كه‌ره‌سه‌ی ت چه‌س؟ ئه‌را نه‌ڕه‌سيده‌ ئامانج؟

شفق نيوز

مانای يه‌‌سه‌ ئه‌ی كه‌ره‌سه‌ی ت چه‌س؟ چوين ئه‌تويه‌نيد وه‌ی جووره‌ كه‌ره‌سه‌يگ بنه‌ڕه‌ت كه‌سايه‌تييد بنيات بنه‌يد ك هه‌تا بار قورستر و كيشه‌و گرفت فيشتر روی له‌ليد بكا كاريگه‌ری نه‌ياشتوود له‌باند و بته‌وتر بويد؟

كه‌سايه‌تی پيكهاتگه‌ له‌و كه‌ره‌سه‌ ك ها نوای ئامانج گشت كه‌سيگ و گشت ئاده‌ميزاديگيش هه‌وه‌جه‌ وه‌ كه‌سايه‌تييگ بته‌و ديريد ئه‌را ئه‌وه‌ك بڕه‌سيده‌ ئامانجه‌گه‌ی، ئمجا ئه‌و ئامانجه‌ پيكهاتويد له‌ هه‌ر چشتيگ و كه‌سايه‌تييش چشتيگه‌ بايه‌سه‌ له‌ژير چه‌وديری و مقه‌يه‌تيكردن ئيمه‌ بوود، چوينگه‌ ئه‌گه‌ر مقه‌يه‌تيكرياگ بوود شايه‌ت وه‌ ئاسانی بڕه‌سيده‌ ئامانجه‌يلد.

دويه‌م كه‌ره‌سه‌ی ژيان پيكهاتگه‌ له‌(باوه‌ڕ)، ئه‌و چشته‌ ك له‌يوا له‌ ئيمه‌ ئه‌كا خوه‌مان رازی بكه‌يم وه‌ بڕيگ گرفت ك ئه‌يه‌نه‌ وه‌رده‌ممان وهويچ وه‌ختيگ خوه‌مان ئه‌رای ئاماده‌ نه‌كرديمنه‌و چه‌وه‌ڕيی نه‌ويمنه‌.

شايه‌ت باوه‌ڕ له‌وه‌خت ته‌نگی و فه‌قيرييش خاسترين و ئاسانترين ڕی بوود ئه‌را وه‌رده‌وامی ژيان له‌وه‌ختيگ ك ئه‌زره‌ته‌يل مه‌ردميش فريه‌ن! وه‌لی شايه‌ت به‌ش فريه‌ كه‌ميگيش له‌و ئه‌زره‌ته‌يله‌ بايده‌ دی، ك هه‌ر له‌وه‌ر ئه‌وه‌يش ئه‌لبێرت كامۆ ئويشيد(ئه‌گه‌ر گشت خواست و ئاره‌زووه‌يلمان باتيانه‌ دی مانای ئه‌وه‌سه‌ ژيان هويچ مانايگ نه‌ياشت، يه‌يش وه‌و مانا ك باوه‌ڕ خاسترين ڕييگه‌ ئه‌را خودمقه‌يه‌تيكردن له‌ شكه‌ست و زيايبوين ئه‌گه‌ره‌يل ئه‌را سه‌ركه‌فتن.

سێيه‌م كه‌ره‌سه‌ی ژيان و سه‌ركه‌فتن پيكهاتگه‌ له‌ په‌يوه‌ندی كوومه‌ڵايه‌تی ئه‌را سه‌ركه‌فتن و ره‌سين وه‌ ئامانج، ك له‌يرا هه‌وه‌جه‌ وه‌ مه‌ردم فريه‌يگ ديريم ئه‌را ئه‌وه‌ك پشتمان بگرن و صشت له‌ليانه‌و يای بگريم، ئمجا ئه‌و كه‌ره‌سه‌يشه‌ رييگ ديريد ئه‌را ده‌سكه‌فتن هاوكاری مه‌ردم ، ك ئه‌ويش(زه‌رده‌خه‌نه‌)س، ك وه‌ زه‌رده‌خه‌نه‌ خوه‌شه‌ويسی ئه‌را وه‌رانوه‌ره‌گه‌د نيشان بيه‌و زووان راسی وه‌ليا باره‌ كار بيگومان به‌ له‌وه‌ك دڵنيايد ده‌سميه‌ت وه‌رانوه‌ره‌گه‌د وه‌پی ئه‌يه‌يد.

چواره‌م كه‌ره‌سه‌ی ژيان پيكهاتگه‌ له‌ هووكاريگ ئه‌را ژيان جوور ئه‌وه‌ك ئه‌ژنه‌فيم كه‌سه‌يليگ هه‌ن ئويشن وه‌و ئه‌زره‌ته‌وه‌ يا له‌وه‌رخاتر ئه‌و كه‌سه‌ يا ئه‌و چشته‌ ژيه‌م. مانای ئه‌وه‌سه‌ ئيمه‌يش بايه‌سه‌ له‌وه‌رخاتر ئامانجيگ بژيه‌يم ئه‌را ئه‌وه‌ك له‌وه‌خت كه‌فتن بتويه‌نيم هه‌ڵسيمنه‌وه‌و وه‌رده‌وام بويمن له‌ هه‌وڵ و خه‌باتمان له‌وه‌ر خاتر سه‌ركه‌فتنيگ دياری.

مه‌تين حه‌سه‌ن

ج . أ