كورد و گرەو‮ ‬مێژوو

شفق نيوز

     

بار ئيسه‌ی خوه‌رهه‌ڵات ناوين مه‌سه‌له‌ی ئاڵشتكاريه‌و بڕيگ سيناريۆيش هه‌ن ئه‌را مامڵه‌كردن ئه‌و باره‌، وه‌لی ئاڵشتكاری جوگرافی و لاوردن چه‌ن ده‌وڵه‌تيگ و دامه‌زرانن ده‌وڵه‌ت تازه‌ له‌ به‌شيگ فريه‌ی سيناريۆگه‌و ئه‌گه‌ره‌يل وجوود ديريد.

مه‌سه‌له‌ی ئاڵشتكاری و دوباره‌ نه‌خشه‌ناين خوه‌رهه‌ڵات ناوين ته‌نيا له‌ چوارچيوه‌ی ئه‌گه‌ر و پيشبينكردن نيه‌، به‌ڵكوو ئيسه‌ بار ئيسه‌ شايه‌تيده‌ر به‌شيگ له‌ رويداگه‌يل گه‌رم و مه‌يلكيشن وه‌ تايبه‌ت له‌ وڵاته‌يل عه‌ره‌بی و له‌وانه‌يش له‌ عراق و سوريا و يه‌مه‌ن.

جويلانن كوچگه‌يل شه‌ترنج گه‌يل سياسی فريه‌ گورج و تيژپه‌ڕن و بڕيگ له‌ليان چه‌وه‌ڕی نه‌كرياگن و قه‌يرانه‌يليش فريه‌ن و شماره‌يان له‌ هساو نايه‌يد و دويكه‌ڵيشی ناوچه‌گه‌ وه‌گشتی گرته‌سه‌و، هويچ هيز و لايه‌ن و ده‌وڵه‌تيگيش نيه‌ له‌بان خه‌ت نه‌ود و زورم ئه‌و هيز و لايه‌نه‌يليشه‌ ك هانه‌ بان خه‌ت ئه‌را ئه‌وه‌سه‌ ئه‌وه‌گ ديرنه‌ی له‌ده‌سی نه‌يه‌ن.

له‌يرا كيشه‌ی كورد هه‌رچه‌نی له‌ فۆرم ده‌وڵه‌ت ئاماده‌گی نه‌يريد له‌ گه‌مه‌يل سياسی، وه‌لی يه‌كيگه‌ له‌ كيشه‌يل هسيار و هساو ئه‌رای كرياگ كورد و كيشه‌گه‌ی، ك وه‌ دقه‌ته‌و له‌ی گه‌ه‌ی سياسيه‌ هساو ئه‌را كيشه‌ی كورد جوور نه‌ته‌وه‌يگ بی ده‌وڵه‌ت ئه‌كه‌ن.

ئاماده‌گی كيشه‌ی كورد له‌ مه‌يدان سياسه‌ت و كيشمه‌كيشه‌يل وه‌ی تواناو هيز ئيسه‌يه‌ له‌ مێژوو تازه‌ بی وينه‌ بويه‌، ئه‌گه‌ر ته‌ماشايگ بار گشتی ناوچه‌گه‌ بكه‌يم، دوينيم جووريگ له‌ قه‌بولكردن و مامڵه‌كردن وجوود ديريد وه‌ل مه‌سه‌له‌ی كورد، مه‌ردمانيگ جوور كافيگ ره‌وا نوڕنه‌ مه‌سه‌له‌گه‌ له‌ چوارچيوه‌يگ سياسی و مه‌ردمانيگيش له‌ڕوی به‌رژه‌وه‌نديه‌و ته‌ماشای ئاڵشتكاريه‌يل ئه‌كه‌ن.

ئمجا ئه‌گه‌ر يه‌كڕزی و يه‌كهه‌ڵويستی هيزه‌يل سياسی كوردستان تيكه‌ڵ وه‌ خواست و ئيراده‌ی مه‌ردم كوردستان بكريه‌يد، ئه‌وه‌ ئاماده‌گی ناوماڵ كورد و يه‌كده‌نگی زامن مقه‌يه‌تيكردن ده‌سكه‌فته‌يل و وه‌ديهاوردن ئامانجه‌يل گه‌ورا و باڵای مه‌ردم و ملله‌ت كوردستانه‌و هه‌ر كه‌لين و كونايگ له‌ناو ماڵ كورد به‌خت و ئه‌گه‌ره‌يل خاس كه‌مه‌و ئه‌كاو ئيسه‌يش گشت ئاڵشتكاری و هه‌ل و ده‌رفه‌تيگ هاته‌سه‌ وجوود و گره‌و مێژوون، ك ئايا وه‌ يه‌كڕزی و هاوهه‌ڵويستی و ئيراده‌يگ يه‌كگرتگ و گيانيگ نيشتمانی و نه‌ته‌وه‌خوازيه‌وه‌ گره‌و مێژوو ئه‌يه‌ريمنه‌ ده‌س؟

سه‌ربه‌ست مه‌نمی

ج . أ