سه‌رباز شه‌به‌ح

شفق نيوز

هه‌رچه‌نی زويتريش زانريا ك گه‌ناته‌كاری له‌ ئداره‌و وه‌ڕيه‌وبردن وڵات و مه‌سه‌له‌ی دارايی وجوود ديريد، وه‌لی چه‌وه‌ڕی نه‌كريا وه‌و قه‌واره‌ی گه‌ورا بدێ. عه‌بادی ئويشيد: دوياى وشكانن و گه‌ردين ده‌ركه‌فت ك ته‌نيا له‌ناو چوار تيم سه‌ربازی عراقی ٥٠ هه‌زار سه‌رباز درووكانی وجوود ديريد ك مانگانه‌يان وه‌ ته‌مامی ئه‌رايان خه‌رج كرياگه‌.

ئمجا ئه‌گه‌ر ئاده‌ميزاد بزانيد مانگانه‌ی ئی سه‌ربازه‌يله‌ له‌ مليۆن ونيميگ كه‌متر نيه‌، ئه‌وه‌ مانای ئه‌وه‌سه‌ مانگانه‌ ٥٠ مليار ئه‌را سه‌رباز شه‌به‌ح خه‌رج كرياگه‌، ك له‌لايه‌ن ئامر فه‌وج و ئامر ليواو پله‌ باڵايه‌يل تر دزرياگه‌و خورياگه‌، ك ساڵانه‌ ته‌نيا ئه‌را ئه‌و چوار تيم سه‌ربازيه‌ ٦٠٠ مليار خه‌رج كرياگه‌!!

ئه‌گه‌ريش له‌يوا هساوی بكه‌يم عراق ١٧ تيم ديريد و هه‌ر وه‌و ريژه‌يشه‌ هساو سه‌ربازه‌يل درووكانی ئه‌رای بكه‌يم، ئه‌وه‌ له‌ناو سوپای عراق وه‌و هساوه‌ ٢٢٥ هه‌زار سه‌رباز شه‌به‌ح وجوود ديريد ك مووچه‌يان هه‌ر وه‌و به‌راورده‌ ئه‌كاده‌ مانگی ٢٢٥ مليار دينار و ساڵانه‌يش وه‌و به‌راورده‌ ئه‌كاده‌ ٢٧ مليار، ئه‌گه‌ر وه‌ شماره‌يش بنويسيمنه‌ی ئه‌كاده‌ ٢،٧٠٠،٠٠٠،٠٠٠،٠٠0 مليار، ك خه‌رج كرياگه‌ ئه‌را سه‌رباز جوور ئه‌وه‌ك عه‌بادی ئويشيد فه‌زايی!

ئی بڕه‌ پويل خه‌ياڵييشه‌ له‌ وه‌ختيگ خه‌رج كرياگه‌ ك حكوومه‌ت عراقی بودجه‌ی كوردستان و مووچه‌ی فه‌رمانبه‌ره‌يل بڕی. ئيسه‌يش ئاده‌ميزاد له‌و نهێنيه‌ ئه‌ڕه‌سيده‌و ك له‌وه‌رچه‌ ئه‌و سوپا وه‌رگه‌ی چه‌ن رووژيگ ريكخرياگ ترۆريستی داعش نه‌گرت، چوينكه‌ له‌ سوپايگ ئه‌گه‌ر ٢٢٥ هه‌زار سه‌رباز ناديار بدێ ئه‌ی كی له‌وه‌رانوه‌ر داعش جه‌نگ بكردياد و وه‌رپرسه‌يليانيش ك وه‌و گه‌ناته‌كاری بی وينه‌ بوينه‌ خاوه‌ن ئه‌و سامان گه‌ورا دی ئه‌يانيش چوين نه‌وان و خوه‌يان و پويله‌گه‌يان قورتار ناكه‌ن.

له‌ڕاسی ئه‌يه‌ هه‌ر گه‌ناته‌كاری جاشه‌كانی ناو خوه‌مان ئه‌خاده‌ هويرمان ك سه‌رده‌م به‌عس ئه‌يانيش ك فه‌وجيگ دامه‌زرانيان مانگانه‌ی هه‌زار جاش وه‌رگرتيان و راسيه‌گه‌يشی خاوه‌ن چه‌ن جاشيگ بوين، وه‌لی سه‌رۆك جاشه‌يل مانگانه‌ی فه‌وج ته‌ماميگ وه‌رگرتيان و له‌ژير زه‌وی كه‌ڵه‌كه‌ی كرديان، ئه‌وانه‌ جاش بوين ناهه‌قيان نه‌وی، وه‌لی ئه‌يانه‌ی مالكی سه‌رباز نيشتمانی بوين، ئه‌راچه‌ بوينه‌ شه‌به‌ح؟.

سه‌لام عه‌بدوڵڵا

ج . أ