ئه‌و ميديايه‌يله‌ ك خزمه‌ت داعش ئه‌كه‌ن

شفق نيوز

سه‌ره‌تايه‌يل، ميديای كوردی فريه‌ وه‌ ساده‌يی گشت سه‌نگه‌ر و شوونه‌يل ستراتيجی پێشمه‌رگه‌و جووره‌يل چه‌ك پێشمه‌رگه‌ ئاشكرا كرديان و وه‌و كاريشه‌ راسه‌وخۆ گشت خاڵه‌يل كز و بته‌و به‌ره‌ی جه‌نگ پێشمه‌رگه‌ ئه‌را داعش خستيانه‌ روی. دی له‌يوا بوی داعش هه‌وه‌جه‌ی وه‌ ئه‌وه‌ نه‌مه‌ند وه‌ گووره‌ی مه‌زه‌نه‌ و له‌يه‌كه‌وداين و ته‌كتيك جوراوجوور سه‌ربازی يا كوورانه‌ په‌لامار سه‌نگه‌ره‌يل پێشمه‌رگه‌ بيه‌يد، يا هه‌وه‌جه‌ی وه‌ ئه‌وه‌ نه‌مه‌ند سيخوڕه‌يلی بخاده‌ كار ئه‌را ئه‌وه‌ك زانياريه‌يل نهێنی به‌ره‌ی سه‌نگه‌ره‌يل پێشمه‌رگه‌ ئه‌رای جيواز بكه‌ن، چوينكه‌ خوه‌مان گشت زانيارييگ خستويمنه‌ وه‌رده‌سی.

راسه‌ وه‌رپرسه‌يل په‌يوه‌نديدار كه‌ميگ جڵه‌و ميديايه‌يل گرتنه‌، وه‌لی ئيسه‌يش له‌ ميديايه‌يل فريه‌يگه‌و رووژانه‌ بڕيگ نهێنی به‌ره‌يل جه‌نگ و ته‌كتيك پێشمه‌رگه‌ راسه‌وخۆ له‌ چوارچيوه‌ی هه‌واڵ يا راپۆرتيگ راديۆيی يا ته‌له‌فزيۆنی ئه‌دريه‌نه‌ داعش، ئه‌را نموونه‌: دو خاڵ فريه‌ بڤه‌و ئه‌تويه‌نيم بويشيم دو چشت ك خه‌ت قرمزن و نادێ هويچ ميديايگ كوردستان بكاده‌يانه‌ هه‌واڵ و باوه‌ت راپۆرته‌يليان ئه‌يانه‌ن:

١- ئمشه‌و پێشمه‌رگه‌ له‌ سه‌عات سفر ده‌س ئه‌كاده‌ په‌لامار.

٢- پێشمه‌رگه‌ ها له‌ ئاماده‌باشی.

چوينكه‌ يه‌كه‌ميان مانای ئه‌وه‌سه ‌"ئه‌ی داعش مقه‌يه‌ت خوه‌د به‌ پێشمه‌رگه‌ له‌ ناغافڵ نه‌گريده‌د، ئاگادار به‌و ئاماده‌ به‌ نه‌ك زه‌ره‌د وه‌پيد بڕه‌سيد".

دويه‌ميش وه‌و ماناسه ‌"ئه‌ی داعش جاری ده‌س مه‌كه‌ په‌لامار، چوينكه‌ پێشمه‌رگه‌ ئاماده‌باشه‌و هويچ ده‌سكه‌فتيگ ناكه‌فيده‌ ده‌سد".

بڵاوبوينه‌وه‌ی وه‌رده‌وام ئه‌و دو قسه‌و هه‌واڵه‌(١ ، ٢) شه‌هيدبوين ده‌يه‌ها رووڵه‌ی دڵسووز و فيداكار ئی وڵاته‌ له‌لی كه‌فته‌و، يا ئاشكراتر بويشيم: خوين ئه‌و شه‌هيده‌يله‌ ئه‌كه‌فيده‌ مل هه‌ر ميديايگ له‌يوا هه‌واڵيگ يا ره‌سميگ سه‌نگه‌ره‌يل پێشمه‌رگه‌ بڵاو بكاده‌و.

ره‌سوول سوڵتانی

ج . أ