كووچكردن وه‌ هووكاره‌يل ده‌روينيه‌و

شفق نيوز

مه‌ردمان وه‌جه‌ميگ له‌ ژن و پياگ و مناڵ و پير له‌رى باكوور سورياوه‌ روى له‌ توركيا كردنه‌و له‌ورايشه‌و ئه‌را يۆنان و مه‌قدۆنياو ئه‌را نه‌مسا و ئه‌ڵمانيا له‌ڕى مه‌جه‌ره‌و، له‌ وه‌رانوه‌ر ئه‌وه‌يش كووچكردنيش هه‌س وه‌ره‌و وڵاته‌يل عه‌ره‌بى و ئه‌مريكيه‌، ئمجا مه‌زه‌نه‌يليگ ئاماژه‌ وه‌ گومبوين سوريا ئه‌كه‌ن وه‌ يه‌كجارى وه‌ بوونه‌ى كوشت و كوشتار و كيشمه‌يكش وه‌رده‌وام له‌ ناونى هيزه‌يل گه‌ورا ك ئى خاكه‌ كردنه‌سه‌ شوون مه‌رگ و قورتاربوين له‌تى مه‌حاڵه‌ ته‌نيا مه‌گه‌ر واين وه‌ره‌و وڵاته‌يل تر.

له‌ عراقيش مه‌ردم له‌وه‌ر هووكاره‌يل فريه‌و جوراوجوور كووچ ئه‌كه‌ن، چوينكه‌ وڵاته‌كه‌ ناڵان وه‌ده‌س جه‌نگ ئه‌هلى و تايفيه‌و له‌شوون ساڵه‌يل كه‌ميگ له‌ هاتنه‌ناو ئه‌و هيزه‌يل بيگانه‌ ك رژيم سياسى رمانن و عراق كردنه‌ مه‌يدانيگ وه‌رده‌وام كيشمه‌كيش و سورياى ئه‌سه‌ديش يه‌كيگ بوى له‌و وڵاته‌يله‌ ك كار خراوكارى له‌تى ئه‌نجامدا و ركابه‌رى كرد له‌ى رويه‌و وه‌رجه‌ گشت وڵاته‌يليگ تر و وه‌رجه‌ ئاژاوه‌گه‌ى له‌ ساڵ 2011.

ئى مه‌سه‌له‌يشه‌ له‌يوا له‌ كرده‌ عراق بدێده‌ شوونيگ ئه‌را به‌رزه‌وبوين چينه‌يليگ كومه‌ڵايه‌تى وه‌ بوونه‌ى ئالشتكارى سياسى و ئابوورى وه‌رده‌وام، ئمجا وه‌ل ئه‌و هه‌مگه‌ جه‌نگ و كيمشه‌كيش سه‌خت و ركابه‌ريه‌يل سياسى له‌كه‌داره‌ نه‌خوه‌شى گه‌ناته‌كارييش روى كرده‌ جه‌سه‌ى عراقيه‌يل و كه‌مه‌ كه‌مه‌ خزيا ناو ده‌زگايه‌يل حكومى وه‌ ته‌مامى و فراكسيۆنه‌يل سياسى هه‌ر يه‌كيگ له‌ليان بوينه‌ گرووپيگ ئه‌را جه‌مه‌وكردن دارايى و ئداره‌كردن كيشمه‌كيش و هويچ وه‌ختيگ گووش نه‌يانه‌ هه‌وه‌جه‌يل ملله‌ت.

ئه‌وه‌ بوى مه‌ردم عراق تويش مه‌ينه‌تى و بيكارى هاتن و ژيرخان ئابوورى ويران كرياو خه‌زينه‌ى گشتى دزرياو ئاسوويگ ئه‌را ئاينده‌ له‌تى ديار نه‌وى و گشت كه‌سيگ هس وه‌ گومبوين كردن و سياسيه‌يليش هويريان ته‌نيا هه‌ر له‌لاى گرده‌وكردن پويل مه‌ند و ره‌وانه‌كردنى ئه‌را ده‌يشت وڵات و خيزانه‌يليانيش له‌ وڵاته‌يل تر جيگير كردن.

ئمجا له‌ى حاڵه‌ته‌ واين له‌ عراق بويه‌ هه‌وه‌جه‌يگ ده‌روينى و زوورم ئه‌وانه‌گ كووچ ئه‌كه‌ن له‌ شوونه‌يليگ پر ئاسايش ژيه‌ن له‌ناوڕاس و باشوور عراق و فريه‌يگيش له‌ليان كاركه‌ر و خاوه‌ن پويل و ماڵدارن، وه‌لى نگه‌رانن له‌ ئاينده‌و متمانه‌ وه‌ حوكمه‌ نه‌يرن و پيشبينى بار خراوتر ئه‌كه‌ن و له‌ حاڵه‌تيگ ناجيگير ده‌روينى كوشنده‌ ژيه‌ن ك له‌يوا له‌ليان ئه‌كا سه‌ر خوه‌يان هه‌ڵگرن وه‌ره‌و دويرترين شوون له‌ى جه‌هانه‌ ئه‌را قورتاربوين له‌ نيشتمانيگ ك ناوى عراقه‌.

هادى جله‌و مه‌رعى