شه‌هيد (عه‌لی جه‌عفه‌ر)يش ڕه‌سيه‌ كاروان شه‌هيده‌يل جايه‌ڵ و جوان كورد به‌غدا

شفق نيوز

له‌كاره‌سات ناخوه‌ش و دڵته‌زن ، په‌رچه‌م بی وه‌فايی ها وه‌ده‌سيه‌وه‌ ، كليل ده‌روازه‌ی خوه‌شی وه‌رده‌وام نيه‌يليگه‌ لای كه‌س ، كوتوپڕ خه‌وه‌ر دڵته‌نگی ڕه‌سنيگ و شين و واوه‌يلا خه‌يگه‌ ماڵه‌يل و دڵه‌يل ده‌يگه‌ ژان و حه‌سره‌ت كاڵه‌وه‌ ، خوه‌شيه‌گه‌ی هه‌ر تاويگه‌و ده‌رده‌سه‌ريه‌گه‌ی بی شماره‌ .

عه‌لی جه‌عفه‌ر سويه‌ره‌مه‌يری ، كوڕه‌ تاقانه‌گه‌ی ١٨ ساڵان له‌نه‌مام عومری زه‌رده‌خه‌نه‌ی خوه‌شی و تام جايه‌ڵيه‌گه‌ی برده‌ دونيايگ تر و نه‌ڕه‌سيمنه‌ ده‌زويرانی و سويره‌گه‌يا ك باوگ و داڵگه‌ جه‌رگ سزيايه‌گه‌ی وه‌ ته‌مای ئه‌وه‌ بوين له‌ئاينده‌ی نزيكيگ سازده‌وڵ ئه‌ڕای بنه‌ن و سه‌رچووپی خڕ بيه‌ن و هه‌ڵپه‌ڕه‌كه‌ی خوه‌شيگ ئه‌ڕای بكه‌ن و شاواز خوه‌شی له‌تی بكيشن و له‌ناو ژيان هاوسه‌ری ماڵيگ وه‌دڵ خوه‌ی ئه‌ڕای بڕازننه‌وه‌ ، وه‌لی وه‌داخ فره‌يگه‌وه‌ كاكه‌ عه‌لی گيان خه‌يوه‌ت پرسه‌و ماته‌مينی هه‌ڵوژان و جوير كه‌موته‌ريگ له ‌باڵه‌فڕه‌ی خوه‌شی كه‌فت ماڵئاوايی ناوه‌ختيگ له ‌خوه‌يشكه‌يل بی برای و داڵگه‌ جه‌رگ سزيايه‌گه‌ی كرد و ، وه‌ چپه‌يگه‌وه‌ وته‌ باوگه‌ دڵ شكه‌سته‌گه‌ی بنيشه‌خه‌ير باوه‌ گيان  ، ئيواره‌ی ڕووژ جومعه‌ی ٢٣ی نيسان وه‌كاره‌ساتيگ جه‌رگبڕ كووتايی وه‌ دويا هه‌ناسه‌ی ژيانی هات و له‌ ته‌قينه‌وه‌يگ تيرۆريستی كه‌فته‌ وه‌ر مه‌وج مردن و ماڵئاوايی يه‌كجاری له‌ خێزان و قه‌وم و كه‌س و كار و هاوڕيه‌يل خوه‌ندگای كرد ، وای ئه‌جه‌ڵ له‌ناكاو برده‌ی و باوه‌ڕنامه‌ی (شه‌هيد)ی وه‌رگرت و    ئاره‌زووه‌يل ژيانی وه‌چه‌و نه‌ی و مردنی بويه‌ سه‌به‌ب ته‌واو نه‌كردن خوه‌ندنی له‌ په‌يمانگاو دروسنه‌كردن كه‌ژاوه‌ی هاوسه‌رگيری و زوی هيشته‌مانه‌ جی .

وه‌ ئارام بخه‌ف نازاره‌گه‌ی دڵ

مه‌رگ هه‌ر وه‌ختی هات له‌كه‌س نيه‌كه‌ی سڵ

باڵ چه‌و به‌رزه‌و كه‌ بنوڕه‌ حاڵم

بزان چ شينيگ خستيده‌‌ ‌ماڵم

عه‌لی جوانه‌مه‌رگ ، يه‌كيگه‌ له‌بنه‌ماڵه‌ی (خاڵو موباره‌ك) ره‌حمه‌تی و شوون ژيانيان ناوچه‌ی خانه‌قی بويه‌ تا وه‌ختيگ رژيم به‌عس ‌وه‌ زوور له‌زێد و ماوای خوه‌يان ده‌ريان كرد و ئاواره‌ كريان . بيگومان ئه‌و بنه‌ماڵه‌ تا ئيسه‌يش هه‌ر له‌بان ريڕه‌و كوردايه‌تی خوه‌يان وه‌رده‌وامن . هه‌زاران هه‌زار سڵام له‌گيان پاك و بيگه‌ردد ئه‌ی ڕووڵه‌ تاقانه‌گه‌ی باوه‌ و ئه‌ی وه‌ناز په‌روه‌رده‌و خوه‌شه‌ويسه‌گه‌ی هه‌ميشه‌ له‌ياد ، خودا وه‌لداو به‌هه‌يشت شووند بوود.