ئه‌زموون ملله‌ته‌یلتر كۆپى نیه‌كریه‌ێ

شفق نيوز

ئه‌را شوونیگتر خاس نیه‌، شوڕش مسر گه‌ورا و شكودار بوى و هه‌ر وه‌ى خاتره‌ كه‌سایه‌تیه‌یل ناودار جه‌هان باسى كردن، باراك ئۆباما سه‌روك ئه‌مریكا له‌ باوه‌ت ئه‌و شوڕشه‌ وت: بایه‌د هوكاره‌ى مناڵه‌یلمان بكه‌یم تا جوور جوانه‌یل مسر بوون، سه‌روك ئوسترالیایش وت: بایه‌د خه‌ڵات ئاشتى نۆبڵ بدریه‌یگه‌ ملله‌ت مسر، سه‌روكه‌یل و رابه‌ره‌یلتریش قسه‌یلیگ له‌ى باوه‌ته‌ سه‌باره‌ت وه‌ملله‌ت مسركردن. له‌وه‌ر ئه‌وه‌گ شوڕش مسر گه‌ورا و شكودار بوى ملله‌ت وڵاته‌یلتریش ته‌قالاكردن كۆپى ئه‌زموونه‌گه‌ى مسر بكه‌ن، ئه‌را نموونه‌ ملله‌ت لیبیا و یه‌مه‌ن و سووریه‌ و هه‌رێم كوردستان. وه‌لى هه‌ر وه‌و جووره‌گ وتیم هه‌ر شوونیگ هه‌ر هه‌رێمیگ و هه‌ر ناوچه‌یگ و هه‌ر وڵاتیگ هه‌ل ومه‌رج و تایبه‌تمه‌ندى خوه‌ى دیرێ ك جیاوازه‌ وه‌ل ملله‌ته‌یلتر. جوانه‌یل مسر ئاگادار هیزه‌یل ئاسایش كردن ك هانه‌ ته‌ما له‌ رووژ 25 شوبات وه‌بوونه‌ى عه‌ید پۆلیس خوه‌ى نیشانداین بكه‌ن، ئه‌و رووژه‌ وه‌پیشكه‌ش كردن چه‌پكه‌ گوڵه‌یل وه‌هیزه‌یل پولیس ده‌سوه‌پیكردن یه‌یش له‌ وه‌ختیگه‌ مێژوو داكووكى كه‌یگه‌ بان په‌یوه‌ندى ناته‌ندروست له‌ ناونى ملله‌ت و هیزه‌یل پولیس. رویداگه‌یل له‌ى باوه‌ته‌ فه‌ره‌ن و دویایین رویداگیش كوژیان جوانیگ وه‌ناو خالد سه‌عید بوى ك له‌ ئه‌نجام ئى رویداگه‌ جمشتیگ مه‌ردمى له‌ شار ئسكه‌نده‌ریه‌ ئه‌نجام گرد وه‌ناو خالد سه‌عید ك ئى جمشته‌ یه‌كیگ له‌ ستوینه‌یل شوڕش مسرى بوى. له‌یره‌ ئى پرسیاره‌ خوه‌ى خه‌یگه‌ روى ك ئایا ملله‌ته‌یلتر تویه‌نن شوڕشه‌گه‌یان وه‌پیشكه‌ش كردن چه‌پگه‌ گوڵ ده‌سوه‌پى بكه‌ن و ئمجا چاكسازى بتوان؟ له‌ شوڕش مسر گولله‌یل راسكانى ئاراسه‌ى خوه‌ى نیشانده‌ره‌یل كریا و جوانه‌یل سینگ خوه‌یان نانه‌ وه‌ر گولله‌ و له‌ ئاخرین چركه‌یل ژیانیان دروشم (ئاشتى ئاشتى) هاوردیانه‌ تك زووان، ئایا ملله‌ته‌یلتر تویه‌نستن له‌یوا كاریگ بكه‌ن؟ له‌ رووژه‌یل شوڕشه‌گه‌ بڕیگ له‌ سه‌ربازه‌یل و هیزه‌یل پولیس ته‌قالا كردن له‌ شوڕشه‌گه‌ به‌شدار بوون و ئه‌گه‌ر چنه‌ كاریگ ئه‌نجام بگرداگ وه‌سه‌ره‌تایگ ئه‌را به‌شبه‌شه‌وبوین و ناكووكى كه‌فتن له‌ ناونى هیزه‌یل سوپا له‌قه‌ڵه‌م دریا و شایه‌د جه‌نگ ناوخوه‌یى ده‌سوه‌پى بكرداگ هه‌ر وه‌و جووره‌گ

