گوزارش نادروس

شفق نيوز

له‌ فه‌رهه‌نگ تازه‌ وه‌ى شیوه‌ ئى چه‌مكه‌ وه‌پیمان ئاشنا كریه‌یگ و ئویشیگ ناسیۆنالیزم له‌ وشه‌ى یا كه‌لیمه‌ى ناسیۆن بریاگه‌ ك ماناى نه‌ته‌وه‌ ده‌یگ و گوزارش نه‌ته‌وه‌په‌ره‌سى كوورانه‌یگ ڕه‌سنیگ و نیه‌وگ ئه‌یه‌ وه‌ نیشتمانپه‌رسى و جه‌ختكردن له‌بان هه‌ق نه‌ته‌وه‌ هساو بكه‌یم. له‌ى فامستنه‌ ناسیۆنالیزم یه‌كیگه‌ له‌ شیواز ئایدۆلۆژى و سیاسى بورجوازى و ناوه‌ڕوكه‌گه‌ى وه‌ لویبه‌رزى و سووك ته‌ماشاكردن گشت نه‌ته‌وه‌یل تر تیه‌یگ ، وه‌ل ئه‌وه‌یشا مه‌ردمانیگیش ئویشن دیارده‌یگ سیاسیه‌، وه‌لى فره‌جار دوینیم بنه‌ماو پایه‌یلى له‌بان فامستنیگ تایبه‌ت دانریه‌یگ ئه‌را كلتوور و به‌خشین مانایگ تایبه‌ت وه‌ كلتوور.

ئه‌وه‌ك ئیمه‌ له‌یرا باسى كه‌یم خوه‌شه‌ویسى نیشتمانه‌، ناسیۆنالیزم ئه‌گه‌ر بایگ و ماناى نه‌ته‌وه‌په‌رسى كوورانه‌ به‌یگ ، ئه‌وه‌ تویه‌نیم بویشیم له‌ ئایدۆلۆژیایگ فاشیزم و نازیسزم و به‌عسیزم په‌یا بویه‌، له‌وه‌ر ئى چه‌مكیشه‌ مشتومڕ فره‌یگ ها له‌بانى ئه‌را ناسینى، ئمجا تویه‌نیم بویشیم: ماناى خوه‌شه‌ویسى و ریزگرتن ئه‌و خاكه‌ ده‌یگ ك له‌تى له‌دایگ بویده‌و خوه‌د و دایگ و باوگ و هاوڕه‌گه‌زه‌یلد له‌بانى ژیاینه‌، ك بایه‌سه‌ ته‌ماشاى نه‌ته‌وه‌یل تر وه‌چه‌و حورمه‌ته‌وه‌ بكه‌یم، نه‌ك وه‌ناو نه‌ته‌وه‌و مقه‌یه‌تیكردن نه‌ته‌وه‌یل تر بچه‌وسنیده‌وه‌ جویر ئه‌وه‌ك له‌ سه‌رده‌م رژیم به‌عس له‌ژیر دروشم یا شعار (وحده‌ – حریه‌ – اشتراكیه‌)و مقه‌یه‌تیكردن له‌ عرووبه‌، سیاسه‌ت له‌ناوبردن نه‌ته‌وه‌ داناو ئه‌وه‌ بوى وه‌گشت جووریگ كورد چه‌وسانه‌وه‌، یا ئه‌وه‌ك له‌ ده‌وڵه‌ته‌یل هاوسا دژ نه‌ته‌وه‌ى كورد كه‌فتیاگه‌ وه‌رچه‌و، ك دژ زووان و جنگ  كوردى بوین و زووانه‌گه‌ قه‌یه‌غه‌ كردوین له‌وه‌ر خاتر ره‌گه‌ز و نه‌ته‌وه‌ى خوه‌یان، وه‌لى ئه‌وه‌ك مایه‌ى هه‌ڵویست وه‌رگرتنه‌، ئه‌وه‌سه‌ ك بڕیگ قه‌ڵه‌م بى وژدان ئى چشته‌یله‌ خه‌نه‌ پاڵ ئسلام، یا ئویشن ئسلام و سه‌لاحه‌دین ئه‌یوبى هووكاریگ بوینه‌ ئه‌را دروسبوین ده‌وڵه‌ت كوردى!!!

