خوه‌زگ(ئاراس)وه‌گشت شار و شاروچكه‌یل كوردستانا گوزه‌ر بكرداگ

شفق نيوز

چه‌ونه‌ترسى و پاڵه‌وانیه‌تى كه‌ڵه‌پیاوه‌یل و ناودار و نه‌مره‌یل كورد كه‌ن، ك تاریخ شایه‌تى ئه‌ڕایان داگه‌و له‌ناو لاپه‌ڕه‌یلى توومار كریانه‌.

باوگ نه‌ته‌وه‌ى كورد بارزانى نه‌مر گشت دونیا زانیگ چ ئاده‌میزاد و سه‌ركرده‌و پیشمه‌رگه‌یگ بویه‌، ك هه‌میشه‌ به‌رژه‌وه‌ندى ملله‌ته‌گه‌ى خسته‌ نواى گشت چشتیگه‌وه‌و گیان خوه‌ى له‌وه‌ر خاتر  سه‌رفرازى و ئازادى ملله‌ت به‌ختكرد. له‌ڕاسى ئه‌و ئاده‌میزاد هه‌میشه‌ زنگه‌ جموجویلیگ پڕ له‌شانازى و گه‌ورایى له‌تاریخ كورد چه‌سپان و له‌ى جووره‌ باوه‌ت كوڵیگ نیه‌تویه‌نیم هه‌ق ئه‌و هه‌مگه‌ شه‌كه‌تى و خه‌بات و شووڕشه‌یلیه‌ وه‌پى به‌یم، ك هویچ وه‌ختیگ له‌ژیانى بى خه‌م ملله‌ته‌گه‌ى نه‌ژیا.

مه‌لا مسته‌فاى بارزانى ئه‌و سه‌ركرده‌ بوى ك مایه‌ى سه‌رسوڕ مه‌ندن ملله‌ته‌یل تر غه‌یر كوردیش بوى، ئه‌ویش وه‌ شایه‌تى پێشه‌وا قازى محه‌مه‌د له‌وه‌ختیگ ك كه‌فته‌ده‌س دوشمنه‌یل كورد و هه‌واڵ بارزانى نه‌مر له‌لى پرسین و تواسیان زانیارى زیاتر له‌بانى وه‌ربگرن و چه‌ودیرى جموجویلى بكه‌ن و ده‌یه‌ها پرسیار له‌باوه‌تیه‌وه‌ ئاراسته‌ى سه‌ركوومار كوردستان كریاو ئه‌ویش له‌جوواو پرسیاره‌یلیان وتیاگ:"مه‌حاڵه‌ ئیوه‌ بارزانى نه‌مر بناسین، چوینكه‌ بارزانى ئه‌و سه‌ركرده‌سه‌ ك دڵه‌ڕاوه‌كى له‌لادان به‌رقه‌رار كردگه‌و نه‌خشه‌و نیازه‌یلى له‌ ئیراده‌ى پاك و بیگه‌ردیگه‌وه‌ سه‌رچه‌وه‌ گرتگه‌و گیانفیداى ملله‌ته‌". بارزانى نه‌مر ئه‌و سه‌ركرده‌ى هه‌ڵكه‌فتگه‌ بوى ك دوشمن له‌ناو قه‌وریش هه‌ر ترس له‌لى داشتنه‌و سڵ له‌لى كردنه‌، تا ئه‌و ڕاده‌ ك رژیم دكتاتۆر به‌عس هه‌وڵ ئه‌وه‌ داگه‌ ته‌رمه‌ پیرووزه‌گه‌ى بدزیگ  له‌وه‌ختى له‌شار شنۆ وه‌خاك سپاریاویگ ، ئنجا ئایا ئى جووره‌ سه‌ركرده‌یگ  تاریفى چوینه‌؟ بارزانى نه‌مر هویچ وه‌ختى بى به‌رنامه‌ نه‌ویه‌ ئه‌را هه‌ر رویداگیگ و سه‌ره‌تایش پیشبینى گشت رویداگیگ كردگه‌و هه‌رچى وتگه‌ راس ده‌رچیه‌، هه‌میشه‌ خوه‌یشى جویر پێشمه‌رگه‌یگ چه‌ك له‌شان وه‌ سه‌ختى جه‌وه‌ڵه‌یلا له‌وه‌ره‌ده‌م هیزه‌گه‌ى جویر قه‌ڵغانیگ بویه‌و روح مه‌ردانه‌و ئازایه‌تى به‌خشاسه‌ جه‌نگاوه‌ره‌یل كورد. وه‌لى جى داخه‌ بارزانى نه‌مر هویچ ده‌وڵه‌تیگ پشتگیرى نه‌وى وه‌تایبه‌ت ده‌وڵه‌ته‌یل گه‌وراهیز ك له‌وه‌ر خاتر به‌رژه‌وه‌ندى خوه‌یان پشت له‌لى كردن و یه‌یش له‌ناونى چوار ده‌وڵه‌ت دوشمن، وه‌ته‌نیا هه‌ر وه‌ئازایه‌تى خوه‌ى مقه‌یه‌تى له‌ مه‌ندنه‌وه‌ى ملله‌ت كورد كردیاگ، ك هه‌میشه‌ هه‌وڵ وته‌قلاى ئه‌وه‌ بوى هه‌قه‌یل زه‌فتكریاگ كورد له‌ژیرده‌س داگیركه‌ره‌یل باریگه‌وه‌و كوردستان بڕه‌سنیگه‌ سه‌روه‌خوه‌یى و ئازادى جویر ملله‌ته‌یل تر دونیا.

