ده‌سڵاتداره‌یل عراق وه‌رپرسن له‌ تون وتیژیه‌یل وڵات

شفق نيوز

 

تاوان له‌عراق جووره‌یل فره‌یگه‌و ئاسته‌یلیشى جیاوازن، بڕیگ له‌لیان تاوان گه‌ناته‌كاریه‌ یا جیاوازى تایفى و ره‌گه‌زپه‌رسیه‌، له‌ گشتیانیش سه‌ختتر و خویناوى تر تاوانه‌یل ترۆر و ڕخه‌وبردنه‌. مه‌سه‌له‌ى تاوان گه‌ناكارى وه‌ ته‌واوى ئاشكراسه‌و زوورم دام و ده‌زگایه‌یل ده‌وڵه‌ت گرته‌سه‌و، هه‌ر یه‌یش بویه‌سه‌ مایه‌ى په‌كخستن گشت كاره‌یل و كاریگه‌رى كرده‌سه‌ بان به‌رژه‌وه‌ندى هاووڵاتیه‌یل.

وه‌ل ئه‌وه‌یشا مه‌سه‌له‌ى مافیاییش رووژانه‌ گیان ده‌یه‌ها كه‌س و بگر له‌ به‌عزه‌ شوونه‌یلیگ هه‌زاران مناڵ بیتاوان ئه‌كاده‌ قوربان مه‌رامه‌یل پیس ئه‌و چه‌ته‌و گرووپ ترۆریسته‌یله‌و له‌وه‌یش فیشتر ئه‌وه‌سه‌ ك ئه‌یانه‌ له‌هه‌مان وه‌خت مناڵه‌یل رواكنن و مه‌ردم فره‌یگیش وه‌ مین و ده‌مانچه‌ى بیده‌نگ له‌ناو به‌ن.

ئه‌وه‌ك مایه‌ى سه‌رسوڕمه‌نینه‌ ئه‌وه‌سه‌ ك وه‌ختیگ ئه‌و تاوانه‌یله‌ رویده‌ن ده‌زگایه‌یل ئاسایش یه‌كسه‌ر تاوانه‌گه‌ خه‌نه‌ پاڵ"نه‌ناسریاگ"، وه‌لى له‌ڕوى یاساییه‌و ئه‌و ده‌زگایه‌یله‌ وه‌رپرس خوه‌یان دیرن و ئه‌وانه‌ وه‌رجه‌ گشت كه‌سیگ وه‌پرسیارێتیه‌گه‌ ها بانیان، چوینكه‌ له‌ڕاسى بایه‌سه‌ سه‌رۆك یا وه‌رپرس ئه‌و ده‌زگا دویاى رویداگه‌یل ئه‌گه‌ر بكوش و تاوانبار وه‌دى نه‌كه‌ن یه‌كسه‌ر ده‌س له‌كار بكیشنه‌و تا وه‌شیوه‌ى دروسیگ چاره‌سه‌ر راسه‌وخۆ ئه‌و مه‌سه‌له‌ بكریه‌ید.

ئه‌وه‌ك ئیسه‌ له‌ به‌غدا گوزه‌رید، كه‌فیده‌ چوارچیوه‌ى گرفت پیلانداناین و خود خه‌ریككردن وه‌ بڕیگ چشت بیهووده‌ ك نقوم بوینه‌ له‌ گیژاو مه‌ینه‌تى و پڕ كاره‌سات و یه‌قه‌ى عراقیه‌یل گرتگه‌و دوینید له‌ ئاكام هه‌ر رویداگیگ كه‌سه‌یل بیتاوان ده‌سگیر كه‌ن و له‌ژیر سزاداین و كوشتن فره‌یگ له‌یوا له‌لیان كه‌ن ئه‌گه‌ر تاوانباریش نه‌ون دگان وه‌ ئه‌وه‌ بنه‌ن ك ئه‌وان تاوانه‌گه‌ ئه‌نجام دانه‌.

وه‌رجه‌ گشت چشتیگ ئه‌و تاوانه‌یله‌ ك له‌عراق رویده‌ن گشت وه‌رپرسیاریه‌تیه‌گه‌ى ناكه‌فیده‌ بان كارمه‌ندیگ بویچگ ، به‌ڵكوو كه‌فیده‌ بان خاوه‌ن به‌رزترین پۆست و پله‌و پایه‌ى حكوومى، چوینكه‌ له‌ڕاسى گشت ئه‌و تاوانه‌یله‌ له‌سایه‌و له‌ژیر وه‌رپرسیارێتى ئه‌و گه‌ورا وه‌رپرسه‌یله‌ رویده‌ن ك ملله‌ت متمانه‌ وه‌پیان داگه‌و له‌ڕوى یاساییه‌و هه‌ر ئه‌وان وه‌رپرس یه‌كه‌من.

بیجگه‌ ئه‌وه‌یش گشت به‌ڵگه‌نامه‌و ئاماژه‌یل ناوخوه‌یى و ناوده‌وڵه‌تییش له‌باوه‌ت عراقه‌و باس له‌ كار ده‌زگایه‌یلى كردنه‌و جوور ده‌وڵه‌تیگ شكه‌ست تاریفى كردنه‌، یه‌یش بیجگه‌ ئه‌وه‌ك له‌یوا ته‌ماشا كریه‌ید ك له‌مه‌سه‌له‌ى ناسه‌قامگیرى و گه‌ناته‌كارى مه‌رز بڕیه‌ن ئنجا له‌ى قوناغ خواست ئه‌وه‌سه‌ كار وه‌ حكوومه‌تیگ ته‌كنۆكرات پیشه‌یى بكریه‌ید ك بتویه‌نید ئه‌ركه‌یل په‌كخریاگ وه‌ پلان زانستى پڕ دقه‌تیگه‌و بووه‌یده‌ ڕییه‌و، ئه‌ویش وه‌ مه‌رجیگ ده‌سڵات جموجویل و كاركردن داشتوود.

له‌لایگ تریشه‌و هیز سه‌ره‌كى ك ئمڕوو تواناى ئه‌وه‌ داشتوود گشت كیشه‌یل وه‌ شیوازیگ دیموكراسى و دویر له‌هه‌ر به‌رژه‌وه‌ندییگ تایبه‌ت یه‌كلاوه‌ بكا، ئه‌ویش ئه‌و شه‌ریك گرینگه‌سه‌ ك له‌بان هه‌ردوگ ئاست فه‌رمى و مللى له‌عراق وجوود دیرید، ك ئه‌ویش سه‌ركردایه‌تى كوردستانیه‌ ك وه‌گووره‌ى ئه‌و ئه‌زموون دویر ودریژه‌ ك له‌بواره‌یل جیاجیا دیریده‌ى تویه‌نید كاریگه‌رى داشتوود و هه‌ر ئه‌ویش زانید ك چوین مامڵه‌ وه‌ل رویداگه‌یل بكا.

ته‌یسیر عه‌بدولجه‌بار

ج . أ