گويڕيان ديموكراتی له‌عراق

شفق نيوز

مه‌رج و خواست سه‌ره‌كی هه‌س ، ك بيگومان له‌ناوه‌ڕوك پرووژه‌ی ديموكراسيه‌گه‌ خوه‌ی دانيه‌وڕيگ و ئه‌و مه‌رج و خواسته‌يليشه‌ ئه‌يانه‌ن : يه‌كم : ده‌سڵات هه‌وه‌جه‌ وه‌ نسبه‌يگ له‌شه‌رعيه‌تبوين و ديموكراتی ديريگ ، ئه‌وه‌نه‌ ك ملله‌ت له‌لی رازی بووگ يا وه‌ ره‌زامه‌نی زوورم روڵه‌يل ملله‌ت عراق بووگ ك ئه‌وه‌يش يه‌كم نزيكه‌وبوينه‌ له‌سه‌ركه‌فتن كرده‌وه‌ی گويڕانكاری وه‌ره‌و ديموكراتی . دويم : ئۆپۆزسيۆن ديموكراتی ، له‌ڕوی مه‌بده‌ئه‌وه‌ ديموكراتی وه‌بی ئۆپۆزسيۆن نيه‌وگ و كرده‌وه‌ی گويڕانكاری وه‌ره‌و ديموكراتی هه‌وه‌جه‌ وه‌ ئۆپۆزسيۆن ديريگ ك يه‌يش وه‌گووره‌ی قانوون و بنه‌مايه‌يل ديموكراتی خاسی و خراوی خوه‌ی ديريگ . سێيم : له‌ كرده‌وه‌ی گويڕيان وه‌ره‌و ديموكراتيبوين هه‌وه‌جه‌ وه‌چه‌ن ده‌سه‌يگ فكری ديموكراتی ديريگ ك له‌ناو ملله‌ت و جاده‌ی گشتی تواناو وجوود داشتووگ و ده‌سه‌يگ ك خه‌م ديموكراتی داشتووگ و گرينگ ياموهم نيه‌ خوه‌ی خه‌ريك كار سياسی بووگ و موهميش نيه‌ ئه‌و گرووپه‌ به‌شيگ بووگ له‌ ئۆپۆزسيۆن ، به‌ڵكوو ئۆپۆزسيۆن بووگه‌ مايه‌ی سه‌رخستن ديموكراتی و مقه‌يه‌تيكه‌ر ديموكراتی . چوارم : گويڕانكاری وه‌ره‌و ديموكراتی هه‌وه‌جه‌ وه‌ ملله‌تيگ ديريگ ك هاوسووز بوون وه‌ل فكره‌ی ديموكراتياو هويره‌وكردنيان وه‌ل پرووژه‌ی وه‌ره‌و ديموكراتيبوينا بگونجيه‌يگ . په‌نجم : پرووسه‌ی گويڕيان وه‌ره‌و ديموكراتی هه‌وه‌جه‌ی ها‌ ‌ئاشكراكردنيگ ديار و ئازاد يا وه‌مه‌رز ئازاديگ و له‌وه‌رچه‌وگرتن تاريخ و ئه‌و ئازادييشه‌ بايه‌سه‌ پله‌ وه‌پله‌ چويگ ، چوينكه‌ ئازادی ئه‌و نيه‌ ك ته‌نيا جنگ له‌وه‌ر بكريه‌يگ ك كه‌سه‌يليگ له‌يوا دويننه‌ی ، به‌ڵكوو ئازادی هويرو فكره‌و په‌يڕه‌وكردنه‌ ، ئمجا وه‌له‌وه‌رچه‌وگرتن تاريخ ، ئازادی دروسكرياگيگ دريژماوه‌س ك وه‌گووره‌ی وه‌زع ، گويڕانكاری تازه‌ ده‌يگه‌ ده‌سه‌وه‌ .

كاركردن له‌ناونی ئه‌و نزيكه‌وبوينيشه‌ بيگومان بووگه‌ ده‌سميه‌تده‌ر وهاوكار ئه‌و ئامانج گه‌ورا ، مه‌به‌س له‌و ئامانجيشه‌ بيگومان گويڕيانه‌ وه‌ره‌و ديموكراتی . وه‌هه‌ر حاڵ باس كه‌ن و ئويشن (بڕين هه‌زار ميل له‌ ميليگه‌وه‌ ده‌س كه‌يگه‌پی) و يه‌يش بيگومان قسه‌ی په‌سه‌ن و دروسيگه‌و هه‌مان وه‌خت ئه‌زموون ملله‌ته‌يل به‌ڵگه‌ن ئه‌را ئه‌و قسه‌ . دويای ئه‌وه‌يش ديموكراتی بووگه‌ رژيم فه‌رمانڕه‌وايی و بووگه‌ ده‌رخه‌ر ناكوكيه‌يل و بووگه‌ ريگه‌يگ ئه‌را ئاڵوگويڕكردن هوير وئه‌ڕای چوينه‌يل و بووگه‌ ره‌فتار ئه‌را چاره‌سه‌ر و ره‌سينه‌وه‌ له‌يه‌كتری ، ئمجا وه‌و شيوه‌يشه‌ بووگه‌ هووكاريگ و له‌ناونی حكوومه‌ت و ئۆپۆزسيۆن و گرووپه‌يل فكرمه‌ن و حزبه‌يليش پياده‌ كريه‌يگ ، دی ئيمه‌يش بايه‌سه‌ له‌بانمان له‌ڕی هووكاره‌يل ره‌سانن يا ئعلامه‌يله‌وه‌ وه‌ئاشكراو وه‌گشت دڵيگه‌وه‌ له‌يوا بكه‌يم ك مه‌ردم له‌لی بڕه‌سنيمنه‌وه‌و ئاگاداريان بكه‌يم و مه‌شقكردن ديموكراتيه‌ت هيز زووردار نيه‌يليگ له‌ناوچه‌گه‌و ئاوڕوی دكتاتۆر و تۆتاليتاری يا شموولی به‌يگ .