ئەوەگ پیاو کورد وه‌پی نەکريا، ژنه‌يل ئەنجامی ئه‌يه‌ن؟

شفق نيوز

کورد خسته‌ هويرم ک چارەنويسی جوور فره‌ باوەت تر گرنگ کورد بێ ناونیشان مه‌نگه‌سەو. کۆنگرەی نەتەوەیی کورد، تا ئيسه‌ هەر ها بان زووانەيل و نەخريانەسە بوار جێوەجێکردن، چەنه‌ها ساڵە باس ئەی مەسەلەو ئەگەر بەسانی و نەوەسانی و بەشداربوين و بەشدارنەوين لایەنەگان ئەکريه‌ێد، ماوەیگ باسەگە  گەرموگوڕو ماوەیگيش کپه‌و ئەدێ، وه‌لی لە راسيا نەيمن پراکتیزەی ئەو قسەو باسه‌يلە بکريه‌ێ و هەنگاو جددی لەوبارەوە بنريه‌ێد، ئەگەر بەشێگ لە مه‌مه‌ره‌يل نەوەسين کۆنگرەیگ لەيجوورەيشه‌ دەس دەرەکی له‌تی بوود، ئەوه‌ بێگومان بەشێگیشی كه‌فێده‌ مل کورد خوه‌ی، مانای ئه‌وه‌سه‌ دوياجار ئيمە خوه‌مان کەمتەرخەمیمن لە گرده‌وکردن و توندوتۆڵکردن ناو ماڵ خوه‌مان.

 

بەسان کۆنگرەیگ لەيجوورە، وه‌مانای وەڕەسمی گرده‌وکردن و بەسانن جارێگ تر کورده‌یل گشت پارچەگانه‌ وە گوره‌ی ئه‌و قەرارە لە گشت بەشەیل کوردستان، پارت و لایەنەيل سیاسی و کەسایەتییەيل بەشداری له‌تی بکەن. لە گرده‌وبوينيگ لەيجوورە، بيجگه‌ له‌ ئاشنابوينمان وە ناسنامەو قەبارەی مللەت کورد، بڕێگ دەسکەفت مەعنەوی تريش وەدی ئەيه‌رن، ک گشتی لە هەیبەت و قورسايی کورد لە ناوچەگەو جه‌هان زیاتر ئەکا، چوينکە له‌تی وتارو ديديگ نوو دەسەجەمی کورد لەباره‌ی بارودۆخ ئمڕوو خريه‌ێده‌ روی و لە شان يەيش هەر بەشێگ کوردستان ک وەدڵنیاییەو بارودۆخ و هەلومەرج تایبەت وە خوه‌ی ديرێ، خوه‌ندنەوەی جیاو بەرنامەی جیا ئه‌رای دائەنريه‌ێد بيجگه‌ له‌ تۆخه‌وکردن پشتیوانی برایانە لە یەکتری. سوودەیل کۆنگرەی نەتەوەیی کورد فره‌ فره‌ن ک شايه‌د له‌ێرە نەتويه‌نیمن هەق خوه‌ی بيەیمنه‌پێ.

 

ئەگەر تماشای کۆنفرانس ئيجارەی ژنه‌يل یا ئەوەی وه‌رجله‌ يه‌ ک دو ساڵ له‌يه‌ووه‌ر لە دیاربەکر وه‌رپا کريا، ئەو بەشداربوين فراوان نوێنەره‌یل ژنه‌يل کورد لە هەر چوار پارچەو ئەمریکاو ئەوروپاو بڕێگ وڵات تريش وەدیئەکەیمن ک ئوميوار بويمن لە کۆنگرەی نەتەوەیی کورد بوينيمنه‌ی، هەمان ئەو بابەت و مەسەله‌يليشە قسە لەبارەيانه‌و کرياگەو ئەکريه‌ێد ك ئوميدوار بويمن لە کۆنگرە نەتەوەییەگە بخريه‌نە بەرنامەوە، وه‌لی دیارە ئەوه‌ چارەنويسێگ ناڕووشن ئه‌رای نويسرياس و يه‌یش له‌بان دەس ژنه‌یل کورد وە ئامانج رەسی.

 

دیارە سیاسەت و جەنگ، ململانی و ناکووکی، هەڵوێست حکوومەتەیل هاوسا رێ نيه‌ێد پیاوەيلمان کۆنگرەی نەتەوەیی رێکبخەن لە رووژگار ئيسه‌، خوو ئەگەر ئەوانەيش مه‌مه‌ر نەون، دیارە ژنه‌یل کورد لەی قۆناغە چالاکترو بوێرترن لە پیاوه‌يلمان، دی ئەگەر وه‌يجووره‌سە خاسترە چارەنويس کۆنگرەی نەتەوەییش بيەیمنە دەس ژنه‌یل کورد. وه‌ گوره‌ی ئه‌وه‌يش ک ئمڕوو ژنه‌یل کورد لە گشت پارچەگان و ئەوروپاو ئەمریکاو تاراوگە وەگشتی ئەزموون و توانای هاوتای پیاوه‌یليان ديرن لە سیاسەت و حوکمڕانی، ئەوه‌ پێشبینی ئەکەم ئەویش وە ئامانج بڕه‌سنيمن.

 

كاروان عه‌لی

 

ا. ج