ئازادى هه‌میشه رێژه‌یى ئه‌مێنێده‌و
وه گوره‌ی ئه‌وه‌گ له كومه‌ڵگا و ده‌وڵه‌ته فره دیموكراته‌گانیش ئازادى راده‌ربڕین له‌لایه‌ن مه‌ردم هه‌ر رێژه‌ییه‌و ستانداردێگ جه‌هانى, یا ئه‌نجامێگ ماتماتیكى نه‌يرێ. هه‌رچه‌ن ئازادى هویرو را له فره وڵات تا راده‌ى ره‌ها په‌یڕه‌و ئه‌كريه‌ێ, وه‌لی وه‌رپرسیاره‌تیه‌يل كومه‌ڵایه‌تی هه‌ميشه جوور یه‌كێگ له‌پێكَهاته‌يل سه‌ره‌كی له‌وه‌رچه‌وگردن مه‌رز ئازادى ئه‌مێنێده‌و.
له‌و كومه‌لگايله ك ئاست رووشنهويرييان وه‌و جووره‌گ باه‌يد بوود گه‌شه نه‌كردگه, ئازادى هویر و ڕا ك جیاوازى هویر و رايش له‌لی ئه‌كه‌فێده‌و و ئه‌دێده مايه‌ی ناته‌بایى و په‌رشوو بڵاوی و یه‌كنه‌گرى, تا له ئامانجه نيشتمانى و باوه‌ت هویروراى ئازاد جوور ئه‌وه‌گ جوور مه‌رجيگ سه‌ره‌كى بوين ئازادى و دیموكراسى ته‌ماشای ئه‌كريه‌ى له دیارده مۆدێرن و ستراتیژیه‌گانیش. هه‌رچه‌ن یه‌كده‌نگى و یه‌كره‌نگیش نیشانه‌یگ ساق نیه ئه‌را بوار ئازادى راده‌ربڕین و شايه‌د نیشانه‌ى ئاراسته‌كردن له‌بان بوود. ئوميد وه‌ده‌سهاوردن رزگارى, ئاشتى, یه‌كسانى كومه‌ڵایه‌تى, ئازادى قسه‌كردن, وه دريژایى مێژووى مرۆڤایه‌تى وه‌رده‌وام جی بایه‌خ و سه‌رنج ئايمه‌يل بويه‌و گرنگى سه‌رده‌مه‌يله.
هه‌رێم كوردستان جوور نموونه‌یگ ك ئازادى راده‌ربڕین له‌تی به‌رقه‌راره, راسه فره له ده‌زگايه‌يل ره‌سانن و بڵاوه‌وكرياگه‌يل ك ئاراسته‌يل سیاسى جووراوجوور له‌تیان ره‌نگه‌و ئه‌ياد, فره جار بارودۆخ وه‌ره‌و شێوايشێو
به‌ن وه‌لی وه باوه‌ڕ من جارێ وه‌زعه‌گه تا راده‌يگ قه‌یران نه‌ورديه‌سه نوا, چوينكه له فره‌تر دام و ده‌زگاو ناوه‌ندو بڵاوه‌وكرياگه‌گان نويسه‌ر و په‌يامنێر و رووژنامه‌وان پيشه‌یى و ئه‌ركناس و وه توانا هه‌س ك له‌شوون راسیه‌يل گه‌ردن, زانیاریه‌يل جوور خوه‌ى ره‌سنن, ئه‌وان وه‌رده‌وام پرسیار ئاراسته كه‌ن, پیشنیار ده‌ن, هووشیارى به‌خشن ئه‌را ئه‌وه‌گ هاووڵاتیه‌يل زیاتر ئاگادار كار و ئه‌ركه‌یليان بوون. ئه‌وان وه‌و شیوه كیان و وه‌ر په‌یكه‌ر دیموكراسى كه‌ن. ئه‌وان ئه‌رك فره سه‌خت و دژوار گرنه مل, تا زه‌مینه‌ى ده‌سڕه‌سين وه هویرو راى ئازاد بره‌خسنن, وه‌و شێوه‌یشه چه‌ودێریيگ چالاكانه‌ى ده‌سه‌ڵات و كاره‌يلى كه‌ن. دیاره بى ئه‌وه‌يش راى ئازاد و رووژنامه‌ى ئازاد نيه‌تويه‌نێ مانایگ داشتوود. وه‌يخاتريشه له‌گشت وڵاته‌يل راده‌ى ئازادى و دیموكراسى وه پێوه‌ر ئازادى رووژنامه‌وانى ك روكن بنه‌ڕه‌تى ئازادى راده‌ربڕین ئازاده پێوه‌ر كريه‌ێ.
ئه‌گه‌ر بويشيمن هویروراى ئازاد ئامانج وه دیموكراتیزه كردن كومه‌ڵگاس، ئه‌وه ئيسه له هه‌رێم كوردستان ئه‌و هه‌قه‌يله وه‌ته‌واوى ده‌سه‌وه‌ر كرياگه‌و ژیان مه‌عنه‌وی و سایكۆلۆژى نيشته‌جايه‌يل هه‌رێم شارستانیانه تر و مرۆڤانه‌تر كردگه. وجوود زه‌مینه‌و فه‌زایگ ره‌ها ئه‌را ده‌ربڕین راى ئازاد, جوور پره‌نسیپێگ له گشت بواره‌يل ره‌سانن وه نويسرياگ و دوینرياگ و ژنه‌فرياگ له لایه‌ن ده‌سه‌ڵاته‌و دگان وه‌پی نرياس و رووژ وه رووژیش زیاتر جوواو ئه‌رێنى داخوازیه‌يل روى له‌زیاێ كومه‌ڵگا ئه‌ياده‌و و ئاسۆیگ فراوانترو رووشنتر وه‌روى ملله‌ته‌گه‌مان ئه‌كاده‌و.
ئه‌گه‌ر گشت چشته‌گان وه‌گوره‌ى یاساو پێشبینیه‌گان وه‌ره‌و نوا بچن, فره وه‌پی نيه‌چوود ك هه‌رێم ئه‌دێده خاوه‌ن گشت ئه‌و ئازادیه‌يله ك له جاڕنامه‌ی ماف مرۆڤ ئاماژه وه‌پی كرياس. له‌ێره وه‌گوره‌ى گشت پێوه‌ریك ئازادى راو نويسین و قسه‌كردن ديرێ, ئه‌را ئسبات كردن ئه‌و را بايه‌د بويشيمن ك له‌يره ره‌سانن ئۆپۆزسیۆن فره له ره‌سانن ده‌سه‌ڵات ئازادتره, تا ئه‌و كڕه‌يل سنوور ئاسایشى نیشتمانى سیاسه‌ته ستراتیژیه‌گان مێژوو, به‌ها نه‌ته‌وه‌ییه‌گان , سانسۆرێگ خوه‌یكردگ ئه‌خلاقى و ره‌سانن پارته‌يل ده‌سه‌ڵاتدار دروسكردگه, هه‌رچه‌ن ده‌زگايه‌ىل ره‌ساننى ئۆپۆزسیۆن ئه‌و سانسۆره‌يل خوه‌يكردگيشه له‌وه‌رچه‌و ناگرێ.
بدر اسماعیل شیرۆكى
