پا نا‌يمنه‌ قوناغيگ تر

شفق نيوز

كورد له‌ی به‌ش كوردستانه‌ ك لكياسه‌ عراق عه‌ره‌بييه‌و، خه‌ريكه‌ به‌ر ره‌نج و قوربانيه‌يل ئه‌چنيده‌و. له‌شوون شووڕش و فيداكاری بی وينه‌يگ ئه‌وه‌سه‌ به‌شيگ له‌ ئامانجه‌يلی له‌بان به‌شيگ له‌ خاكه‌گه‌ی هاتنه‌دی له‌ حوكم خوه‌ی وه‌ڕيه‌وبه‌رايه‌تی و ئاوه‌دانی وڵاته‌گه‌ی، وه‌لی ئامانجه‌گه‌ له‌وه‌ گه‌وراتر بوی ك كورد له‌و ويستگه‌ بووسيه‌يد.

هه‌ر له‌وه‌ر ئه‌وه‌يش وه‌ دريژايی قوناغه‌گه‌ ريڕه‌و و ئاراسته‌ی كوردايه‌تی له‌ناو جمشت سياسی كوردی وه‌رده‌وام بوين، رووژ له‌دويای رووژ گامه‌يل ئه‌را ره‌سين وه‌ نك خواسته‌يل كورد گورجتر بوين و له‌ ئامانجه‌ سه‌ره‌كيه‌گه‌ نزيكتر بويمنه‌و.

ئيسه‌يش قوناغيگ تر له‌ ئازادكردن خاك چيمنه‌سه‌ وه‌ره‌و، ئيمه‌ له‌و ده‌رفه‌ت‌ و باره‌ ك دروس بويه‌ كه‌ڵك وه‌رگرتيمنه‌و له‌ پايه‌ی سياسی و سه‌ربازی و تا ڕاده‌يگيش وازبوين قاپيه‌يل جه‌هان له‌ روی كورد سه‌ركه‌فتگيم و ته‌نيا چشتيگ ك مه‌ندگه‌ ئه‌ويش بڕيارداينه‌ له‌ چاره‌نويسمان ئه‌را ئاينده‌.

رووژ په‌نجشه‌ممه‌ی گوزه‌يشت بارزانی ئه‌را ئه‌وه‌ چيه‌ په‌رله‌مان، ك ئی رووژه‌ پا نا‌يمنه‌ قوناغيگ تر، قوناغ گله‌وخواردن ئه‌را رای ملله‌ت، قوناغ وه‌يه‌كه‌وژيان له‌ دياريكردن ئاينده‌ی نه‌ته‌وه‌يگ، قوناغيگ كه‌ڵك وه‌رگرتن له‌ غه‌ڵه‌ته‌يل گوزه‌يشته‌، قوناغيگ ك دی كه‌س وه‌ته‌نيا بريار نايه‌يد، ئه‌وه‌ سه‌رۆك هه‌رێم ك وه‌رپرسيارێتی واقعی و ياسايی وه‌ڕيه‌وبردن ئی بار كورده‌ گرته‌سه‌ مل، ‌خوازيار ئه‌وه‌ بوی وه‌ليا بڕيار بيه‌ن، يه‌يش له‌يوا ئه‌كا گشتمان وه‌رپرسيارێتی قوناغ ئاينده‌ بگريمنه‌ مل، ك ئوميده‌يل گه‌شن و ئاسووه‌يل رووشنن له‌وه‌رده‌ممان، ئمجا ئه‌گه‌ر خودانه‌خواسته گرفتيش هاته‌ ڕيمان، ئه‌وه‌ ئيراده‌يلمان بته‌وتر بوون، چوينكه‌ ملله‌تيگ ها له‌ ‌پشت ئی بڕياره‌يله‌و. ئه‌وه‌كيش ئمڕوو جوور وه‌رپرسيارێتی گه‌ورايگ ئه‌كه‌فيده‌ مل نوێنه‌ره‌يل ملله‌ت "په‌رله‌مانتاره‌يل"ئه‌وه‌سه‌ ك گوزارش راسكانی له‌ رای ملله‌ت داشتوون، چوينكه‌ مێژوو وه‌پيمان ئويشيد هويچ وه‌ختيگ جوور ئيسه‌ ده‌رفه‌ت ئه‌رامان له‌بار نه‌ويه‌و هويچ وه‌ختيگيش مه‌يل سه‌روه‌خوه‌يی وه‌ی ئه‌نازه‌ی ئمڕووه‌ له ده‌روينمان قويله‌و نه‌ويه‌.

ئمجا وه‌ل ئه‌و وه‌رپرسيارێتی مێژووييشه‌ ك سه‌رۆك هه‌رێم په‌يای كرد، وه‌رپرسيارێتی ئه‌وه‌يش ئه‌كه‌فيده‌ بان گشتمان ك وه‌ يه‌كه‌و بڕيار بيه‌يم و هه‌وڵ بيه‌يم وه‌ هه‌ڵويست دروسيگ بكه‌يمنه‌ی سه‌ره‌تای نه‌ريتيگ سياسی ئه‌را نه‌وه‌يل ئاينده‌.

عارف قوربانی

ج . أ