"یه‌یگه‌ری" گه‌وراترین ناكووكی ناونی هاوسه‌ره‌یل

شفق نيوز

  یه‌یگه‌ری خراوترین ره‌فتار هاوسه‌ریه‌ ك ژیان شیونیدو كیشه‌ی ناونی ئه‌ندامه‌یل خیزان فیشتره‌و ئه‌كا. ئایا له‌وه‌رچه‌ بڕیگ له‌ ژنه‌یل ڕی یه‌یگه‌ری گرنه‌وه‌ر، ئنجا له‌یرا ئویشیم: ئایا هیز خوه‌ی له‌و یه‌یگه‌ری دوینید، یا له‌ ئاكام ناز و بیده‌سڵاتیه‌؟!

وه‌ختیگ ك ژنه‌گه‌ خوازیار چشتیگه‌ له‌ هاوسه‌ره‌گه‌ی ، دی بایه‌سه‌ یا ئه‌نجامی بیه‌ید یا ئه‌وه‌سه‌ وه‌ئاشكرا ره‌تیه‌و بكا، چوینكه‌ ئه‌گه‌ر ئه‌رای جیوه‌جی نه‌كرد دی ژنه‌گه‌ هه‌ر مكوڕه‌ له‌بان جیوه‌جیكردنی و یه‌یش ره‌سیده‌ ئه‌و حاڵه‌ته‌ ك بیلید هاوسه‌ره‌گه‌ی خوسه‌ی له‌و ره‌فتاره‌ باید، ئنجا هه‌ر له‌وه‌ر ئه‌وه‌یش ئاشكرا به‌ له‌وه‌رده‌م داواكاریه‌یل هاوسه‌ره‌گه‌دو گرینگ ئه‌وه‌سه‌ هه‌وڵ بیه‌ید باوه‌ڕ وه‌پی بارید له‌ وه‌ختیگ ك داواكاریه‌یلی ره‌ته‌و كردیده‌، چوینكه‌ ئه‌گه‌ر قه‌ناعه‌ت نه‌كرد شایه‌ت سه‌عاتیگ وه‌پی نه‌چوودو هه‌مان قه‌وان دوباره‌ بكاده‌و.

یه‌یگه‌ری ژن شایه‌ت سفه‌تیگ بوود ك ریشگی بچووده‌و ئه‌را قوناغه‌یل یه‌كه‌م ژیانی، ئه‌ویش له‌وه‌ر په‌روه‌رده‌ی غه‌ڵه‌ت، چوینكه‌ مناڵ له‌وه‌خت مناڵی ئه‌گه‌ر داوای چشتیگ كرد و هه‌ر مكوڕ بوی له‌بانی و دایگ و باوگیش وه‌ ده‌میه‌و خه‌نستن و هه‌رچی تواست ئه‌رای جیوه‌جی كریا، ئه‌وه‌ بیگومان مه‌سه‌له‌گه‌ په‌ره‌ سینید و نوڕید له‌ قوناغ جایه‌ڵی ئه‌و حاڵه‌ته‌ له‌لای بووده‌ ره‌فتاریگ رووژانه‌و دی وه‌رده‌وام ها وه‌لیا تا ره‌سیده‌ ژیان هاوسه‌ری و جووریگ له‌ یاخیبوین دروس ئه‌كا.

له‌ شیوازه‌یل تر یه‌یگه‌ری ئه‌وه‌سه‌ ك نه‌ڕه‌سینه‌وه‌یگ هه‌س له‌ناونی هاوسه‌ره‌یل و سفه‌تیان جوور یه‌ك جفت نیه‌و شایه‌ت پیاوه‌گه‌ مه‌یلی تونڕه‌و بوود و ئحساسی تون بوود و كه‌مترین چشتیگ كاریگه‌ری له‌بانی داشتوود ئه‌گه‌ر وه‌ چه‌واشه‌ی مه‌یلی بوود، ئنجا ئی حاڵه‌تیشه‌ مقه‌یه‌تی له‌ ژنه‌گه‌ ناكا، چوینكه‌ دوینیده‌ی خه‌نید، وه‌لی بوغز گرته‌سه‌ی، یا داوای چشتیگ له‌لی ئه‌كه‌ید خوتبه‌یگ ئه‌راد ئه‌یاد، ك یه‌یش ته‌نیا جوور گه‌رده‌لویلیگه‌و گركان ته‌قنیده‌و.

هسكردن وه‌ كه‌می یه‌كیگه‌ له‌ گرینگترین هووكاره‌یل په‌یكردن وه‌ یه‌یگه‌ری، شایه‌ت ئه‌و دویه‌ته‌ له‌وه‌رجه‌ ئه‌وه‌ك بچووده‌ ناو ژیان هاوسه‌ریه‌و، له‌ناو خیزانیگ ژیاگه‌ ریز و حورمه‌ت له‌تی كه‌م بویه‌و دویاخریش خوه‌ی له‌ حاڵه‌ت هاوسه‌رگیری دوینیده‌و، وه‌لی نه‌ك وه‌ مه‌یل هاوسه‌ره‌گه‌ی و شایه‌ت هویراو رای په‌سه‌ن نه‌كاو روی له‌ یه‌یگه‌ری بكا تا زاڵ بووده‌ بان هس هاوسه‌ره‌گه‌ی.

ئنجا له‌یرا یه‌یگه‌ری ئه‌و هه‌مگه‌ كیشه‌و گرفته‌یله‌ دروس ئه‌كاو ژنه‌گه‌ له‌یوا هویره‌و ئه‌كا ئیهانه‌ت كریه‌ید له‌لایه‌ن هاوسه‌ره‌گه‌ی یا وه‌چه‌واشه‌و. هه‌ر وه‌و خاتریشه‌ ئویشیم: هه‌ركه‌سیگ گه‌ردیده‌ شوون ژیانیگ پڕ له‌ كه‌رامه‌ت و بی گرفت بیلا دویر بوود له‌ یه‌یگه‌ری، چوینكه‌ پیاو یه‌یگه‌ریش هویچ وه‌ختیگ ناتویه‌نید ده‌س له‌ هویر وڕای خوه‌ی هه‌ڵگرید ك هه‌رچه‌نی غه‌ڵه‌تیش بوود، وه‌ل ئه‌وه‌یشا ئویشیم تونڕه‌وی و غه‌زه‌وگرتنیش بووده‌ هووكار په‌یابوین یه‌یگه‌ری.

ته‌هانی عه‌بدلڕه‌حمان

ج. أ