هووز باوه‌ له‌ بنار به‌مۆ

شفق نيوز

ئاوایه‌یل(دووتۆى و شه‌ردێنه‌)ئاوه‌دانه‌و كردنه‌، ماوه‌یگ  له‌و دو ئاوایه‌ ژیانه‌، وه‌ختیگیش شماره‌ى خیزانه‌یلیان زیاى كردگه‌و له‌وه‌ر ئه‌وه‌ك مه‌ردمانیگ  هه‌ڵكه‌فتگ  و ده‌سڕه‌نگین بوینه‌و شاره‌زایى فره‌یگ  له‌ دروسكردن ده‌سهاڕ داشتنه‌ ك له‌و سه‌رده‌مه‌ ئه‌همیه‌ت فره‌یگ  داشتگه‌ ئه‌را هه‌ڕین گه‌نم و جویه‌، هه‌ر له‌وه‌ر ئه‌وه‌یش له‌لایه‌ن (حه‌بیبوڵاخان قوبادى)ه‌وه‌ ك گه‌وراو ده‌سڵاتدار بویه‌، ناوچه‌یگ  كشتوكاڵى وه‌ناو (ناراو ، بێڵه‌تاو) وه‌پیان به‌خشیاگه‌و له‌و شوونه‌ ئاوایى دروسكردنه‌، ئمجا به‌شیگیانیش له‌ ناوچه‌ى سه‌لاسى و باوه‌جانى نیشته‌جى بوین.

ئى هووزه‌ هه‌رچه‌نى زمسان له‌ ئاوایه‌یل خوه‌یان نه‌چینه‌سه‌ شوونیگ تر، وه‌لى ئه‌را وه‌سه‌ربردن وه‌رز تاوسان و دابینكردن له‌وه‌ڕگا ئه‌را په‌س و پووڵه‌یان، به‌شیگیان روى كردنه‌سه‌ كویه‌ى شاهۆ و ناوچه‌یل سه‌ریاس و ده‌وروه‌ر پاوه‌و به‌شیگیانیش رویكردنه‌سه‌(ته‌په‌ڕه‌ش زه‌هاو ، باخ سه‌یخان ، مله‌ى سه‌رته‌ك ، خه‌ركنێ ، چواركڵاو). دیاره‌ ئه‌و ناوچه‌یلیشه‌ له‌و سه‌رده‌م كووچ و كووچكردنه‌ بڕیگ له‌لیان له‌چوارچیوه‌ى فه‌رمانڕه‌وایى عوسمانى و بڕیگیش له‌لیان له‌چوارچیوه‌ى فه‌رمانڕوایى ئیرانى بوینه‌.  ئمجا ئه‌و بڕه‌ له‌لیان ك هه‌وارگه‌یل تاوسانه‌یان له‌ مه‌رز ده‌سڵات عوسمانیه‌یل بویه‌، له‌ناوچه‌ى بنار به‌مۆ ئى ئاوایه‌یله‌ دروسكردنه‌ جویر(به‌له‌سۆ، چوارداران ژویه‌ر، چوارداران خوار، كانى وه‌یسكێ، كانى پاشا، تووه‌ وشكێ، به‌ڕوێن). دویاى ئه‌وه‌یش چه‌ن خیزانیگیان روى كردنه‌سه‌ (عازه‌بان و جه‌لیله‌ و گێڵده‌ره‌). ئه‌وانه‌ك له‌ ئاوایى عازه‌بان نیشته‌جى بوین وه‌پیان ئویشن (وارانى)، ئه‌وانه‌یش له‌ جه‌لیله‌ نیشته‌جى بوین وه‌پیان ئویشن(جه‌لیله‌ى باوه‌). وه‌ل ئه‌وه‌یشا چه‌ن خیزانیگ  له‌لیان له‌ (ده‌ربه‌ند ده‌هۆڵ )ژیه‌ن له‌نزیك (قه‌سر شرین) و ئویشنه‌پیان بنه‌ماڵه‌ى (عه‌بدوڵڵا خدر دووتۆیى). هووز باوه‌ له‌چه‌ن بنه‌ماڵه‌یگ  پیك تیه‌ن جویر بنه‌ماڵه‌ى(قازى، بابایى، ئه‌ڵماسى، جه‌مشیرى، باوه‌لێ، داودى، قویخا فه‌تاح، نه‌ویجانى ، وارانى ، قادرى و

جه‌لیله‌ى باوه‌). ئى هووزه‌ قه‌یریگ  ئوساى خاس و ده‌سڕه‌نگین داشتنه‌ له‌ مه‌یدان دروسكردن ئاسیاو و ده‌سهاڕ و چشته‌یل تر، له‌ هه‌مان وه‌خت گرنگى یا ئه‌همیه‌ت فره‌یگیش  دانه‌سه‌ كار ره‌سین و چنین ده‌سى وشاره‌زاى خاسیگ  داشتنه‌ له‌ دروسكردن قالى كوردى .

هووز باوه‌ هه‌میشه‌ وه‌ل كیشه‌ى ره‌واى ملله‌ته‌گه‌مانا بوینه‌و له‌ شووڕش تازه‌ى ملله‌ته‌گه‌مانیش ده‌ور كاریگه‌ر داشتنه‌و هه‌میشه‌ ناوچه‌گه‌یان شوون وچانداین پێشمه‌رگه‌ بویه‌و یه‌یش ئه‌همیه‌ت فره‌یگ  ئه‌را شووڕش داشتگه‌ ، له‌وه‌ر ئه‌وه‌ یه‌كم ناوچه‌ بویه‌ كه‌فته‌سه‌ وه‌ر په‌لامار جیوازكردن و مه‌ردمه‌گه‌ى له‌ ئۆردگاى زووره‌ملى (زه‌ڕایه‌ن) نیشته‌جى كریان. هووز باوه‌ زیاتر (2500) خیزانن و له‌بان كشتوكاڵ یا زراعه‌ت و حه‌یواندارى ژیه‌ن، ناوچه‌گه‌یانیش وه‌شیوه‌یگ  گشتى جه‌وه‌ڵیه‌، له‌ زمسان سه‌رده‌و له‌تاوسانیش كه‌ش و هه‌واى هوونك وخاسیگ دیریگ.