له‌ وڵات لیبیا و یه‌مه‌ن رویدا، وه‌لى شوڕشگێڕه‌یل مسر ئاگا و هوشیار بوین و تویه‌نستن نواى به‌شدارى كردن هێزه‌یل چه‌كدار له‌ شوڕش بگرن ئه‌را ئه‌وه‌گ دوبه‌ره‌كى نه‌كه‌فیگه‌ ناو ملله‌ت و له‌یوا نیشان بیه‌ن ك شوڕشه‌گه‌ مه‌ده‌نیه‌ و داخوازیه‌گان داخوازى مه‌ردمین. له‌ شوڕش مسر بزووتنه‌وه‌ى ئخوانولموسلمین و لایه‌نه‌یلتر ئسلامى به‌شدار بوین وه‌لى هه‌رگز كه‌سیگ دروشم ئسلامى به‌رزه‌و نه‌كرد و یه‌یش ره‌نگ و بوى نیشتمانى به‌خشیه‌ شوڕشه‌گه‌، فه‌ره‌ له‌ لایه‌نه‌یل سیاسى مسرى ته‌قالا كردن خوه‌یان بكه‌نه‌ خاوه‌ن شوڕشه‌گه‌ و بوونه‌ په‌رچه‌مدار شوڕش وه‌لى جوانه‌یل مسرى رێ وه‌پیان نه‌یان و ته‌نیا جوور لایه‌نه‌یلیگ سیاسى به‌شدار له‌ شوڕش پیشوازى له‌لیان كردن، به‌ڵێ نماز جه‌ماعه‌ت له‌ مه‌یدان ئازادى به‌رپا كریا وه‌لى له‌ شان ئه‌وه‌یش برایه‌یل مه‌سیحیمان راز و نیاز ئاینى خوه‌یان كردیان.
ئایا ملله‌ته‌یلتر تویه‌نن له‌یوا كاریگ بكه‌ن و نواى ته‌قالاى لایه‌نه‌یل سیاسى و ئاینى بگرن ئه‌را ئه‌وه‌گ خوه‌یان نه‌كه‌نه‌ خاوه‌ن شوڕشه‌گه‌. له‌ كوتایى ئه‌ركیگ مه‌نگه‌ ك بایه‌د گشت لایگ له‌لى ئاگاداره‌و بكه‌م ئه‌ویش مه‌سه‌له‌ى یه‌كیه‌تى نیشتمانیه‌، مسر وه‌رجله‌ شوڕش له‌ ده‌س ناكووكیه‌یل تایفى ناڵانیاد وه‌لى له‌ وه‌خت به‌رپابوین شوڕشه‌گه‌ ته‌نانه‌ت یه‌ك كه‌نیسه‌یش كوچگواران نه‌كریا ئه‌را؟ له‌وه‌ر ئه‌وه‌گ گشتمان خه‌م مه‌سه‌له‌ى نیشتمانى و ته‌بایى خواردیایم، شایه‌د كه‌سیگ بویشیگ ئه‌وه‌سا ناكووكی تایفى و جه‌نگ له‌ناونى پیكهاته‌یل مسرى ده‌سوه‌پى كردگه‌، یه‌ قسه‌ى راسیگه‌، وه‌لی ئه‌وانه‌گ هانه‌ ته‌ما ئى جه‌نگه‌ بخه‌نه‌ رێ هانه‌ شوون به‌رژه‌وه‌ندیه‌یل خوه‌یان یا پاشمه‌نه‌ى رژیم رمیاگ و لایه‌نگره‌یل پارت نیشتمانین ك موباره‌ك سه‌روكایه‌تیى كردیاد. وه‌لى وه‌به‌ره‌كه‌ت شوڕش نیشتمانى مسر ئى فورسه‌ت ته‌ڵه‌وه‌یلیشه‌ وه‌ى زویه‌ له‌ناو چن. له‌ كوتایى دواره‌یه‌و كه‌م ك هه‌ر ملله‌تیگ و نه‌ته‌وه‌یگ تایبه‌تمه‌ندى خوه‌ى دیرێ و بایه‌د له‌ بان بنه‌واى ئه‌و تایبه‌تمه‌ندیه‌ وه‌لیا ره‌فتار بكریه‌ێ و وه‌ڕاسى ئه‌زموون ملله‌ته‌یل كۆپى نیه‌كریه‌ێ.