هه‌ر له‌وه‌ر ئه‌وه‌یش ئه‌گه‌ر بایم و تاریخ سه‌ڵاحه‌دین ئه‌یوبى بخوه‌نیمنه‌وه‌، چشتیگ نه‌ویه‌ وه‌ناو هس نه‌ته‌وایه‌تى و سه‌ڵاحه‌دینیش له‌وه‌ گه‌وراتر هویره‌و كردگه‌و ئه‌ویش دروسكردن ده‌وڵه‌تیگ ئسلامى بویه‌و بیجگه‌ ئه‌وه‌یش له‌و سه‌رده‌مه‌ چشتیگ نه‌ویه‌ وه‌ناو چه‌وساننه‌وه‌ى نه‌ته‌وه‌و ملله‌ت كورد. سه‌ڵاحه‌دین خاوه‌ن حورمه‌ت بویه‌و حورمه‌ت فره‌یگیش له‌لى نریاگه‌، ئنجا ئه‌گه‌ر شیه‌وكردنیگ له‌ى وه‌خته‌ ئه‌ڕاى بكه‌یم یا وه‌چه‌و ئیسه‌وه‌ ته‌ماشاى ئه‌و سه‌رده‌مه‌ بكه‌یم، ئه‌وه‌ تویه‌نیم بویشیم: ده‌وڵه‌تیگ كوردى دروس كردگه‌ له‌بان خاكیگ تر نه‌ك له‌بان خاك كوردستانیش، ك ئه‌ویش مسره‌و زوورم كاروه‌ده‌سه‌یل ئه‌و ده‌وڵه‌ته‌ كورد بوینه‌، هه‌ر له‌وه‌ر ئه‌وه‌یش مه‌ردمانیگ هه‌ن وه‌غه‌ڵه‌تا چینه‌ ك ئسلام وناسیۆنالیزم  وه‌ ماناى خوه‌شه‌ویسیه‌گه‌ى نیشتمان تیه‌یگ ، ك یه‌یش دوچشتن چه‌واشه‌ى یه‌كترى.

نویسه‌ره‌یلیگ وه‌ك ئه‌ندرسۆن و گیڵنه‌ر ئویشن: وه‌ختى ناسیونالیزم له‌دایگ بووگ، دین كزه‌و بووگ. وه‌ختیگیش مۆدێرن و كلتوور تازه‌ له‌دایگ بووگ، دین كزه‌و بووگ. ناسیونالیزم شوون دین گریگ و دینیش بووگه‌ پیرووزى، وه‌لى كه‌سه‌یلیگ له‌ خوه‌یانا ناسیونالیزم بووگه‌ دین و گریه‌ى ده‌نه‌ پیشه‌سازى و دینیش گریه‌ ده‌نه‌ كشتوكاڵه‌وه‌.

زانایه‌یل تر وه‌ك(پیته‌رڤان دێرفیر) ره‌خنه‌ له‌ گیڵنه‌ر گریگ و باوه‌ڕى له‌یواسه‌، ك دین و ناسیونالیزم په‌یوه‌ندى وه‌یه‌كه‌وه‌ دیرن، ئنجا لاى ئه‌و نویسه‌ره‌ مه‌گه‌ر به‌عزه‌ جاریگ جموجویلیگ بوینیده‌وه‌ په‌یوه‌ندى وه‌ دینه‌وه‌ نه‌یاشتووگ. هه‌ر له‌وه‌ر ئه‌وه‌یش ئویشیم گوزارش نادروس زه‌حمه‌ته‌ باوه‌ڕ وه‌پى بكریه‌یگ .