گه‌دايی ده‌نگ

شفق نيوز

 

گشت وڵاته‌يل جه‌هان له‌ مه‌رزه‌يليان ده‌روازه‌يگ ئه‌را په‌ڕينه‌وه‌ وه‌ شيوه‌يگ فه‌رمی واز ئه‌كه‌ن و گه‌شته‌كه‌ره‌يل هامشوو له‌ليه‌و ئه‌كه‌ن، ته‌نانه‌ت ئه‌و وڵاته‌يليشه‌ ك مه‌رز له‌ ناونيان نه‌مه‌ندگه‌ جوور يه‌كێتی ئۆرپا گه‌شتياره‌يليان هه‌ر له‌ ده‌روازه‌يل فه‌رميه‌و هامشوو ئه‌كه‌ن و كه‌س په‌نا نيه‌وه‌يده‌ وه‌ر ڕيه‌يل ناياسايی و حورمه‌ت ياسا ئه‌گريد.

ئه‌وه‌ك ئيسه‌ هه‌رێم ئه‌كاده‌ی هه‌ر ئه‌وه‌سه‌و دی موزايده‌ وه‌ كه‌ڵك چه‌ بايد، ئايا ئه‌وه‌انه‌ك ئويشن با مه‌رز نه‌ودو پاسه‌وان مه‌رز كار خوه‌ی نه‌كاو با مه‌ردم له‌ قاپی فه‌رمی وڵاته‌و هامشوو نه‌كا، چ نه‌فيگ ره‌سننه‌ ئی هه‌رێمه‌، يه‌يش له‌وه‌ختيگ ئه‌وانه‌ خاس زانن ئه‌گه‌ر ئه‌و مه‌رزه‌يله‌ وه‌ره‌لا بكريه‌يد رووژانه‌ چه‌نيگ ترۆريست خوه‌ی ئه‌كاده‌ ناو هه‌رێم، ك زوورميان بنه‌وبارگه‌يان نزيك مه‌رز هه‌رێمه‌و هه‌ميشه‌ چه‌وه‌ڕی ده‌رفه‌تيگن تا دزه‌ بكه‌ن ناو هه‌رێم و كار ترۆريستی خوه‌يان ئه‌نجام بيه‌ن.

ئايا ئه‌وانه‌ نازانن وه‌و كاره‌يليانه‌ ده‌سميه‌ت فريه‌يگ ترۆريسته‌يل و ناحه‌زه‌يل ئی هه‌رێمه‌ ئه‌يه‌ن، يه‌يش بيجگه‌ قاچاخچيه‌يل ك چه‌نيگ كارئاسانی ئه‌رايان ئه‌كه‌ن.

ئايا هه‌ركه‌سيگ خوه‌شی بايد له‌ وڵات خوه‌ی جوور چه‌وه‌يلی مقه‌يه‌تی له‌لی ناكاو هه‌وڵ ئه‌وه‌ نيه‌يد مه‌رزه‌يل خوه‌ی بته‌و بكا ئه‌را ئه‌وه‌ك ناحه‌زه‌يل و نه‌ياره‌يل دزه‌ له‌ليه‌و نه‌كه‌ن؟

باوه‌ت فريه‌س ئه‌را په‌ياكردن پشتگيری ده‌نگده‌ره‌يل هه‌رێم كوردستان، هه‌رچه‌نی ده‌نگده‌ره‌يل هه‌رێم دويای ئه‌و چه‌نه‌ها ساڵه‌ ئه‌وه‌نه‌ هوشيارن مه‌حاڵه‌ وه‌و جووره‌ بانگه‌وازه‌يله‌ هه‌ڵخه‌ڵتيه‌ن و ئيمه‌يش باوه‌ڕمان ئه‌وه‌سه‌ ئه‌و لايه‌نه‌يله‌ ك فريه‌ له‌بان ئی مه‌سه‌له‌ قسه‌ ئه‌كه‌ن له‌ ئاكام هه‌ر خوه‌يان زه‌ره‌دمه‌ن بوون، چوينكه‌ هويچ هاووڵاتييگ نيه‌ ك نه‌خوازيد مقه‌يه‌تی وڵاته‌گه‌ی خوه‌ی له‌ ترۆريست و قاجاخچيه‌يل بكا، هه‌ر وه‌و خاتريشه‌ ئويشيم ئه‌يه‌ گه‌مه‌يگ سه‌رنه‌كه‌فتگه‌ ئه‌را هه‌ر لايه‌نيگ ك خوازيارن وه‌ی كاڵا گه‌دايی ده‌نگ له‌ ده‌نگده‌ره‌يل بكه‌ن.

سه‌لام عه‌بدوڵڵا

ج . أ