فاتیحه‌یگ ئه‌را مه‌نه‌لى

شفق نيوز

تویش شاره‌یل كاولكریایمان هاتیه‌ و زووان گله‌ییش ئاراسته‌ى حكوومه‌ت ناوه‌ندى و حكوومه‌ت هه‌رێم كوردستانیش كه‌ن و ڕزبه‌ندى بوخته‌یلیگ فره‌ ده‌رخه‌ن و خوه‌یان وه‌ دڵسووز ئه‌و شاره‌یله‌ ده‌نه‌ قه‌ڵه‌م؛ وه‌لى وه‌ختى، وه‌خت كاركردن بایده‌ پیشه‌و زوورمیان وه‌ك كیسه‌ڵ مل به‌نه‌خوزاو و كورد وه‌ته‌نى بوونه‌ قه‌تره‌یگ ئاو و چنه‌ بن زه‌ویا و كه‌س وه‌چه‌و خوه‌ى نیه‌وینیده‌یان!!.

ئه‌گه‌ر به‌ڵگه‌ و ده‌لیلیگ له‌بان ئى قسه‌مانه‌ تواین بفه‌رموون بزانن له‌ ڕووژ په‌نجشه‌ممه‌ 5 ئه‌یار 2011 له‌ شار مه‌نه‌لى چه‌ ڕوى دا: وه‌بوونه‌ى ساڵیاد 36 ساڵه‌ى دویره‌و خستن و باركردن و شاروه‌ده‌ر كردن هووزه‌یل كورد له‌ شار مه‌نه‌لى بڕیگ ڕیكخریاى جه‌ماوه‌رى و لایه‌نه‌یل ڕه‌سمى له‌ شار مه‌نه‌لى بانگه‌وازیگ ئاراسته‌ى ئه‌و مه‌ردم مه‌نده‌لاویه‌ كردن ك له‌ شاره‌گه‌ دویره‌وخریانه‌ و ماڵ و موڵك و زه‌ویه‌یل كشتوكاڵییان له‌لایه‌ن ڕژیم وه‌رینه‌و زه‌فت كریاس، ئه‌را ئه‌وه‌گ بان له‌ سه‌نته‌ر شاره‌گه‌ گرده‌و بوون و داواى هه‌قه‌یل خوه‌یان و شاره‌گه‌یان بكه‌ن وه‌لى وه‌داخ گه‌ورایگه‌وه‌ ته‌نیا نزیكه‌ى 100 كه‌س له‌و خودنیشانداینه‌ جه‌مه‌و بوین.

ئیمه‌ له‌یرا وه‌ كى و كیانى قه‌سه‌م ئه‌و مه‌ردمه‌ ده‌یمن و ئویشیمن: توخودا ئه‌ى مه‌ردمه‌گه‌، ئه‌گه‌ر خودانه‌خواسه‌ یه‌كیگ به‌هاتیاد و خه‌وه‌ر مردن كه‌سیگ له‌و هووزه‌یلدانه‌ بهاوردیاد و بووتیاد له‌ دویرترین خاڵیگ له‌ فڵانه‌ شار پرسه‌ى نریاس، گشتدان جوانترین جنگ نه‌كردیاینه‌ وه‌ر و ئاخر مۆدیل سه‌یاره‌ى خوه‌دان نه‌خستیاینه‌ گه‌ڕ وسه‌رو عابایگ نه‌كردیانه‌ بن هه‌نگڵ و ته‌له‌فۆن و په‌یوه‌ندى وه‌ گه‌وراو بویچگ نه‌كردیان تا بچین ئه‌را پرسه‌ى فڵاكه‌س وه‌ڕه‌حمه‌ت خودا بخه‌فى؟!... ئه‌رى مه‌ردمه‌گه‌ ئیمه‌ تاكه‌ى وه‌ختى ئایه‌میگ زینى مرێد وه‌ى جووره‌ كه‌یمنه‌ى ڕووژ حه‌شر و وه‌ هه‌زاران كه‌س جه‌مه‌و بویمن و ده‌یان میلۆن دینار كه‌یمنه‌ خه‌رج و هه‌فت چادر گه‌ورا هه‌ڵده‌یمن و سێ شه‌و و سێ ڕووژ خاسترین خوراكى كه‌یمن و ده‌یمنه‌ى دگانا؟!!... ئه‌ى وه‌ختى توایمن شاریگ مردى زینیه‌و بكه‌یمن ئه‌راى چه‌ وه‌زوور و ناڕازى ته‌نیا 100 نه‌فه‌ر ئاماده‌ بوین ئه‌را زینیه‌وكردنى؟!!...

