مه‌رحه‌بای كه‌س مه‌كه‌ تا ره‌خنه‌ له‌ليد نه‌گيريه‌يد!

شفق نيوز

ئه‌را نموونه‌: براده‌ريگ ديرم باس له‌ براده‌ره‌يل خوه‌ی ئه‌رام كرد و وت: فڵانی گير هاتمه‌ وه‌ده‌س چه‌ن براده‌ريگه‌و له‌ براده‌ره‌يلم ك بوينه‌سه‌ بار سه‌خت و ريگر له‌وه‌رده‌م هاڵ وهه‌واڵ و سلام و ديده‌ن دووس و براده‌ره‌يلم، وه‌ جووريگ ك هه‌ر وه‌ختيگ بتوام سڵام دووس و براده‌ريگم بكه‌م و هه‌واڵی بپرسم و له‌وه‌رپايان هه‌ڵسم و حورمه‌ت له‌ليان بنه‌م وه‌چه‌و سووكه‌و ته‌ماشام كه‌ن و ناونيتگ له‌ليم بڕن و ئويشنه‌پيم به‌سه‌ دی كه‌ميگ خوه‌د قورس بگر و جارجاريش وه‌پيم ئويشن خايه‌ماڵ و پاڵدويته‌كن و جارجاريگيش له‌يوا وه‌پيد ئه‌كه‌ن ك ئه‌گه‌ر جاريگتر كه‌سيگ تر بوينيد سای سه‌ر بكه‌يده‌ خوار و مه‌رحه‌بای نه‌كه‌يد تا ره‌خنه‌ له‌ليد نه‌گيريه‌يد!

دی نيه‌زانم رای كه‌سه‌يل تر‌ چه‌س له‌بان ئی ره‌فتار و هه‌ڵسووكه‌فته‌، ئايا قه‌در وحورمه‌ت له‌ كه‌سيگ بگريد و هه‌واڵی بپرسيد سووكايه‌تيه‌؟ ئايا هه‌ر بايه‌سه‌ ئه‌وان بان وه‌ره‌و تن؟ ئايا شووره‌ييه‌ ئه‌گه‌ر من له‌ وه‌رجه‌ ئه‌وان سڵاميان بيه‌م و ده‌سمشتاق وه‌ليانا بكه‌م و خوڵكيان بكه‌م؟ ئايا له‌ شانيه‌تم كه‌مه‌و بوود ئه‌گه‌ر حورمه‌ت له‌ كه‌سيگ بنه‌م؟ ئايا ناوداری وه‌ لويتبه‌رزيه‌؟ ئايا مه‌ردم خزمه‌تكار منن هه‌ر ئه‌وان هه‌واڵم بپرسن؟ مه‌گه‌ر من چه‌م؟ مه‌گه‌ر من له‌ خاك دروس نه‌كريامه‌و نيه‌ومه‌ هه‌مان خاك؟ مه‌گه‌ر سواو سڵامكردن له‌سڵام جواوداين فيشتر نيه‌؟ ئه‌ی دی ئه‌راچه‌ خوه‌م وه‌ قويخاو ئاغا بزانم و مه‌ردمان تر وه‌ خزمه‌تچی؟ ئه‌ی مه‌گه‌ر نيه‌ويشن مه‌رد وه‌ هاڵ وهه‌واڵ.

وه‌لی له‌يوا دياره‌ له‌ی رووژگار پڕ له‌ ديارده‌و ره‌فتاره‌يل ئه‌ڵڵاجه‌ويه‌، چشتيگ نيه‌ بتويه‌نيد نوای ريز و حورمه‌ت بگريد و له‌كه‌دار ئاكامه‌ په‌سه‌نه‌گه‌ی بكاو هويچ ره‌خنه‌يگيش له‌ ئاست ئی مه‌سه‌له‌ پايه‌دار نادێ و ناڕه‌سيده‌ مه‌رام، چوينكه‌ بنه‌ڕه‌ت ژيان ئنسانيه‌ت له‌بان ئاشنايه‌تی و ته‌بايی نرياگه‌و هه‌ر وه‌و خاتريشه‌ حورمه‌تناين له‌ كه‌سه‌يل وه‌رانوه‌ر بويه‌سه‌ مايه‌ی سه‌رخستن ئه‌خلاق ئنسانی له‌ناو كوومه‌ڵگايه‌يل وه‌گشتی.

ره‌نجده‌ر ئاواره‌