چوين باوه‌ڕ وه‌ به‌غدا بكريه‌يد؟

شفق نيوز

كورد وه‌رجه‌ گشت لايه‌نه‌يل تر له‌ نياز و مه‌رام به‌غدا ره‌سيه‌وه‌و ده‌نگ به‌رزه‌و كرد، سه‌رۆك مه‌سعود بارزانی وه‌رجه‌ دو ساڵ وت: دی ناتويه‌نيم وه‌ل ئی ئاراسته‌ی مه‌ترسيدار سياسيه‌ مامڵه‌ بكه‌يم ك عراق وه‌ره‌و ديكتاتۆريه‌ت ئه‌وه‌يدو له‌ ئاكاميش ئه‌دێده‌ هه‌ڕه‌شه‌ ئه‌را بان دوياڕووژ ئی وڵاته‌، يه‌يش سه‌ره‌تای ئاگاداركردنه‌وه‌ی گشت لايه‌نه‌يل بوی، ك جی داخه‌ ئه‌و وه‌خته‌ بڕيگ له‌ لايه‌نه‌يل مه‌سه‌له‌گه‌ وه‌ مه‌سه‌له‌يگ شه‌خسی زانستن و ده‌رفه‌ت دانه‌ نوری مالكی سه‌رۆك وه‌زيره‌يل دريژه‌ بياده‌ سياسه‌ت و مه‌رام خودی و ئه‌ڕای چوينه‌يل ته‌كڕه‌وه‌يه‌گه‌ی، ك دوياخريش ده‌ركه‌فت كار ره‌سيه‌ كووراو ئيسه‌يش عراق له‌گشت وه‌ختيگ فيشتر وه‌ مه‌ترسی و تون وتيژی ئه‌چێد.

له‌گشت ئه‌و گامه‌يله‌ مه‌ترسيدارتر ئه‌وه‌سه‌ ك وه‌ چه‌واشه‌ی ده‌ستوور عراق و به‌ڵگه‌نامه‌يل ناوده‌وڵه‌تی ماف ئاده‌ميزاد و وه‌بڕيار نوری مالكی مووچه‌ی كارمه‌نده‌يل كوردستان و بودجه‌ی هه‌رێم كوردستان بڕياو مالكی باوه‌ڕی ئه‌وه‌ بوی كاردانه‌وه‌يگ مه‌ردمی له‌ كوردستان په‌يا ئه‌دێد له‌ دژ ده‌سڵاتداره‌يل هه‌رێم وه‌تايبه‌ت پارت ديموكرات كوردستان له‌سای بڕين مووچه‌و دی ئه‌و وه‌خته‌ خوه‌ی جڵه‌و رويداگه‌يل ئه‌گرێده‌ ده‌س، وه‌لی وه‌ چه‌واشه‌ی ئی سياسه‌ته‌ كيشه‌گه‌ قويلتره‌و بوی و كوردستان وه‌ يه‌كجاری ده‌رفه‌ت ئه‌وه‌ په‌يا كرد وه‌ئاشكراو فه‌رمی نه‌فت خوه‌ی سه‌روه‌خوه‌يانه‌ بفرووشيد.

بايه‌سه‌ ئه‌وه‌يش له‌ هوير نه‌وه‌يم ك له‌ڕوی ماف ئاده‌ميزادو ده‌ستوور عراقيشه‌و ئی بڕيار مه‌ترسيدار به‌غدا كرده‌وه‌ی رخه‌وبه‌ريگه‌و برين نان مه‌ردم و هاووڵاتيه‌يليش هويچی له‌ جينۆسايد كه‌متر نيه‌.

له‌يرا مه‌سه‌له‌ی فريه‌ گرينگ ئه‌وه‌سه‌ ك ئايا هه‌رێم كوردستان چوين له‌سای سياسه‌ت سزاداين و بڕين بودجه‌ بتويه‌نيد متمانه‌ وه‌ به‌غدا وه‌ بكا؟ ئه‌گه‌ر له‌ی حاڵه‌تيشه‌ متمانه‌ وه‌ به‌غدا بكريه‌يد ئه‌وپه‌ڕی نه‌فامستنه‌ له‌ سياسه‌ته‌، مانای ئه‌وه‌سه‌ كوردستان جوور ميه‌يگ بی مه‌ژگ ئه‌چێده‌ وه‌رده‌م گورگ و باوه‌ڕ وه‌خوه‌ی ئه‌يه‌ريد ك جه‌ناب گورگ ئه‌فه‌ندی بی ئازار بی ئه‌وه‌ك گيانی وه‌ ئازاره‌و ده‌ربكا، بكاده‌ی خوه‌راكيگ چه‌ور ئه‌را خوه‌ی، ئمجا ئايا باوه‌ڕ وه‌ گورگ ئه‌كريه‌يد به‌زه‌يی وه‌ ميه‌يگ بايد له‌وه‌ختيگ ئه‌و ميه‌ له‌ له‌وه‌ڕگايگ سه‌وز و گه‌شه‌كردگ و ئارام خوه‌ی چاخ كردويدو گورگيش له‌ بياوانيگ بی نه‌يچير و دوير له‌ نان وه‌ ورسگی هويره‌و ئه‌كاد و ئه‌ژيه‌يد؟.

هه‌ر وه‌و خاتريشه‌ كه‌سه‌يل فريه‌يگ ئاگادارن له‌وه‌ك نوری مالكی ئه‌كاده‌ی هويچ متمانه‌يگ له‌ ناونی هه‌ولێر و به‌غدا نه‌يشته‌سه‌و، وه‌ل ئه‌وه‌يشا هه‌ولێر و ده‌سڵات كوردييش ناتويه‌نيد خوه‌ی ته‌سليم لايه‌نيگ بكا ك ته‌نيا سياسه‌ت خوه‌ی بچه‌سپنيد، ئمجا ئه‌تويه‌نيم بويشيم دۆزه‌خ سه‌روه‌خوه‌يی فريه‌ له‌ به‌هه‌يشت ژيرده‌سی سه‌رفرازتره‌.

غازی حه‌سه‌ن

ج . أ