يه‌كڕزی ملله‌ت خواسته‌ ئه‌را زامنكردن سه‌ركه‌فتن

شفق نيوز

بيجگه‌ ئه‌و هه‌مگه‌ مه‌ينه‌تی و دابه‌شبوينه‌، تا رووژ ئمڕوويش ملله‌ت كورد نه‌تويه‌نستگه‌ بدێده‌ خاوه‌ن وتاريگ يه‌كگرتگ سياسی يا هه‌ڵويستيگ يه‌كگرتگ له‌وه‌ر كيشه‌يل نه‌ته‌وه‌يی و بتويه‌نن وه‌ يه‌ك ده‌نگ روی وه‌ڕوی رويداگه‌يل نه‌خوازرياگ بگريد.

هه‌ر له‌ی ماوه‌يه‌ چه‌نه‌ها رويداگ روی وه‌ڕوی كورد بويه‌سه‌و، وه‌لی ئاوازه‌يل هه‌ر يه‌كيگ له‌ليان وه‌ شيوازيگ خوه‌ننه‌ی، ك يه‌يش قويلتر كيشه‌يل ئه‌كاده‌و. ئمجا يه‌كيگ له‌ ئاره‌زووه‌يل سه‌رجه‌م ملله‌ت كورد و پيكهاته‌يل كوردستان ئه‌وه‌سه‌ ك هيز پێشمه‌رگه‌ی كوردستان يه‌كگرتگ بدێ دوير له‌ ره‌ينگدانه‌وه‌ی حزبی جوور ئه‌وه‌ك له‌ هه‌ڵويست سه‌رۆك هه‌رێم ئاماژه‌ وه‌پی كرياگه‌.

وه‌لی له‌يوا دياره‌ ئی يه‌كه‌وگرتن و يه‌كخستن پێشمه‌رگه‌ له‌ به‌رژه‌وه‌ندی تاكه‌ كه‌سه‌يليگ له‌ لايه‌نه‌يليگ سياسی نيه‌، ك يه‌يش خوه‌ی له‌ خوه‌ی له‌ به‌رژه‌وه‌ندی ملله‌ت نيه‌. بيگومان ئی ديد و دقه‌ته‌ چووده‌ خانه‌ و هوير وه‌رته‌نگ حزبايه‌تی تاكه‌لايه‌نی، يا ئه‌تويه‌نيم بويشيم به‌رژه‌وه‌ندی تاكه‌كه‌سی دوير له‌ خواست و هس نه‌ته‌وايه‌تی.

له‌لايگ تريشه‌و هيزيگ چه‌كدار ها له‌ هه‌وڵ خوه‌ی چه‌سپانن له‌بان خاك ئازادكرياگ كورستان، ك ساڵه‌های ساڵه‌ قوربانی ئه‌را ئی خاكه‌ درياگه‌و وه‌ خوين شه‌هيده‌يل نه‌مر قرمز بويه‌.

هه‌ڵبه‌ته‌ ئه‌وان بايه‌سه‌ ئه‌و پرسياره‌ له‌ خوه‌يان بكه‌ن، ك رزگاركردن ناوچه‌يل كوردستانی و كوردنشينه‌يل ئه‌وديم مه‌رز ئه‌ركيگ پيرووزتر نيه‌؟ ئايا ئه‌را ئه‌وان پيرووزتر نيه‌ كوردستان خوه‌رئاوا رزگار بكه‌ن له‌ده‌س رژيميگ شوفێنی دژ وه‌ خواست و ئيراده‌ی ملله‌تيگ؟

ملله‌ت كورد ئمڕوو ته‌نيا هه‌وه‌جه‌ وه‌ يه‌كڕزی و گونجيان و ريكخستن ناوماڵ خوه‌ی ديريد، ك يه‌يش زامن سه‌ركه‌فتنه‌و ره‌سينه‌ وه‌ ئامانجه‌يلی. ك بايه‌سه‌ ئمڕوو ئه‌وه‌يش له‌وه‌رچه‌و بگريم ك بريارده‌يل سياسی جه‌هانی پشتگيری و هاوكاری كورد ئه‌كه‌ن، ك وه‌و خاتريشه‌ نادێ ئه‌و شيوازه‌يل ئه‌ڕای چوينه‌يله‌ بدێده‌ وه‌ربه‌سيگ له‌ وه‌رده‌م هاوكاری و پشتگيری ملله‌ته‌گه‌مان.

شێركۆ حه‌بيب

ج . أ