ڕیز و ئحتراممان هه‌س ئه‌را ئه‌و تاكه‌ كه‌سه‌ ك مرێد، ئه‌و هه‌مكه‌ حه‌شاماته‌ ئه‌راى جه‌مه‌و بوون و یه‌یشه‌ چشت خاس و خوه‌شیگه‌ و جووریگه‌ له‌ ته‌كافول كوومه‌ڵایه‌تى و جووریگیشه‌ له‌ نیشانداین قورسایى و وجوود كورد له‌ به‌غدا و هه‌رشوونیگتر ك ئى هووزه‌یلمانه‌ له‌تى ژیه‌ن، وه‌لى ئایا شاریگ مردى جوور شار مه‌نه‌لى شایان ئه‌وه‌ نیه‌ ك گشتمان ئه‌را زینیه‌وكردنى ئاماده‌ بویمن؟!! له‌وه‌ختیگ ك ئه‌و هاورده‌یله‌ ك هانه‌ شاره‌یل داوڕیایمان جوور شار كه‌ركووك، هه‌رچه‌نى بارووه‌زع ئاسایشى له‌تى ویرانه‌ و ڕووژانه‌ سه‌یاره‌ى مفخخه‌ و عبوه‌ ناسفه‌ له‌تى ته‌قێد و مه‌ردم بیگوناه كوشیه‌ێد، وه‌لى وه‌ل ئه‌وه‌یشه‌وه‌ دوینید نه‌ك ئه‌و هاورده‌یله‌ وه‌ته‌نیا هیمان زووانیان زڕه‌ و باس له‌ هه‌قه‌یل خوه‌یان كه‌ن له‌ شار كه‌ركووك، به‌ڵكوو تیه‌ن قه‌وم وكاره‌یلیان له‌ ده‌یشت كه‌ركووكیش تیه‌رن ئه‌را ئه‌وه‌گ وه‌ناهه‌ق سابت ئه‌وه‌ بكه‌ن ك خاوه‌ن شار كه‌ركووكن.

ئه‌زیزه‌یل ئیمه‌ ئه‌گه‌ر وه‌ى ئاسته‌ داواى هه‌قه‌یل خوه‌مان بكه‌یمن، دڵنیا بوون نه‌ك هه‌ر هویچ وه‌پیمان نیه‌كریه‌ید؛ وه‌لى چه‌وه‌ڕى ئه‌وه‌یشه‌ بوون ك بارووه‌زعه‌گه‌مان خه‌راو تره‌و بوود وه‌تایبه‌تى له‌ شار مه‌نه‌لى ك وجوود غه‌یره‌ كورد خه‌ریكه‌ فره‌ زیاتره‌و بوود و له‌ هه‌ر هه‌ڵوژاردنیگ هاتى شاره‌گه‌ وه‌ته‌واوه‌تى له‌ ده‌سمان ده‌رچوود و نه‌ك هه‌ر نیه‌تویه‌نیمن زینیه‌و بكه‌یمن؛ به‌ڵكوو دوباره‌ كوشیمنه‌ى و له‌و وه‌خته‌ كى ئاماده‌یه‌ بچوود فاتیحه‌یگ ئه‌راى بخوه‌نى؟!!!.

 

ماجد سوره‌مێرى