نه‌ریتیگ خراو نه‌ته‌وه‌یى

شفق نيوز

  نه‌ته‌وه‌ى كورد جوور گشت نه‌ته‌وه‌یل تر دونیا تاریخ و كلتوور و سه‌روه‌رى و زووان و ره‌نگ و ره‌گه‌ز و ئایین و هونه‌ر و ئه‌ده‌ب و...هتد خوه‌ى دیرید جیاواز له‌و نه‌ته‌وه‌یله‌ ك ئى تایبه‌تمه‌ندیه‌یله‌ نه‌یرن.

له‌یرا بوود نه‌ته‌وه‌ى كورد جیا بكه‌یم له‌ نه‌ته‌وه‌یل تر و كریه‌ید ك خاوه‌ن ده‌سڵات خوه‌ى بوود له‌وه‌ر ئه‌و جیاوازیه‌یله‌ ك دیریده‌ى. یا وه‌ مانایگ تر تویه‌نیم بویشیم ك جیاوازى نه‌ته‌وه‌یى بووده‌ بنه‌مایگ ئه‌را دامه‌زرانن ده‌وڵه‌ت و ئى بنه‌مایشه‌ جوور چشتیگ گشتى و ئاسایى ته‌ماشا بكریه‌ید.

وه‌لى ئه‌وه‌ك بووده‌ هووكار فیشتر قویله‌وكردن و سه‌ختكردن كیشه‌و گرفته‌یل، ئه‌ویش دروسكردن و په‌یاكردن جیاوازیه‌یله‌ له‌ناونى مه‌ردمان نه‌ته‌وه‌یل، ئه‌را نموونه‌یش نه‌ته‌وه‌ى كورد ك له‌یرا جى خوه‌یه‌و باسه‌ بكه‌یم.

بیگومان ئى گرفته‌ یا ئى جووره‌ خووه‌، ره‌نگدانه‌وه‌ى راسییگ دیرید له‌ناو ملله‌ته‌گه‌مان و له‌ هه‌مان وه‌خت بویه‌سه‌ مایه‌ى په‌یابوین چه‌نه‌ها گرفت له‌ناو گشت پله‌یل جیاواز و گشت دامه‌زریاگه‌یل بویچگ و گه‌وراو له‌ناونى تاكه‌یل، ئنجا دوینید ئى گرفتیشه‌ هه‌ر له‌ناو خیزانه‌و ده‌س وه‌پى ئه‌كاو بڵاوه‌و بویه‌و كاریگه‌رى راسه‌خۆیگ دیرید له‌بان مه‌سه‌له‌ى یه‌كتر قه‌بولنه‌كردن.

وه‌لى یه‌یش له‌وه‌ختیگ روى ئه‌یاد ك ته‌نیا ته‌ماشاى جیاوازیه‌یل ناونیمان بكه‌یم و خاڵه‌یل هاوبه‌شمان له‌ هویره‌و بووه‌یم، هه‌ڵبه‌ته‌ یه‌یش وه‌ته‌نیا هه‌ر له‌ناو ملله‌ت كورد نیه‌، به‌ڵكوو له‌ناو گشت ملله‌ته‌یل دونیا وجوود دیرید.

ئنجا له‌یرا مه‌سه‌له‌ى جیاوازیه‌یل ها له‌وه‌ ك تاچه‌نیگ ئى ملله‌ته‌یله‌ هوشیارى گشتى یا رووشنهویرى له‌ ناو كوومه‌ڵگایه‌یلیان وجوود دیرید ك بووده‌ هووكار مه‌سه‌له‌ى برایه‌تى و قه‌بولكردن یه‌كترى و تا چه‌نیگیش پابه‌ندن وه‌ ژیان هاوبه‌ش ناونیان وه‌و گوزارشه‌ ك گشتیان یه‌ك نه‌ته‌وه‌و یه‌ك زووان و یه‌ك كلتوور و یه‌ك تاریخ و یه‌ك ئاڵاى نه‌ته‌وه‌یى دیرن.

ئى خاڵه‌یل هاوبه‌شه‌ ك باسیان كردیم ئه‌گه‌ر هات و له‌ حاڵه‌تیگ نه‌مینن و كار وه‌پیان نه‌كریه‌ید، ئه‌وه‌ گومان له‌تى نیه‌ ك له‌ى حاڵه‌ته‌ سه‌روه‌خوه‌یى و ئاره‌زوو ده‌وه‌ڵه‌تبوین خوه‌مان وه‌ده‌س نایه‌ریم، چوینكه‌ ئامانجه‌یل خاس و دروس هه‌ر نه‌ته‌وه‌یگ ئه‌وه‌سه‌ ك بایه‌س هه‌وڵ دروسكردن یه‌كڕزى بیه‌ن و دویاخر هویر له‌ ده‌وڵه‌تبوین بكه‌ن، یه‌یش له‌وه‌ختیگ ك ملله‌ت ئیمه‌ هه‌ر له‌ زویه‌و گام ناگه‌ وه‌ى خاتره‌و ئیسه‌یش ریه‌یل فریه‌یگ هه‌ن له‌وه‌رده‌م كورد ئه‌را ئه‌و مه‌رامه‌، وه‌لى خاسترین ڕى كه‌مه‌وكردن جیاوازیه‌یل و زیایكردن و په‌ره‌داینه‌ وه‌ هاوبه‌شیكردن. ئنجا له‌یرا مه‌راممان له‌ جیاوازیه‌یل هویر و ڕاى جیاواز نیه‌، به‌ڵكوو له‌بان متمانه‌داینه‌ وه‌ حزب و لایه‌نه‌یل و كه‌سه‌یل سیاسى.

عومه‌ر خالد

ج . أ