هيمان كيشه‌يگ هه‌س

شفق نيوز

 

وه‌لی جی داخه‌ بڕيگ له‌ليان نه‌خش پڕ گومان و پلانكارييگ ديرن له‌بان ماڵپه‌ڕه‌يل په‌يوه‌نديه‌يل كوومه‌ڵايه‌تی و هيمان ده‌نگيان له‌پشت قاپيه‌و ئه‌يادو هه‌وڵ داناين گورز ئه‌ياد له‌ دوڵاب پيشكه‌فتن سياسی نه‌فكه‌ر ئه‌را روڵه‌يل پيكهاته‌گه‌مان و خه‌ريك قسه‌و دعايه‌يل مه‌رامدارن وه‌ل گرژه‌وكردن جاده‌و رخه‌وداركردن كيشه‌گه‌، ك وه‌و مه‌رامه‌يله‌ سه‌ر له‌ مه‌رم شيواننه‌ له‌ناونی په‌يبردن وه‌ ئاينده‌و گومكردن سيمای گوزه‌يشته‌مان!

هيمان ئه‌و كيشه‌ هه‌س ك ره‌خنه‌گره‌يل فريه‌ن، وه‌لی خاوه‌ن فكره‌يل يا نيين يا كه‌من، چوينكه‌ بڕيگ له‌ليان باوه‌ڕيان ئه‌وه‌سه‌ ك خاوه‌ن يه‌كه‌م كيشه‌ی فه‌يليين و ته‌نيا چاره‌سه‌ركه‌ر كيشه‌گه‌مانن و ئه‌گه‌ر ئه‌و نه‌ود كه‌سيگ تر كليل چاره‌سه‌ر نه‌يريد!

بار فه‌يلی له‌ عراق وه‌ پيكهاته‌و مه‌زه‌و و ره‌گه‌زه‌و وه‌رگه‌ی دويرگرتن له‌ هه‌ر چين و پيكهاته‌يگ تر نه‌يريدو ديد ته‌ماميگيش نه‌يريد ئه‌را ئه‌وه‌ك هاوبه‌شی گشت لايه‌نيگ چاره‌سه‌ر سه‌ركه‌فتگيگه‌ ئه‌را ده‌رچگن له‌ جه‌نگڵستان قه‌يرانه‌يل ك خومان له‌تی ديمنه‌و له‌سای لێدوان و حوكم ئه‌وانه‌گ باوه‌ڕ وه‌ تومه‌ت و گومان ديرن و رازی نيين له‌لی ده‌رچيم.

هه‌ر وه‌و خاتريشه‌ هه‌وه‌جه‌ وه‌ ئه‌وه‌ ديريم ك بويشيم چاره‌نويس ژيان هاوبه‌شمان ها وه‌ل ئه‌وانه‌ك له‌ی وڵاته‌ ژيه‌ن و چاره‌نويسمان په‌يوه‌سه‌ وه‌ گشت و جوگرافيمان وه‌رگه‌ی دامه‌زرانن قه‌واره‌يگ نه‌يريد جوور(هه‌رێم فه‌يلی)و ئه‌وه‌ك بانگه‌واز و هاوار ئه‌كا ئيچنه‌ ئاشوويگ دروس بكاو قه‌يران له‌ناونی رووڵه‌يلمان دامه‌زرنيد، ئه‌وه‌ بيگومان ئه‌دێده‌ يه‌كه‌م كه‌سيگ ك واز له‌ ئه‌كه‌ريلی باريد و بيليد روڵه‌يل پيكهاته‌گه‌ی وه‌ ئاگر دوشمنه‌يل كينه‌تدار بسزيه‌يد له‌ وڵاتيگ ك خاوه‌ن و لايه‌نگر فكره‌ی ئه‌نفال و كووچكردن له‌تی ژيه‌يد ئه‌را كه‌سه‌يليگ ك باوه‌ڕ وه‌ كيشه‌گه‌ نه‌يرن و هانه‌بان فكره‌ی شوفێنی به‌عسی.

ئمجا ئه‌ی نه‌خوه‌شه‌يل خيگرتگ له‌بان ماڵپه‌ڕه‌يل په‌يوه‌ندی كوومه‌ڵايه‌تی و ده‌مده‌ر ئاگر ئاشوو، ته‌ماشای بار پيكهاته‌گه‌دان بكه‌ن و وژاداندان بارنه‌ كار و هه‌وڵ ئه‌وه‌ بيه‌ن ناو راسمانی خوه‌دان بنويسين له‌ لاپه‌ڕه‌ی نه‌مره‌يل له‌ كتاو مێژوو پيكهاته‌گه‌مان وه‌رجه‌ ئه‌وه‌ك ناو خوه‌دان له‌ لاپه‌ڕه‌ی قه‌يزكرياگه‌يل بوينين له‌ ئاكام قسه‌و نويسانن و ره‌فتاره‌يل نادروسدان ك هه‌ميشه‌ هساو ئه‌رای نه‌كرياگه‌.

روقه‌يه‌ فه‌يلی

ج . أ