جه‌نگ به‌ڵگه‌نامه‌یل ئاشكرا نه‌كریاگ

شفق نيوز

 

ئه‌وه‌سه‌ كاره‌یل هه‌واڵگرى و سیخوڕى له‌ سایه‌ى بازى سیاسى ئیچنه‌ ئه‌كا فره‌جار نهێنى و ئامانجه‌یل سیخوڕى گوزه‌یشته‌ و ئاینده‌ى وڵاتیگ یا پارتیگ سیاسى له‌ ڕى كه‌سیگه‌و بكه‌فیده‌ بان لاپه‌ڕه‌ى رووژنامه‌و سایته‌یل ئه‌لكترۆنى، ك دویاخریش ئه‌و وڵات و لایه‌ن سیاسیه‌ له‌وه‌رده‌م ئیراده‌ى ملله‌ت خوه‌ى و راى گشتى دوچار ناڕه‌حه‌تییگ سیاسى و شه‌رمه‌زارى بوودو ده‌رئه‌نجامیش ئه‌را چه‌نه‌ها ساڵ شوونه‌واره‌گه‌ى هه‌ر مینید له‌بان ریڕه‌و سیاسى حوكمڕانى ئه‌و وڵات و لایه‌ن سیاسیه‌.

له‌تاریخ چه‌نه‌ها رویداگ له‌و جووره‌ دیمنه‌و ژنه‌فتیمنه‌، ك نزیكترینیان بڵاوكردنه‌وه‌ى به‌ڵگه‌نامه‌یل ئاشكرا نه‌كریاگ سیاسى و دبلۆماسى ئه‌مریكى بوى له‌ ماڵپه‌ڕ " ویكیلیكس " ك نزیكه‌ى یه‌ك ملیۆن به‌ڵگه‌نامه‌ى ئاشكرا نه‌كریاگ و دبلۆماسى حكوومه‌ت ئه‌مریكا بوى. ئمڕوویش دوینیم ئى مه‌سه‌له‌ى وه‌ده‌رخستن به‌ڵگه‌نامه‌یلیشه‌ له‌ هه‌رێم كوردستان له‌ناونى به‌ره‌ى ده‌سڵات و ئۆپۆزسیۆن وه‌ ئاشكرا دیاره‌و هه‌ر رووژیگ وه‌ مه‌هانه‌یگ لایه‌نیگ ئه‌واكه‌ى تر ئه‌خاده‌ ناونى ته‌مه‌ت و خیانه‌ت و ...هتد.

وه‌باوه‌ڕ ئیمه‌ ئه‌و دژایه‌تیكردن یه‌كترى ناونى لایه‌نه‌یل سیاسى كورده‌، هویچ خزمه‌تیگ نه‌ وه‌خوه‌یان نه‌یش وه‌ بار ئیسه‌و ئاینده‌ى كوردستان نیه‌ڕه‌سنید، به‌ڵكوو قانجازكه‌ر سه‌ره‌كى ئه‌و كیشمه‌كیشه‌یله‌ وه‌ پله‌ یه‌ك ناحه‌ز و نه‌یاره‌یل ملله‌ت كوردن، هه‌ر له‌وه‌ر ئه‌وه‌یش دوینید مه‌كینه‌ى ره‌سانن خوه‌یان خه‌نه‌ كار و خزمه‌ت وه‌ تومه‌تباركردن یه‌كترى كه‌ن له‌ڕى ئاشكراكردن لاپه‌ڕه‌یل دویه‌كه‌، ئنجا ئایا ئامانج سیاسى له‌ى كرده‌وه‌و گامه‌یله‌ چه‌بوود؟

وه‌لى خاستر ئه‌وه‌سه‌ دیمه‌نه‌یل ئاینده‌مان وه‌ جوانى نمایش ئه‌را نه‌وه‌یل دویارووژ بكریه‌ن و گرینگى بدریه‌یده‌ به‌رژه‌وه‌ندى گشتى تا نه‌وه‌یل ئاینده‌ نه‌ف وه‌ربگرن له‌ ژیانیگ ئارام و دویر له‌ كیشمه‌كیش و ئه‌وانیش گام غه‌ڵه‌ت نه‌نه‌ن له‌وه‌ر خاتر مه‌رام و ئامانجیگ تاكه‌كه‌سى و حزبى.

سالار سادق

ج . أ