مناڵه‌یل كورد كه‌موته‌ره‌یل قوربانى له‌ ئاسمان

شفق نيوز


ڕوژێگ سایق شه‌فه‌ڵه‌یل ك هاوڵاتیێگ عه‌ره‌ب بوێ ، خوه‌ێ و شه‌فه‌ڵه‌گه‌ێ وه‌زور جور سه‌رجه‌م ملله‌ت عراق له‌ لاێه‌ن ده‌زگا ئه‌منیه‌گان ڕژیم ئه‌ڕا به‌شدارى كردن وه‌زور له‌ جه‌نگ ئه‌ڕا ناوچه‌یل كوردستان كل كریا و سه‌دان ژن و مناڵ و ریش چه‌رمگ و جوان كورد وه‌چه‌و خوه‌ێ دی ك له‌ ئوتومبیله‌ێل سه‌ربازى تێه‌رنه‌یانه‌ خوار و وه‌باڵ به‌سیاێ خه‌نه‌یانه‌ ناو چاڵێگ گه‌ورا تا فه‌رمان گولله‌ وارانیان بدریه‌ێ.
ئه‌وه‌گ له‌ یاد ئه‌و سایق شه‌فه‌ڵه‌ هێمانێ مه‌نگه‌ و له‌ هوێرێ نیه‌چوگ ئه‌وه‌سه‌ ، ك له‌ ناو یه‌كێگ له‌ سه‌یاره‌ سه‌ربازیه‌گان ژنێگ ئه‌نفال كریاگ مناڵێ په‌ێا بووگ و هویچ له‌ وه‌رده‌س نه‌ێرێ تا مناڵه‌گه‌ بپێچێگه‌و ، ته‌نیا دو سێ كوته‌ په‌ڕو كوێه‌نه‌ له‌ قه‌ێ سه‌یاره‌گه‌ بوێ ك وه‌ده‌م ژانه‌وه‌ ، مناڵه‌گه‌ وه‌ وه‌پێ پێچاوه‌ و ئمجا وه‌بێ ده‌نگ وه‌ده‌م ژانه‌وه‌ و له‌ وه‌ختێگ هه‌مراێ مناڵه‌گه‌ خه‌ڵتان له‌ خوێن ناوزگ داڵگ بوێ ، داڵگه‌گه‌ گیان سپارد و ته‌نیا گوناێ ئه‌و مه‌ردمه‌ ئه‌وه‌ بوێ ك خودا كورد خه‌ڵقیان كردوێگ.
له‌ شوون ئه‌وه‌گ سه‌ربازه‌گان تاوانه‌گه‌ ئه‌نجامدان و سایق شه‌فه‌ڵه‌گه‌یش سه‌رقاڵ شاردنه‌وه‌ێ لاشه‌گان بوى َ ك به‌عزێگیان هه‌مراێ گیانیان ده‌رنه‌چوێگ و وه‌ده‌م گیانه‌وه‌ جوێله‌ كردیان ، یه‌كێگ له‌ تاوانباره‌ێل ، ده‌نگ وه‌قه‌ێ مناڵێگ ژنه‌فێگ ك وه‌ده‌م شه‌فه‌ڵه‌گه‌وه‌ وه‌ره‌و ئاسمان به‌رزه‌و كرێه‌ێ و نه‌مردێه‌ ،ده‌س وه‌جێ چوگه‌ لای فه‌رمانده‌گه‌ێ ك نه‌قیبێگ بوێه‌ و له‌ لێ پرسێگ ك چه‌ وه‌مناڵه‌ كورپه‌گه‌ بكه‌ێگ ، ئه‌وێش فه‌رمان زینگ وه‌چاڵ كردن مناڵه‌گه‌ ده‌ێگ و سایق شه‌فه‌ڵه‌گه‌ ناچار بووگ قه‌پێگ خوه‌ڵ بكه‌ێگه‌ ملیا.
ئه‌و مناڵه‌ هه‌مراێ نه‌زانستیاد ك كورده‌ و هه‌مراێ زوان وه‌كوردى نه‌چه‌كانوێگ و ته‌نانه‌ت داواێ ماف ڕه‌واێ خوه‌یشێ نه‌كردوێگ ك وه‌ل سه‌دان قوربانیتر زینگ وه‌چاڵ كریا.
