مه‌رگ و ژیان له‌به‌غدا هه‌ر یه‌كیگه‌

شفق نيوز

مانگه‌ى سه‌رۆك حزبه‌یل سێ حكوومه‌ت تر جڵه‌و ده‌سڵات گرتنه‌ ده‌س وه‌ سه‌رۆكایه‌تى عه‌لاوى و جه‌عفه‌رى و مالكى، ك ئى حكوومه‌ت دویاخریشه‌ وه‌ناو ده‌وڵه‌ت قانوون ئه‌را دویه‌م جاره‌ له‌هه‌ڵوژاردن زوورمینه‌ى ده‌نگ وه‌ده‌س هاورد، وه‌لى ئه‌وه‌ك له‌ى سێ حكوومه‌ته‌ دوینریا ته‌نیا كیشمه‌كیش و ناكووكى و سه‌رهه‌ڵداین چینایه‌تى بوى بیجگه‌ كار تیرۆریستى له‌لایه‌ن گرووپه‌یل چه‌كدار و دژ دیموكراسیه‌ت ك ئى وڵاته‌ ویران و كاول كردنه‌ و له‌لایه‌ن ده‌وڵه‌ته‌یل هاوساو دیكتاتۆره‌و پشتگیرى له‌لیان كریه‌ێد و پویل و چه‌ك و ته‌قه‌مه‌نى جووراوجوور خریه‌ێده‌ خزمه‌تیان له‌وه‌ر خاتر وه‌رچه‌رخانن ریڕه‌و دیموكراسى وه‌ره‌و زوڵم و سته‌مكارى.

نه‌ك هه‌ر ئه‌وه‌یش، به‌ڵكوو له‌ناو خود ده‌وڵه‌تیش كه‌سه‌یل دژ دیموكراسى و شۆڤێنى وه‌ ئاشكرا حاشا له‌ هه‌ق ملله‌ت كه‌ن. ئه‌را جیوه‌جیكردن هه‌ر قه‌وڵ و بڕیاریگیش نائومیدى وه‌ملله‌ت په‌یا كردنه‌و تائیسه‌ هویچ خزمه‌تگوزارییگ له‌شار به‌غدا نه‌كریاگه‌ وه‌ جووریگ مه‌ردم له‌لى رازى بوود. له‌وه‌خت هاتن پۆل بریمه‌ر حاكم مه‌ده‌نى ئه‌را عراق له‌سه‌ره‌تاى ئازادى عراق و داناین ده‌ستوور، ئه‌وه‌ بوى مه‌ردم سته‌مدیده‌ شكات له‌ده‌س بیكاره‌بایى كردن ك هه‌وه‌جه‌ى خواست رووژانه‌س، ئمجا برێمه‌ر حاكم مه‌ده‌نى خود خوه‌ى باس له‌كیشه‌ى كاره‌با كردو وت: له‌یره‌ تا په‌نج ساڵ تر كیشه‌ى كاره‌با هه‌س، وه‌لى دویاى په‌نج ساڵ یه‌ك ده‌قه‌ كاره‌با نه‌بایه‌د بووڕیه‌ێد، ئه‌وه‌ زیاتر له‌ هه‌فت ساڵه‌و كاره‌بایش خاسسازى وه‌خویه‌و نه‌یه‌و ئه‌گه‌ر موه‌لده‌ى ئه‌هلى نه‌ود مه‌ردم نیه‌تویه‌نن گوزران بكه‌ن، ئه‌یه‌ نموونه‌یگ بوى له‌و هه‌مگه‌ كیشه‌و گرفته‌یله‌ ك رووژانه‌ رویوه‌ڕوى ملله‌ت بووده‌و. ئى شار كاولكریاگه‌ وه‌ناو پایته‌خت عراقه‌و كه‌سایه‌تى دیبلۆماسى و سه‌رۆك و شاند وڵاته‌یل تر سه‌ردانى كه‌ن، ئایا حكوومه‌ت به‌غدا تواناى ئه‌وه‌ نه‌یرێد خزمه‌تیگ بڕه‌سنێده‌ ڕى و بان و جاده‌یل چاڵ چاڵ و پاركه‌یل بیناز كه‌فتگ و داره‌یل وشك و تیه‌نگ و ناوچه‌یل پیس و پوخڵ پڕ له‌زبڵ؟ هه‌یشت ساڵه‌ به‌غدا مه‌رگ و ژیان له‌تى جویر یه‌كه‌، حكوومه‌ت وه‌ناو پلان چه‌سپانن یاسا دڵ خوه‌ى خوه‌شكردگه‌ گوایا مقه‌یه‌تى له‌ گیان هاووڵاتیه‌یل كردگه‌، وه‌لى له‌ڕاسى رووژ نیه‌ ده‌نگ ده‌نگدو كوشتار و ڕواكانن مه‌ردم بیده‌سڵات و ده‌نگ ته‌قینه‌وه‌ نه‌ژنه‌فیم. ئیسه‌ كوشتن له‌به‌غدا وه‌ ده‌مانچه‌ى بیده‌نگ ئه‌نجام دریه‌ێد و كه‌سیش نیه‌ زه‌فه‌ر له‌لیان بارێد و ده‌سگیریان بكا. وه‌رپرسه‌یل حكوومه‌تیش هه‌ر خه‌ریك گیرفان پڕكردن و تاڵانكردن ماڵ مه‌ردمن و رووژانه‌یش له‌وه‌خت چگنیان ئه‌را بان كاره‌یلیان بایه‌سه‌ جاده‌ ئه‌ڕایان چووڵ بكریه‌ێد وه‌نا وه‌ سافره‌ى سه‌یاره‌و پیاوه‌یل مقه‌یه‌تیكه‌ریان دونیا نه‌نه‌ یه‌ك. ته‌ماشا كه‌ید له‌ولایشه‌و كابرایگ فه‌قیر و كه‌مدرامه‌ت ئه‌را په‌یاكردن ژیان رووژانه‌ى له‌وه‌ر قه‌ره‌باڵغى جاده‌ مه‌گه‌ر ئه‌را نزیك نیمه‌ڕوو بڕه‌سێده‌ بان كاره‌گه‌ى و فره‌جاریش كارگه‌ره‌یل بوینه‌سه‌ قوروانى ته‌قینه‌وه‌ى دڵته‌زن. مناڵه‌یل له‌ناو مه‌دره‌سه‌ ئه‌و متمانه‌ى ته‌واوه‌ نه‌یرن وه‌بى ترس و گومان وه‌خته‌گه‌یان بووه‌نه‌ سه‌ر، چوینكه‌ خوه‌ندنگاى مناڵه‌یلیش كه‌فتیه‌سه‌ وه‌ر هه‌ڕه‌شه‌ى ته‌قینه‌وه‌و تیرۆریسته‌یل. سایه‌ق له‌ناو جاده‌ "خوه‌ى به‌خت" ژیه‌ێد و باوه‌ڕ نه‌یرێد وه‌ سه‌ڵامه‌ت بڕه‌سێده‌ ناو ماڵ و مناڵ خوه‌ى، ئه‌یه‌سه‌ ژیان له‌به‌غداى پایته‌خت ئه‌را ئه‌وانه‌ك دویرن له‌لى ك شایه‌ت وه‌ دروو ده‌له‌سه‌ى ره‌سانن یا ئعلام وه‌تایبه‌ت كه‌ناڵه‌یل ته‌له‌فزیۆن باوه‌ڕ بكه‌ن و بویشن به‌غدا خوه‌شه‌و هویچ كیشه‌یگ نه‌یرێد له‌ڕوى ئاسایشه‌و.

 

ج. عه‌لى میرى