ئه‌ساره‌ى تووپ سه‌وه‌ته‌ داوود سه‌لمان فه‌یلى

شفق نيوز

خوه‌یه‌وه‌ دى ك هه‌میشه‌ نه‌خش یا ده‌ور باڵایگ داشتنه‌ له‌ هونه‌ر وه‌رزش و جویر وه‌رزشكاریگ ئه‌سپ خوه‌یان تاو دانه‌ له‌ مه‌یدانه‌یل جووراو جوور و ناودارى فره‌یگ داشتنه‌و مایه‌ى سه‌ربه‌رزى وڵاته‌گه‌یان بوینه‌و شانازى وه‌پیانه‌وه‌ كریه‌یگ . یه‌كیگ له‌وانه‌یش وه‌رزشكار تووپ سه‌وه‌ته‌(كره‌ السله‌) پاڵه‌وان(داوود سه‌لمان)ه‌ له‌ ڕوڵه‌یل كورد فه‌یلى، ك له‌ساڵ 1942 له‌ شار به‌غداى پایته‌خت عراق هاته‌سه‌ دونیاو ئه‌را خوه‌ندن سه‌ره‌تایى چیه‌سه‌ خوه‌ندنگاى فه‌یلیه‌ى سه‌ره‌تایى، ناوه‌ندى و دویا ناوه‌ندییش له‌خوه‌ندگایه‌یل به‌غدا ته‌واو كردگه‌و دویاخریش چیه‌سه‌ زانكۆ یا جامعه‌ى موسته‌نسریه‌و كۆلیژ په‌روه‌رده‌ به‌ش زانست ده‌روینى ته‌واو كردگه‌.

داوود سه‌لمان له‌شوون ته‌واوكردن زانكۆ بویه‌سه‌ مامۆستاو له‌ خوه‌ندنگایه‌یل فه‌یلیه‌و ئبن جۆزى له‌ به‌غدا ده‌رسده‌ر بویه‌و دویاخریش له‌وه‌ر ئه‌وه‌ك ئنتما نه‌كردگه‌ ئه‌را حزب به‌عس فاشیست جویر وه‌زیفه‌كاریگ  جیواز كریاگه‌ ئه‌را په‌روه‌رده‌ى ناوچه‌ى رسافه‌. بیجگه‌ ئه‌وه‌یش روى وه‌ڕوى گرتن و ناڕه‌حه‌تكردن بویه‌وه‌ له‌لایه‌ن ده‌زگاى ئاسایش رژیم به‌عس رمیاگ له‌وه‌ر هه‌ڵویسته‌یل نیشتمانى و ئۆپۆزسیۆنى ئه‌را رژیمه‌گه‌.

داوود سه‌لمان به‌شدارى فره‌یگ  كردگه‌ له‌ كۆنگره‌یل شبیبه‌ى دیموكرات جه‌هانى له‌ ده‌یشت عراق، وه‌ل ئه‌وه‌یشا جویر ئه‌ندام و كاپتن هه‌ڵوژارده‌ى جایه‌ڵ جوانه‌یل به‌شدارى كردگه‌ جویر ئه‌ساره‌یگ له‌ تووپ سه‌وه‌ته‌و هه‌ڵوژارده‌ى نیشتمانى عراقى و بیجگه‌ ئه‌وه‌یش له‌ پاڵه‌وانیه‌تى عه‌ره‌بى و ئاسیایى و جه‌هانیش دیاریه‌یل فره‌یگ  وه‌ده‌س هاوردگه‌. ئمجا له‌ كووتایى ساڵ 1991 خوه‌ى و خیزانى له‌تاو زوڵم و زوور رژیم به‌عس رویكردنه‌ ده‌یشت عراق و له‌ساڵ 1992 ره‌سیه‌ وڵات سوید و له‌ورا به‌شدارى كرد له‌ چالاكیه‌یل سیاسى و كوومه‌ڵایه‌تى له‌شار (ئه‌سكلستونا)ى سویدى و یه‌كیگ  بوى له‌ دامه‌زرنه‌ره‌یل یانه‌(نادى عراقى). وه‌لى داوود سه‌لمان ره‌مه‌زان فه‌یلى وه‌ داخ فره‌یگه‌وه‌ له‌ عومر 69 ساڵى رووژ جومعه‌ى چوار شووبات 2011 ماڵئاوایى یه‌كجارى له‌جه‌هان وه‌رزش و له‌گشتمان كرد وه‌سه‌به‌ب نه‌خوه‌شى دریژ ماوه‌یگ  ك مووڵه‌ت وه‌پى نه‌یا له‌یه‌ زیاتر بژیه‌یگ، وه‌لى خوه‌شبه‌ختانه‌ له‌شوون خوه‌ى تاریخ و ژیاننامه‌ى خاسیگ  پڕ له‌ ناودارى پاك هیشته‌سه‌جى ئه‌ڕامان، خاوه‌ن سێ كوڕه‌ وه‌ناو (یاسر، ساهر، سامر). هه‌زاران سڵام له‌گیان ئى پاڵه‌وان وه‌رزشكار كورد فه‌یلیه‌و گشت ناوداره‌یل كورد و كوردستان.