بێ گومان پروسه‌ێ به‌دناو ئه‌نفال و جینوساید كردن كورد ك له‌ لاێه‌ن رژیمه‌وه‌ ناوێ نریا "ئه‌نفال" له‌ كه‌س شاراوه‌ نییه‌ و ئامانج رژیم له‌ ناوچگ له‌و پروسه‌ ، دیار و ئاشكرا بوێ ك ئه‌ویش له‌ ناوبردن ملله‌ت كوردستان بوێ و خاسترین به‌ڵگه‌یش ئه‌ڕا ئه‌و قسه‌مانه‌ ، ئه‌و هه‌زاران لاشه‌سه‌ ك له‌ گوڕه‌ ده‌سه‌جه‌میه‌گان په‌یا كریانه‌.
له‌ێ دوێاخره‌ له‌ ناوچه‌ێ "چه‌مچه‌مال" روفات سه‌د مناڵ په‌یا كریا ك له‌ ئه‌نجام پروسه‌ێ به‌د ناو ئه‌نفال گیانیان له‌ ده‌س دانه‌ ، ك ئه‌و مناڵه‌یله‌ له‌ خانه‌واده‌یان جیاوه‌ كریانه‌ ودوێاخر له‌ ورسگى و تیه‌نگى و نه‌خوه‌شى گیان سپاردنه‌.
 ته‌رم شه‌هیده‌یل بوێچگ وه‌ل خانه‌واده‌یلیان نه‌گ ته‌نیا له‌ خاك كوردستان ، به‌ڵكم له‌ گشت ناوچه‌یل عراق بڵاوه‌و كریاس ، ئه‌ڕا نمونه‌ له‌ شار سه‌ماوه‌ هه‌ڵكه‌فتگ له‌ 230 كیلومترى باشور خوه‌ر هه‌ڵات به‌غدا ، گوڕسان ده‌سه‌جه‌میێگ په‌یا كریا ك نزیكه‌ێ 1500 لاشه‌ له‌تێ بوێه‌.
لێكوڵه‌ره‌یل ئوێشن یه‌كێگ له‌ جومجومه‌گان هن كه‌ێوانوێگ بوێه‌ و یه‌كێگیانیش هن مناڵێگ بوێه‌ ك وه‌یلكانه‌گه‌یشێ له‌ شانێ په‌یا كریاس ، لاشه‌ێ دوێه‌تێگیش په‌یا كریاس ك جانتاگه‌ێ وه‌ده‌سێه‌و بوێه‌ . ئه‌و گوڕسانه‌یل ده‌سه‌جه‌میه‌ ك روفات قوربانیه‌یل كورد له‌ گشت ته‌مه‌نه‌گان له‌تێان په‌ێا كریاس ، خاسترین شایه‌تن له‌ بان دڕنده‌یى ڕژیم سه‌دام.
ژماره‌ێ قوربانیه‌یل تاوان جینوساید كردن ملله‌ت كوردستان عراق وه‌ 182 هه‌زار كه‌س مه‌زه‌نه‌ كریاس ، و ئه‌و ژماره‌ له‌ ئه‌نجام په‌یا كردن گوڕسانه‌یل تازه‌ ڕوێ له‌ زیاێ بوون كه‌ێگ و ڕوژ وه‌ ڕوژ ڕاسیه‌گان ئه‌وه‌ سابت كه‌ن ك ڕژیم گشت گیانداره‌یل و دار و دره‌خت و چه‌م و كانیاوه‌یل كوردستان كردێه‌سه‌ ئامانج و ته‌نانه‌ت مناڵه‌یل ك بوێنه‌ كه‌موته‌ره‌یل سه‌وز ئاسمان ، قه‌باره‌ێ قوربانیه‌یل ملله‌ت كوردستان خه‌نه‌ یادمان.
 له‌كوتایى مه‌نگه‌ بوێشیم ك هاوده‌ردى وه‌ته‌نیا به‌س نییه‌ ئه‌ڕا ئارامه‌و كردن ژانه‌گان ، به‌ڵكم باێه‌د كارێگ ڕاسه‌قینه‌ ئه‌ڕا پاشمه‌نه‌ێ قوربانیه‌ێل بكرێه‌ێ ك تا ئمڕو نه‌كریاس.


زوهێر كازم عه‌بود
ج  ك