شیوه‌كار و مه‌ته‌ڵنویسیگ فه‌یلى

شفق نيوز

 

فوئاد میرزا كوردیگ فه‌یلى شیوه‌كار و مه‌ته‌ڵنویس، له‌ ساڵ 1955 له‌ به‌غداى پایته‌خت عراق هاته‌سه‌ دونیاو له‌ رویداگه‌یل ساڵ 1963 له‌ جاده‌ى كفاح عه‌مرى 8 ساڵان بویه‌.

ئى شیوه‌كار ناوداره‌ له‌ ساڵ 1978 له‌ عراق ده‌رچیه‌و غوربه‌تنشین بویه‌و له‌ وڵات ئه‌مریكا ژیاگه‌، ئمجا بیجگه‌ زووان داڵگى وه‌ زووانه‌یل عه‌ره‌بى و ئیتالى و ئنگلیزییش قسه‌ ئه‌كا.

جوور ئه‌وه‌ك ئاشكراس له‌ سه‌رده‌م رژیم وه‌رین به‌عس، زوورم خیزانه‌یل كورد فه‌یلى له‌ سه‌ره‌تاى ساڵه‌یل 1980 كه‌فتنه‌ وه‌ر كووچ وه‌پیكردن زووره‌ملى و فریه‌یگ له‌لیان ئاواره‌ى وڵاته‌یل بوین وه‌ تایبه‌ت وڵات ئیران و زوورم جایه‌ڵ جوانه‌یلیان وه‌بى ئه‌وه‌گ تاوانیگ داشتوون خریانه‌ زیندان و بیسه‌روشوون كریان، ته‌نیا تاوانیان ئه‌وه‌ بوى كه‌ سه‌ر وه‌ نه‌ته‌وه‌ى كورد و كوردزووان بوین، ك هه‌ر وه‌و خاتریشه‌ فوئاد و خیزانه‌گه‌یشى تویش سزا هاتن له‌لایه‌ن ئه‌و رژیم سته‌مكاره‌ ك هه‌رچه‌نى سه‌ر وه‌ هویچ حزبیگیش سیاسى نه‌ویه‌ وه‌ دریژایى ژیانى.

فوئاد میرزا وه‌سه‌رهات و رویداگه‌یل سه‌خت ژیانى له‌ زوورم گووڤار و رووژنامه‌یل عراق و وڵاته‌یل عه‌ره‌بى بڵاو كردگه‌و جوور نویسه‌ریگیش یاد ئه‌و یادگاریه‌یل تیه‌ڵ و پڕ له‌ سته‌مه‌ كردگه‌ ك وه‌گشتى تویش خیزانه‌یل كورد فه‌یلى هاتگه‌.

ئیسه‌یش فوئاد له‌ وڵات ئه‌مریكا ژیه‌ید و ئه‌را ماوه‌ى 28 ساڵه‌ جوور ئه‌ندازیار تایبه‌ت له‌ بوار زانسته‌یل رۆبۆت كار ئه‌كا له‌ كومپانیاى كرسیله‌ر دروسكردن سه‌یاره‌و باوه‌ڕنامه‌ى ماسته‌ر دیرید له‌ ئه‌ندازیارى ئه‌كلترۆنى له‌ زانكۆى وین و ماسته‌ریش دیرید له‌ سه‌ركردایه‌تى ئدارى له‌ كۆلیژ بیكه‌ر.

هه‌ر له‌ سه‌ره‌تاى ساڵه‌یل هه‌فتاى سه‌ده‌ى وه‌رین تائیسه‌ یه‌كیگه‌ له‌ ناوداره‌یل نویسانن مه‌ته‌ڵ كوڵ له‌ عراق و به‌رهه‌مه‌یل فریه‌یگیش له‌ى بواره‌و بڵاو كردگه‌ له‌ گووڤار و رووژنامه‌یل عراقى و عه‌ره‌بى و یه‌كیگ له‌و كومه‌ڵه‌ مه‌ته‌ڵه‌یله‌ ك بڵاویه‌و كردگه‌ ناوى ناگه‌"ئه‌و رووژه‌ ماسیه‌گان باڵگرتن"و له‌ هونه‌ر شیوه‌كارییش ده‌س باڵایگ دیریدو تابلۆیه‌یل ماناداریگ وه‌ شیوه‌یگ هونه‌رى رازانه‌سه‌و.

زانيارى‌: سایت فوئاد میرزا

جه‌ماڵ ئه‌ركه‌وازى