پيشبينی

شفق نيوز

مالكی وه‌ دويره‌وخستن پيكهاته‌يگ سه‌ره‌كی له‌عراق ك ئه‌ويش سنيه‌يلن و دويای ئه‌وه‌يش ئابڵووقه‌ له‌بان هه‌رێم وه‌ بڕيگ مه‌هانه‌ی جوراوجوور و بی بنه‌ما هه‌ر بايه‌سه‌ چه‌وه‌ڕی ئی رووژه‌ بكا.

مالكی هه‌وڵ ئه‌وه‌ نه‌يا سوپايگ دامه‌زرنيد ك گشت پيكهاته‌يل عراق له‌تی به‌شداری بكا، به‌ڵكوو رووژ وه‌ڕووژ له‌ پيكهاته‌يل تر كه‌مه‌و كردياد وه‌تايبه‌ت له‌ كورد، ك وه‌گووره‌ی ده‌ستوور بايه‌سه‌ بوی ريژه‌ی كورد له‌سوپای عراقی ١٧% بوياتاد، وه‌لی ئه‌و ره‌سانه‌ی ٣% و بگر كه‌متريش، ئمجا وه‌يه‌يش سوپايگ كز دروسكرد و ره‌نگدانه‌وه‌ی پيكهاته‌يل تر عراق له‌تی ده‌رنه‌كه‌فت.

ئه‌را نموونه‌: ئه‌گه‌ر ريژه‌ی كورد له‌ سوپا له‌ناوچه‌يل ده‌يشت هه‌رێم جوور خوه‌ی بمه‌ندياد ك بڕيار درياويد، ئه‌وه‌ بيگومان ئه‌و ١٧% سوپا روی وه‌ڕوی بوينه‌وه‌ی خاسيگ له‌لی كه‌فتياده‌و نه‌يشتياد ئه‌و ناوچه‌يله‌ داگير بكريه‌يد جوور ئه‌وه‌ك ئمڕوو پێشمه‌رگه‌ی كوردستان وه‌ شانازيه‌و ئه‌كاده‌ی له‌و ناوچه‌يله‌.

مالكی له‌جيای ئه‌وه‌ك بزانيد ك مه‌ترسيه‌يل له‌ كاملاوه‌ ئه‌يه‌ن، هات فه‌رمانده‌يی دجله‌ وه‌رانوه‌ر هه‌رێم دروسكردو له‌يوا زانست ترۆريسته‌يل له‌ كوردستانه‌و روی له‌لی ئه‌كه‌ن، يه‌يش بيجگه‌ ئه‌و سياسه‌ته‌يل غه‌ڵه‌ته‌ ك وه‌رانوه‌ر هه‌رێم كوردستان ئه‌نجاميدا ك دويا غه‌ڵه‌ته‌يلی بڕين مووچه‌ی فه‌رمانبه‌ره‌يل كوردستان بوی.

مالكی ئه‌گه‌ر ته‌ماشای هيز پێشمه‌رگه‌ی كوردستان جوور به‌شيگ له‌ ريكخرياگ وه‌رگری له‌ عراق بكرديادو مووچه‌و هه‌وه‌جه‌يل ته‌ماميگ ئه‌رای دابين بكردياد، ئه‌وه‌ ئمڕوو تويش ئه‌و بار سه‌خته‌ ناتيادو تويه‌نستياد وه‌ ته‌مامی دڵنيا بوود له‌ سه‌قامگيری ئاسايشی ئه‌و ناوچه‌يله‌ ك ئمڕوو سوپا نه‌تويه‌نست ئه‌را ته‌نيا رووژيگيش وه‌رگه‌ری جه‌نگ له‌تيان بگريد.

وه‌ل ئه‌و هه‌مگه‌ راسييشه‌ هه‌رێم كوردستان وه‌رجه‌ ئی قاڵيشه‌ هوشداری دا به‌غدا، وه‌لی ئه‌وان گرنگی نه‌يانه‌ ئه‌و مه‌ترسيه‌و ده‌سپيشخه‌ری هه‌رێم پشتگووش خستن.

ئيسه‌يش دويا غه‌ڵه‌ت مالكی پيكهاتگه‌ له‌و داوا ك له‌ مه‌رجه‌ع شيعه‌ كرده‌سه‌ی ك فه‌توای جه‌نگ سنی بيه‌يد، يه‌يش غه‌ڵه‌تيگ تر كوشنده‌سه‌ و جه‌نگيگ بی كووتايی له‌ عراق به‌رپا ئه‌كا. مالكی تويه‌نستياد ئی مه‌سه‌له‌يل سياسيه‌ چاره‌سه‌ بكا، چوينكه‌ چاره‌سه‌ر گرفته‌يل ناو عراق وه‌ چاره‌سه‌ر سه‌ربازی و فه‌توا ناكريه‌يد و له‌ هه‌رێميشه‌و ئه‌و په‌يامه‌ هه‌ر له‌ زويه‌و ئه‌را به‌غدا كلكرياگه‌.

سه‌لام عه‌بدوڵڵا

ج . أ