بانگ هه‌ق دریا، ئه‌ى هه‌ق ها كوو؟!!

شفق نيوز

سته‌مكاریه‌ له‌ناو بچوود و له‌ كووڵ عراقیه‌یل سته‌مدیده‌ بووده‌و و ناوى بكه‌فیگه‌ ناو زبڵدان تاریخ، رژیمیگ بوى دكتاتۆر و مامڵه‌ى وه‌ل ملله‌تا ئاسن و ئاگر بوى، عراقیه‌یل بیبه‌ش كردویگ له‌گشت خه‌یر وبه‌یریگ ، وه‌بان ئه‌وه‌یشه‌و رووژگاریگ  به‌ختكه‌رى(تبرع) له‌ماڵه‌یل گرده‌و كردیاگ ئه‌را ئه‌وه‌ك وه‌رده‌وامى به‌یگه‌ جه‌نگ وه‌ل وڵات هاوساى خوه‌یا، جه‌لاده‌یلیگ هاوردیاگه‌ كار ئه‌را سزاداین مه‌ردم بیتاوان ك هویچ به‌زه‌ییگ له‌ وژدانیان نه‌وى، وه‌ چه‌و خوسه‌و كینه‌ت ته‌ماشاى ڕوڵه‌یل ئى وڵاته‌ كردیاگ، ته‌نانه‌ت مرویژه‌ و په‌خشه‌یش له‌ناو ماڵه‌یلمان كردویگه‌ سیخوڕ له‌لیمان، بیجگه‌ ئه‌وه‌یش جایه‌ڵ و پیره‌یلیش خه‌ریك كردویگ وه‌ سه‌ربازى و سوپاى مللى(جیش الشعبی)و له‌ى دویاخریشه‌ فه‌وجیگ وه‌ناو فیدائیه‌یل سه‌دام دامه‌زران ك كه‌س نه‌ویرس له‌تاویان هه‌ناس بیه‌یگ ، ئه‌وه‌ بوى وشك وته‌ڕ وه‌یه‌كه‌و سزان و نه‌ ئنسانیه‌ت و نه‌یش دادگه‌رى داشت له‌ڕه‌فتار و هه‌ڵسووكه‌فت، په‌ت سێداره‌و مه‌كینه‌ى هه‌نجانن ئاده‌میزاد كردویگه‌ هووكار ترس و توقانن مه‌ردم بیتاوان، ته‌نانه‌ت دام وده‌زگایه‌یل مه‌ده‌نییش له‌مه‌ردم بویده‌ ده‌زگاى هه‌واڵگرى(استخبارات) و بیجگه‌ ئه‌وه‌یش له‌ناو مه‌زارگه‌ى ئیمامه‌یلیش ژن وپیاو سیخوڕ(جاسوس)دامه‌زرانویگ و زیاره‌تچى دڵنیایى نه‌یاشت وه‌بى مزه‌ڕه‌ت بایگه‌ ده‌یشت.

ئمجا له‌ى باوه‌ته‌ مه‌به‌سمان ئه‌وه‌سه‌ ك بزانیم له‌شوون ڕمیان ئه‌و رژیم دكتاتۆر و سته‌مكاره‌ وه‌زعه‌گه‌ چوین ئاڵشت بوى و مه‌ردم زوڵملیكریاگ چه‌ وه‌سه‌ریان هات؟ ئایا ئه‌و قه‌وڵه‌یله‌ ك زویتر وه‌رجه‌ ڕمیان دریا مه‌ردم و چینه‌یل كومه‌ڵگا ڕه‌سیه‌ كووره‌؟

بانگ هه‌ق دریا، ئه‌ى كووا هه‌ق؟ بیگومان ئه‌وه‌ك وه‌ناو ئومید و ئاره‌زوو هه‌ڵهه‌ڵه‌ى خوه‌شى دا، ئه‌وه‌ك وه‌ته‌ما بوى ناهه‌قى نه‌مینیگ و هه‌ق بایگه‌و، ئه‌وه‌ك وه‌ى دیموكراسى گه‌نیاگه‌ دڵخوه‌ش كرد، ئه‌وه‌ك تواس خوین شه‌هیده‌یلى نه‌چوود وه‌زاى، ئه‌وه‌ك له‌خوه‌یا ماڵ وموڵك زه‌فت كریاگى تیه‌ریه‌یگه‌و، گشت ئه‌یانه‌ خه‌و و خه‌یاڵ بویه‌ تا رووژ ئمڕوو.

كوردستان هیمان كوورایى چه‌و دوشمنه‌یله‌ و تا دویه‌كه‌ زوورم وه‌رپرسه‌یل حكوومه‌ت نمه‌ك كورد كردیان ك له‌شوون راپه‌ڕینه‌گه‌ى وه‌هار 1991 كۆنگره‌و دانیشتنه‌یل ئۆپۆزسیۆن له‌بان خاك كورده‌یل له‌ كوردستان ئه‌نجام دریا و خوه‌مان وه‌ته‌نى ڕیخ برایى وه‌ل كوردا نانه‌ چاڵ، وه‌لى دیاره‌ ئه‌و نان و نمه‌كه‌ وه‌پیان حه‌رام بوى و نیه‌توان دگان وه‌ هه‌ق كوردا بنه‌ن وه‌بى كیشه‌و گرفت.

