كاره‌ سه‌خته‌گه‌ لاوردن مالكیه‌

شفق نيوز

یه‌یش ئه‌و قسه‌ى ئه‌سه‌ده‌ ئه‌خاده‌ هویرمان ك چه‌ن هه‌فته‌یگ وه‌رجه‌ ده‌س وه‌پیكردن شوڕشه‌گه‌ى سوریا له‌ دیمانه‌یگ وه‌ل رووژنامه‌ى" ۆڵ ستریت" كرده‌ى.

 

له‌و دیمانه‌ ئه‌سه‌د وت: ئیمه‌ له‌ وه‌هار عه‌ره‌بى رخمان ناچێ، چوینكه‌ ئیمه‌ به‌ره‌ یا جه‌بهه‌ى رێگریم له‌ وه‌رانوه‌ر ئسرائیل دوشمنى.

 

ئه‌وه‌ بوى نه‌ عراق ده‌سكرده‌ وه‌هار عه‌ره‌بى و نه‌یش به‌شار ئه‌سه‌د نواى ئسرائیل گرت، هویچ گرنگیش نییه‌ هه‌ركام له‌ى ئه‌ڕاى چوینه‌یله‌ راس بوون، چوینكه‌ پرسیاره‌گه‌ له‌یره‌ ئه‌وه‌سه‌: مه‌ردم له‌وره‌ چه‌ ئویشن؟

 

ته‌نیا خه‌م مالكى ئه‌وه‌سه‌ بمینێده‌و له‌ ده‌سڵات، وه‌لى ئه‌را ئى كاره‌ رویوه‌ڕوى كێشه‌یل فره‌یگ ئه‌یه‌ێد، یه‌كه‌میان ئه‌یه‌ سه‌رۆكایه‌تى دویه‌مه‌و كووتاییه‌، له‌هه‌مان وه‌خت هه‌وڵ ئه‌وه‌یش دا ده‌سكارى ده‌ستوور بكا ئه‌را ئه‌وه‌ك جار سێیه‌م خوه‌ى هه‌ڵوژنێد، وه‌لى سه‌ركه‌فتگ نه‌وى و شایه‌د ئى سه‌رۆكایه‌تییشه‌ ئه‌ڕاى ته‌واو نه‌كریه‌ێد، هه‌ر له‌وه‌ر ئه‌وه‌یش ئیسه‌ گه‌ردێده‌ شوون چاره‌سه‌ر تر  جوور لاوردن په‌رله‌مان و هه‌ڵوژاردنیگ وه‌رجه‌ واده‌ى خوه‌ى ئه‌نجام بدریه‌ێد.

 

ئمجا شایه‌د له‌ى رووژه‌یل نزیكه‌ سه‌ره‌تاى یه‌كه‌مین جه‌نگ بوود، ئه‌ویش دویاى ئه‌وه‌ك مالكى سه‌ركه‌فتگ نه‌وى له‌ وه‌ده‌سهاوردن ده‌نگ ته‌واو له‌ هه‌ڵوژاردنه‌گه‌ى وه‌رین ك له‌ناو هوپه‌یمانى هه‌ڵوژریاو حزبه‌یل شیعه‌و كورده‌یلیش ده‌نگ وه‌پى دان. ئمجا ئیسه‌ نه‌خشه‌ى هاوپه‌یمانه‌یلى ئاڵشت بویه‌و ئیسه‌ مالكى ئاماده‌س وه‌ل نه‌یاره‌یلیشى هاوپه‌یمانى دروس بكا چ سه‌درى بوود یا عه‌ره‌به‌یل سوننى، ك ئه‌وانیش له‌ماوه‌ى چه‌ن رووژ گوزه‌یشته‌ به‌ره‌یگ دژ وه‌ مالكى دروس كردنه‌و خوه‌ینیشانداین كه‌ن و له‌ دژ مالكى به‌یاننامه‌ بڵاوه‌و كه‌ن وه‌ خاتر ئه‌وه‌ك مالكى دژایه‌تى وه‌ل یه‌كیگ تر له‌ سه‌ركرده‌یل سوننى دروس كردگه‌ ك ئه‌ویش رافع عیساوى وه‌زیر داراییه‌. بیجگه‌ ئه‌وه‌یش وه‌ل كورده‌یلیش رویوه‌ڕوى بوینه‌وه‌ دروس كرد له‌ باكوور عراق له‌وه‌ر هووكاریگ ك شایه‌ت په‌یوه‌ندى داشتوود وه‌ خواست ئیران ئه‌را وازكردن ڕێیگ ئه‌را سوریا له‌وه‌ر قورتاركردن رژیمه‌گه‌ى به‌شار ئه‌سه‌د.

