردستان وه‌شیوه‌یگ سه‌ركه‌فتگه‌ ك بویه‌سه‌ مایه‌ى نگه‌رانى حكوومه‌ته‌گه‌ى مالكى و شه‌هرستانى، ك هه‌ر یه‌یش له‌یوا كردگه‌ كیشه‌و گرفت ئه‌را كومپانیایه‌یل نه‌فت جه‌هانى دروس بكه‌ن ك ئیسه‌ له‌ هه‌رێم كوردستان كار كه‌ن، له‌هه‌مان وه‌خت سه‌ركه‌فتن سیاسه‌ت نه‌فت هه‌رێم كوردستان له‌یوا كردگه‌ ده‌وڵه‌تیگ جوور توركیا پشتگیرى له‌لى بكاو ئه‌ردوغان له‌ لێدوانیگ رووژنامه‌گه‌رى فره‌ وه‌ئاشكرا داكووكى له‌ سیاسه‌ت نه‌فت هه‌رێم كوردستان كرد و وت: وه‌ل سه‌رۆك ئه‌مریكا له‌بان مه‌سه‌له‌ى په‌یوه‌ندیمان وه‌ل هه‌رێم كوردستان قسه‌ كردمه‌و وتمه‌سه‌ پى حكوومه‌ت عراق سوزه‌مه‌نى نیه‌یده‌ حكوومه‌ت هه‌رێم كوردستان و هه‌ر له‌وه‌ر ئه‌وه‌یش حكوومه‌ت هه‌رێم ریككه‌فتنیگ ئه‌نجام دانه‌ ئه‌را وه‌رگرتن بترۆل له‌وه‌رانوه‌ر دابینكردن سوزه‌مه‌نى  ئه‌را هه‌رێم.

 

ئى قسه‌یل ئه‌ردوغانه‌ له‌لایگ تره‌و ئشاره‌ته‌ ئه‌را سیاسه‌ت حه‌كیمانه‌ى سه‌رۆك بارزانى له‌ ئاست دبلۆماسى، چوینكه‌ چه‌ن ساڵیگ وه‌رجه‌ ئیسه‌ قه‌یران قویلیگ له‌ناونى حكوومه‌ت توركیاو هه‌رێم كوردستان بوى، وه‌لى بارزانى تویه‌نست ئه‌و قه‌یرانه‌ نه‌یلیدو دووسایه‌تییگ بنیات بنه‌ید ك هه‌رێم كوردستان له‌ ئامانج گه‌ورا نزیكه‌و بكا.

 

یه‌یش بیجگه‌ ئه‌وه‌ك هه‌ر وه‌هه‌وڵ سه‌رۆك هه‌رێم كوردستان تویه‌نریا حكوومه‌ت توركیاو په‌كه‌كه‌ له‌ یه‌كترى نزیكه‌و بوون تا ئه‌و راده‌ ك توركیا دانیشتنه‌یلى وه‌ل ئیمرالى ده‌س وه‌پى بكاو ئیسه‌یش خه‌ریكه‌ ئاشتییگ نه‌ته‌وه‌یى له‌ توركیاو باكوور كوردستان بنیات نریه‌یدو، ئنجا گه‌شه‌كردن ئابوورى و دبلۆماسى، یه‌كیگه‌ له‌ ده‌سكه‌فته‌یل بارزانى ك له‌ماوه‌ى سه‌رۆكایه‌تیكردنى هاتنه‌سه‌ ده‌س.

 

ئبراهیم سه‌مین

ج . أ