كورده‌یل فه‌یلى ك یه‌كه‌مین قوربانیده‌ر بوین و ماڵ و موڵك و دارایى و خوین پاك ڕوڵه‌یلیان كردنه‌ قوربان ئى خاك و نیشتمانه‌، كووا هه‌قیان؟ كووا ئه‌و قه‌وڵه‌یله‌ وه‌پیان دریا؟ ئه‌ڕاچه‌ تا ئیسه‌یش بایه‌سه‌ له‌ژیر ره‌حمه‌ت و به‌زه‌یى ناهه‌قه‌یل بژیه‌ن؟ ئه‌ڕا چاره‌نویسیان كلیله‌و حكوومه‌ت هه‌ڵوژریاگ عراق ساڕیژ زه‌خم قویل پڕ له‌ ژانیان ناكا؟ ئایا ئى چین زوڵملیكریاگه‌ شایسته‌ى ئه‌وه‌ نین هه‌قه‌یل زه‌فتكریاگیان بدریه‌یگه‌و ك وه‌ دریژایى چه‌ن ده‌یه‌یگ له‌وڵات ره‌سه‌ن باوگ و باپیره‌یلیان ده‌ركریان و پیسترین تاوان ده‌رهه‌قیان ئه‌نجام دریا؟

فره‌جار ژنه‌فیم له‌ده‌م وه‌رپرسه‌یل و بڕیگ له‌ سیاسیه‌یل و ده‌سڵاتداره‌یل له‌وه‌خت گفتوگوو یا تاوتویكردن مه‌سه‌له‌ى كورده‌یل فه‌یلى ك ئویشن: ئى مه‌ردمه‌ هه‌وه‌جه‌ وه‌ یه‌كده‌نگى و یه‌كڕه‌نگى و جموجویل و گامناین جددیگ دیرن ئه‌را ئه‌وه‌ك بتویه‌نن هه‌قه‌یلیان بارنه‌و، ئى قسه‌ تاڕاده‌یگ تویه‌نیم بویشیم جى خوه‌ى گریگ ، وه‌لى ئایا ئیمه‌ ئه‌را گشت زوڵمیگ و گشت كاره‌ساتیگ ك هاتیه‌سه‌ تویشمان و گشت وه‌رپرسه‌یل وڵاته‌گه‌یش هه‌ر له‌ سه‌رۆكایه‌تى كومار و سه‌رۆكایه‌تى وه‌زیره‌یل بگر تا ڕه‌سیگه‌ په‌رله‌مان و بویچگترین ده‌زگایگ حكوومى كیشه‌ى كورده‌یل فه‌یلى جویر جامه‌ك له‌وه‌رچه‌ویان دیاره‌ و خاسیش زانن ك هه‌ق وه‌پیان ڕه‌واس، ئه‌ى دى له‌وه‌رچه‌ پشت له‌و هه‌قه‌ كه‌ن و مه‌هانه‌ى جوراوجوور دروس كه‌ن ئه‌را ئه‌وه‌ك له‌هه‌ق لابیه‌ن؟ مه‌گه‌ر ئه‌وان نیه‌زانن ك مه‌یدان بازرگانى و ئابوورى ئى وڵاته‌ رووژگار فره‌یگ وه‌ده‌س كورده‌یل فه‌یلیه‌و بویه‌ و بیجگه‌ ئه‌وه‌یش له‌بان ده‌س رژیم به‌عس و شۆڤینیه‌یل گشت موڵكه‌یلیان زه‌فت كریا و ئه‌و خوینه‌ ك یه‌كمجار رشیا له‌بان ئى خاكه‌ خوین ڕوڵه‌یل بى سه‌روشوون كورده‌یل فه‌یلى بوى و تائیسه‌یش قه‌وره‌یلیان نادیاره‌؟ یه‌ كام هه‌ق و دیموكراسیه‌ شوناسنامه‌گه‌م نیه‌یگه‌و؟ چ دادگه‌رییگه‌ له‌ى وڵاته‌ ك بڕیار دادگاى باڵاى تاوانه‌یل وه‌جى نیه‌ڕه‌سنیگ ؟ ئه‌یه‌ كام په‌رله‌مانه‌ له‌جه‌هان دژ چاره‌نویس و هه‌ق ڕه‌واى ئاده‌میزاد زوڵملیكریاگ بوود و له‌وه‌رانوه‌ر هه‌ق كپ وبیده‌نگ  بوود و ئه‌ندامه‌یلى قاعه‌ى په‌رله‌مان بیلنه‌جى و گرنگى یا ئه‌همیه‌ت نه‌یه‌نه‌ گه‌وراترین كیشه‌ى هاووڵاتیه‌یل وڵاته‌گه‌یان؟

پرسیاره‌یل فره‌یگ له‌سه‌رم جه‌مه‌و بویه‌، وه‌لى نیه‌زانم له‌لاى چ ده‌سڵاتدار خه‌مخوه‌ریگ جواو پڕ له‌باوه‌ڕ ئه‌ڕایان بكه‌مه‌ دى! خوه‌زگ بزانم كى ڕوى خوه‌ى سیه‌ كردگه‌ و نیه‌یلیگ خاوه‌ن ماڵ له‌ماڵ خوه‌ى بژیه‌یگ و هه‌ق ئه‌را خاوه‌ن هه‌ق بایگه‌و و كیشه‌ و گرفت چینه‌یل كومه‌ڵگا چاره‌سه‌ر بوود و دار خه‌یر و به‌ردار بكاڵیه‌یگ و شوونه‌وار رژیمیگ گه‌ناته‌كار و خوینمژ بكوشیه‌یگه‌و و ئاوه‌دانى و خوه‌شگوزرانى و گونجیان و ئاشتى سه‌قامگیر بوود و ریڕه‌و راس و دروسیگ بگیریگه‌وه‌ر؟!