ئازادیخوازه‌یل كیین؟

شفق نيوز

 

سفه‌تیگ سه‌ره‌كى ئازادیخوازه‌یل ئه‌وه‌سه‌ ك گشت جووره‌ سته‌میگ ره‌ته‌و كه‌ن، ماناى ئه‌وه‌سه‌ ئازادیخواز ئاشق ژیانه‌، وه‌و خاتریشه‌ ئاماده‌س ژیان خوه‌ى له‌ده‌س بیه‌ید ئه‌را وه‌دیهاوردن ئازادى، ئنجا له‌یرایش سفه‌ت فره‌ گرینگ كه‌سایه‌تى ئازادیخواز ده‌ركه‌فید ك ئه‌ویش سفه‌ت خود قوربانیكردنه‌.

له‌ڕاسى ئه‌وه‌ك كه‌سایه‌تى ئازادیخواز تیه‌ریده‌ به‌رهه‌م، سته‌مه‌، ئنجا ئه‌و سته‌میشه‌ له‌هه‌ر بوار و ره‌نگیگ بوود، ئازادیخوازه‌یل ئه‌و كه‌سه‌یله‌نه‌ ك تویه‌نن ته‌نیا وه‌ یه‌ك وشه‌ یا وه‌یه‌ك هه‌ڵویست كوومه‌ڵگایه‌یل خوه‌یان و گشت جه‌هان بارنه‌ له‌رزه‌ و سه‌رسام بكه‌ن، وشه‌و هه‌ڵویست ئاده‌میزاد ئازادیخواز تاریخ دروس كه‌ن.

ئازادیخوازه‌یل راسكانى ئه‌وه‌نه‌ خوه‌شیان تیه‌ید له‌ ئازادى و دادگه‌رى، ك هه‌ر وه‌ختیگ ده‌سڵاتیش بكه‌فیده‌ ده‌سیان نیه‌تویه‌نن بوونه‌ سته‌مكار و زووردار، هه‌ڵبه‌ت له‌ فه‌رهه‌نگ ژیان ئازادیخواز راسكانى سته‌م و سته‌مكارى وجوود نه‌یرید و هویچ وه‌ختیگ ئازادیخواز نیه‌وده‌ سته‌مكار جوور ئه‌وه‌ك هویچ وه‌ختیگ سته‌مكار نیه‌وده‌ ئازادیخواز.

ئیمه‌ زانیم ك فره‌جار ئازادیخواز و سته‌مكاره‌یل درووزن خوه‌یان وه‌ ئازادیخواز راسكانى ده‌نه‌ قه‌ڵه‌م و تواناى ئه‌وه‌یش دیرن وه‌ى ناوه‌ مه‌ردم چه‌واشه‌ بكه‌ن. وه‌ل ئه‌وه‌یشا له‌ى دونیا ئى جووره‌ سته‌مكار و ئازادیخوازه‌یل درووزنیشه‌ وه‌ فره‌یى وجوود دیرن و هه‌میشه‌ جوور چه‌كیگ كاریگه‌ر له‌وه‌رگ دروشمه‌یل ئازادیخوازى خوه‌یان شارنه‌و، ئنجا له‌یرایش خوه‌شترین دروو ك هه‌میشه‌ ئه‌وان وه‌ل مه‌ردم خوه‌یان كه‌نه‌ى دروو ئازادى و دیموكراسیه‌.

ئنجا تویه‌نیم بویشیم له‌ناونى كه‌سه‌یل ئازادیخواز و سته‌مكار ده‌رئه‌نجام و سفه‌ته‌یل خاس و خراویش هه‌س جوور ئازادى و سته‌م، له‌ناوى ئى دووانه‌یشه‌ جه‌نگ دژ ئازادى و جه‌نگ دژ سته‌میش هه‌س.

وه‌ هه‌رحاڵ ئازادیخوازه‌یل له‌وه‌ر خاتر ئازادى جه‌نگ كه‌ن و سته‌مكاره‌یلیش دژى ئازادى جه‌نگ كه‌ن، هه‌ر له‌وه‌ر ئه‌وه‌یش وه‌رده‌وام دوینید سته‌مكاره‌یل و دوشمنه‌یل ئازادى تومه‌ت تێكداین خستنه‌سه‌ پاڵ وه‌رگریكه‌ره‌یل له‌ ئازادى، یه‌یش راسه‌، چوینكه‌ هه‌میشه‌ ئازادیخوازه‌یل قه‌ڵاى سه‌خت سته‌م رمنن.

به‌ختیار محه‌مه‌د

ج . أ