نه‌فت كه‌ركووك، نه‌فت كوردستانه‌و نه‌فت عه‌ره‌بيش له‌ عه‌ره‌بستانه‌

شفق نيوز

ئه‌را ماوه‌ی سه‌ده‌يگه‌ نه‌فت كه‌ركووك كوردستانی له‌جيای ئه‌وه‌ك بدێده‌ مايه‌ی خوه‌شگوزرانی كورده‌يل و ئاوه‌دانی كوردستان، بويده‌ ئامرازيگ له‌ ده‌س عراق عه‌ره‌بی ئه‌را قڕكردن و له‌ناوبردن و خاپوركردن كوردستان.

سه‌ده‌يگه‌ نه‌فت كه‌ركووك كوردستانی ئه‌وه‌نه‌ قانجاز داشتگه‌ ئه‌را غه‌يره‌ كورد، ئه‌وه‌نه‌ كورد قانجاز له‌ی نه‌فته‌و داهاتيه‌ نه‌كردگه‌، ته‌نانه‌ت كرده‌وه‌ی وه‌ عه‌ره‌بكردن كومپانيای نه‌فت كه‌ركووك هه‌ميشه‌ وه‌رده‌وام بويه‌و له‌لايه‌ن عه‌ره‌ب هاورده‌ برياسه‌ رييه‌وه‌و زوورم كارگه‌ر و فه‌رمانبه‌ره‌يلی عه‌ره‌ب هاورده‌ بويه‌.

گام حكوومه‌ت هه‌رێم و وزاره‌ت سامانه‌يل سروشتی له‌ مقه‌يه‌تيكردن و كۆنترۆڵكردن چاڵه‌يل نه‌فتی بای حه‌سه‌ن، وه‌ديهاوردن ئه‌و خه‌وه‌سه‌ ك گشت كورديگ كه‌ركووكه‌ و كوردستانی دڵسووز ئه‌زره‌تمه‌نی بوی.

ئمڕوو و له‌شوون سه‌ده‌يگ چه‌ن چاڵه‌ نه‌فتيگ كه‌ركووك گله‌وخواردگه‌ ئه‌را ژيرده‌س حكوومه‌ت هه‌رێم كوردستان، وه‌لی بڕيگ كه‌س و لايه‌نه‌يل هه‌ن دژ ئی گامه‌يل حكوومه‌ت هه‌رێمه‌ كوردستانه‌ وسيان و مه‌ردم كوردستان تويش سه‌رسوڕمه‌نين كرد.

له‌يرا پرسياريگ هه‌س، ك ئايا چ كورديگ هه‌س حه‌ز ناكا نه‌فت كه‌ركووك كوردستانی له‌ژير كۆنترۆڵ حكوومه‌ت هه‌رێم كوردستان بوود؟ چ كورديگ هه‌س نه‌خوازيد داهات نه‌فت كه‌ركووك ئه‌را هاونيشتمانيه‌يل كوردستان بوود؟ چ كورديگ هه‌س حه‌ز نه‌كا كورد ئی كومپانيا بووه‌يده‌ ڕييه‌و؟

ئه‌وه‌ك مايه‌ی نگه‌رانيه‌، ئه‌و لێدوان و هه‌ڵويسته‌يل دژ وه‌ كوردستانه‌ بوی ك له‌لايه‌ن چه‌ن كه‌س و لايه‌نيگ كورديه‌و ژنه‌فتيمنه‌ی و بويه‌ پرسياری زوورم هاونيشتمانيه‌يل كوردستان، ك ئايا ئه‌و كه‌سه‌يل كورده‌ دژ ئی گامه‌يل حكوومه‌ت هه‌رێم كوردستان و وزاره‌ت سامانه‌يل سروشتيين؟ ئه‌ی چوين جواو كه‌س وكار شه‌هيده‌يل و ئه‌نفال و كيمياواران ئه‌يه‌نه‌وه‌و ئه‌كه‌فنه‌ ناو لاپه‌ڕه‌يل مێژوو؟

ئی گامه‌يل حكوومه‌ت هه‌رێم كوردستانه‌ هاوردنه‌وه‌ی يه‌كيگه‌ له‌و مافه‌يله‌ ك چه‌نه‌ها ساڵه‌ خه‌بات و شووڕش ئه‌رای ئه‌كريه‌يدو ئه‌وه‌نه‌ی ئه‌و چاڵه‌يل نه‌فت كه‌ركووكه‌ كورد خوين ئه‌رای رشانگه‌.

ئمڕوو له‌گشت وه‌ختيگ تر كورد هه‌وه‌جه‌ وه‌ يه‌كڕزی ديريدو بايه‌سه‌ گشت لايگمان پشتگيری حكوومه‌ت هه‌رێم كوردستان و سه‌ركردايه‌تی كورد بكه‌يم ئه‌را وه‌ديهاوردن ئامانج نه‌ته‌وه‌گه‌مان، ئه‌و ئامانجه‌يله‌ ك ئه‌وه‌نه‌ی ده‌ريای نه‌فت كه‌ركووك خوين ئه‌رای داگه‌، ئی گامه‌يل حكوومه‌ت هه‌رێمه‌ گاميگ تره‌ ئه‌را سه‌روه‌خوه‌يی كوردستانمان.

سامان ره‌شيد

ج . أ