 

خه‌م سه‌ره‌كى مالكى ده‌سڵاته‌، ئه‌را ئى كاریشه‌ چه‌ن سه‌ركرده‌یگ شیعه‌ دویره‌و خست جوور ئبراهیم جه‌عفه‌رى وه‌رجه‌ خوه‌ى و ڕێ له‌ عادل عه‌بدولمه‌هدى گرد و ئیسه‌یش لكیاسه‌ ئیران و ئاماده‌س گشت چشتیگ بكا ته‌نیا له‌وه‌ر ئه‌وه‌ك له‌ پۆسته‌گه‌ى خوه‌ى بمینێده‌و. ئه‌و پۆستیشه‌ ك مالكى دیرێده‌ى شایه‌د له‌ جه‌هان بێ وینه‌ بوود، له‌وه‌ر ئه‌وه‌ك ده‌سه‌ڵاتیگ راسه‌خۆ دیرید له‌بان وه‌زاره‌ته‌یل گرنگیگ جوور ئاسایش و هه‌واڵگرى و هێزه‌یل چه‌كدار و دارایى و بانك ناوه‌ندى و ره‌سانن و دادوه‌رى و ریشه‌كیشكردن به‌عس و هه‌وڵ ئه‌وه‌یش ئه‌یاد ده‌س بگرێده‌ بان ئه‌و به‌ره‌ ك وه‌رپرسه‌ له‌ نه‌هیشتن گه‌ناته‌كارى و هه‌ر وه‌رده‌وامیش خشته‌ى ئه‌و كاره‌یلیشه‌ دریژتره‌و بوود.

 

وه‌ختیگیش ك جێگر مالكى له‌ دیمانه‌یگ وه‌ل(CNN)وت ك مالكى دیكتاتۆره‌، ده‌سوه‌جى له‌ پۆسته‌گه‌ى ده‌ریكرد، وه‌ختیگیش ناكووكى له‌ناونى خوه‌ى و هاشمى دروس بوى تومه‌ت تیرۆر ئه‌ڕاى هه‌ڵواسى و پاسه‌وانه‌یلى ده‌سگیر كرد.

 

لاوردن مالكى ئاسان نییه‌ له‌بان پۆسته‌گه‌ى چ له‌ڕێ ده‌ستوور و له‌ڕێ په‌رله‌مانه‌و چ له‌ڕێ مانگرتن و خوه‌ینیشانداین. ئیمه‌ ئیسه‌ هایمنه‌ بان ڕێ دویرو دریژیگ و لاوردنى ئاسان نییه‌ ئه‌را عراقیه‌یل، ك یه‌یش عراق ئه‌یه‌رێده‌و ئه‌را خاڵ سه‌ره‌تاو ئه‌را وه‌خت سه‌دام دیكتاتۆر ك وه‌ بوونه‌یه‌و ولایه‌ته‌یل یه‌كگرتگ ئه‌مریكا ناچار بوى نزیكه‌ى یه‌ك تریلیۆن دۆلار و چوار هه‌زار كوشیاگ بیاد ئه‌را له‌ناوبردن خوه‌ى و داروده‌سه‌گه‌ى، ئمجا مالكییش لاوریه‌ێد، وه‌لى دویاى ئه‌وه‌ك وڵات كاول ئه‌كا جوور ئیسه‌ى ئه‌سه‌د.

 

عه‌بدولڕه‌حمان راشد

ج . أ