ئه‌وسا له‌ناو كورده‌وارى خوه‌مان وتیان هه‌ركه‌سیگ مه‌لا مسته‌فاى بارزانى بوینیگه‌ خه‌و خه‌یر تیه‌یگه‌ تویشى، هه‌ڵبه‌ته‌ ئى قسه‌یشه‌ به‌ڵگه‌داره‌و دروو نیه‌، چوینكه‌ بارزانى نه‌مر هه‌رچه‌نى سه‌ركرده‌یگ سیاسى بوى، وه‌لى وه‌ل ئه‌وه‌یشا ئاده‌میزادیگ فامیده‌و دینپه‌روه‌ریش بویه‌، هه‌ر له‌وه‌ر ئه‌وه‌یش فره‌ كه‌س حه‌ز كردیان ئه‌را ته‌نیا جاریگیش ئه‌گه‌ر له‌خه‌ویش بویاتاگ بویننه‌ى چه‌و.

ماناى ئه‌وه‌سه‌ ئه‌و سه‌ركرده‌ى هه‌میشه‌ زنگه‌ شایسته‌ى ئه‌وه‌سه‌ هه‌میشه‌ ناوى له‌بان زووانمان بووگ و شانازى وه‌پیه‌وه‌ بكه‌یم، چوینكه‌ له‌ ژیانیشى هه‌ر وتگه‌: من خزمه‌تكار گشت كوردیگم و هویچ وه‌ختى نه‌وتگه‌ من سه‌ركرده‌م. وه‌لى جى داخه‌ بارزانى نه‌مر دویر له‌وڵات و نیشتمان خوه‌ى ماڵئاوایى له‌ ملله‌ته‌گه‌ى و هاوخه‌باته‌یلى كرد، له‌وه‌ختیگ ك خود خوه‌ى له‌ سه‌ره‌مه‌رگ فه‌رمایش كردویگ و وتویگ :"ناڕه‌حه‌ت نیم ئه‌را مردن، وه‌لى له‌وه‌ ناڕه‌حه‌تم چوینكه‌ ئاره‌زووم ئه‌وه‌ بوى له‌بن كوچگیگ كوردستانه‌گه‌م ماڵئاوایى له‌ملله‌ته‌گه‌ى خوه‌م بكردام"، ك یه‌یش زیاتر هیلیگه‌مان هه‌میشه‌ یادى بكه‌یم و ناوى له‌دڵ نه‌سڕیمنه‌وه‌.

مه‌لا مسته‌فاى سه‌ركرده‌و نه‌مر، هویچ وه‌ختى جیاوازى نه‌كرد له‌ناونى كوردیگ له‌ بادینان و كوردیگ له‌كازاخستان و كوردیگ فه‌یلى و كوردیگ  له‌قامشلى و یه‌كیگ له‌دیاربه‌كر و ئه‌واكه‌ى تر له‌ سابڵاغ و ناوچه‌یل تر، هه‌میشه‌ وه‌یه‌ك چه‌و ته‌ماشاى گشت كوردیگ كردیاگ، وه‌رده‌وام هه‌واڵپرس گشت چین و ئه‌شره‌تیگ  بوى و له‌گشت چین و تایفه‌یگیش مه‌ردمانیگ پشتگیر و هاوخه‌باتى بوین، دووس راسكانى كورد بوى و له‌ناو دڵ گشت كوردیگ بنه‌وباره‌گا داشت.

وه‌ختیگیش ناچار بوى و دوشمن ته‌نگ وه‌پى هه‌ڵچنى و له‌ئاو ئاراس په‌ڕیه‌وه‌ ته‌نانه‌ت له‌و حاڵه‌تیشه‌ گه‌وراترین داستان توومار كرد و زیاتر خوه‌ى چه‌سپان له‌دڵ گشت كوردیگ ، ك ئه‌ویش ئه‌وه‌ بوى خود خوه‌ى وه‌ كزیگه‌وه‌ له‌شوون سه‌ده‌ها پیشمه‌رگه‌ى دێرین و دڵسووز ئاخرین كه‌سیگ بوى چه‌م ئاراس بڕى و بان گرته‌وه‌ر وه‌ره‌و یه‌كێتى سۆڤێت جاران، له‌وه‌ختى چه‌م ئاراسیش شه‌رمه‌زار بوى له‌ئاست بارزانى نه‌مر له‌و وه‌خته‌ ك پایه‌یلى خسته‌ ناو ئه‌و ئاوه‌و تائیسه‌یش داستان ئاراس له‌لاى كورد تاریخ زنگیگه‌و شووڕشیگ تره‌ له‌خه‌بات بى وچانى، هه‌ر له‌وه‌ر ئه‌وه‌یش ئوشیم: خوه‌زگ ئاو ئاراس وه‌گشت شارو شاروچكه‌یل كوردستانا گوزه‌ر بكرداگ تا جویر ته‌وه‌ڕك له‌لى باوردایم و بخواردایم، چوینكه‌ پاى مه‌لا مسته‌فاى بازانى چیه‌سه‌ تى.

 

جه‌ماڵ ئه‌ركه‌وازی