گوزارشیگ له‌ نه‌ته‌وه‌

شفق نيوز

 

قسه‌و باسكردن له‌ نه‌ته‌وه‌و هه‌وه‌جه‌یل نه‌ته‌وه‌بوین له‌ دونیاى ئه‌مڕوو ، باسێگ وه‌رفراوانه‌و ناسیارى نه‌ته‌وه‌یل جووراوجووریش جوور زانستیگ سه‌روه‌خوه‌ى ته‌ماشا كریه‌ێد، ك هه‌رچه‌نى تایبه‌تمه‌ندیه‌یلیگ جوور زووان، فكر ، مێژوو ، كلتوور، مه‌رز دیاریكریاگ جوگرافى و ئه‌ده‌بیات ك هه‌ر یه‌كیگ له‌لیان نه‌خش گرنگ دیرێد له‌ وجوود هه‌ر نه‌ته‌وه‌یگ ، وه‌لى وه‌و حاڵیشه‌و په‌یوه‌ندى فكرى و فه‌رهه‌نگى ناونى نه‌ته‌وه‌یل چشتیگ حاشا هه‌ڵنه‌گره‌.

له‌جه‌هان پێشكه‌فتنخواز ئاده‌میزاد ئى چه‌رخه‌، ئه‌گه‌ر هه‌ر نه‌ته‌وه‌یگ خوه‌ى وه‌ بنه‌ماى هویر تازه‌یگه‌و ده‌رنه‌خا، ئه‌وه‌ بیگومان له‌ى ره‌وت جه‌هانیه‌ مینێده‌ جى، چوینكه‌ هویر ئاده‌میزاد مه‌سه‌له‌یگه‌ له‌ وه‌ره‌و نوابردن و كوومه‌ڵگایش وه‌بێ وه‌رگرتن هویروڕاى یه‌كترى هویچ ئومید و ئاره‌زوویگى نیایده‌ دى، شایه‌د ئیسه‌یش هووكار دویاكه‌فتگى مه‌ردم وڵاته‌یل دویاكه‌فتگ فیشتر ریشه‌ى له‌وه‌ بوود ك كه‌متر دانیشتن و گفتگوو دیرن وه‌ل یه‌كترى.

نه‌ته‌وه‌ى كورد وه‌ بوونه‌ى گوزه‌یشته‌ى ناله‌بار سیاسیه‌و له‌ وڵاته‌یلیگ ژیه‌ید ك هه‌ر یه‌ك له‌ى وڵاته‌یله‌ له‌ دید جوگرافى سیاسیه‌و تاریف تایبه‌ت وه‌ خوه‌یان دیرن. كوردیش بیجگه‌ هه‌وڵ فه‌رهه‌نگى ئه‌را چه‌سپانن خوه‌ى، مقه‌یه‌تى له‌ په‌یوه‌ندى فه‌رهه‌نگییش كردگه‌ وه‌تایبه‌ت وه‌ل ئه‌و وڵاته‌یله‌.

بیگومان مه‌سه‌له‌ى نه‌ته‌وایه‌تى جووریگه‌ له‌ تایبه‌تمه‌ندى راسكانى و چاره‌نویسیگ گریه‌دریاگ وه‌ ژیان ئاده‌میزادو به‌ڵكوو په‌یوه‌سه‌ وه‌ ئاست ره‌سینه‌وه‌ى ئه‌و ئاده‌میزاده‌ له‌ى مه‌سه‌له‌ى نه‌ته‌وایه‌تیه‌، ك یه‌یش په‌یوه‌سه‌ وه‌ فكر و متمانه‌و دڵسووزى ئه‌را لایه‌ن نه‌ته‌وایه‌تى له‌ كوومه‌ڵگا، یه‌یش ماناى ئه‌وه‌سه‌ ك نه‌ته‌وه‌ بنه‌مایگ فكریه‌و په‌یوه‌سه‌ وه‌ لایه‌ن سووزدارى و خوه‌شه‌ویسى هه‌ر تاكیگ له‌و نه‌ته‌وه‌.

گوزراش و نه‌زه‌ریه‌یل فره‌یگ هه‌س ئه‌را ماناى نه‌ته‌وه‌، له‌وانه‌یش: نه‌ته‌وه‌ له‌بان بنه‌ماى یه‌كگرتگى زووان جوور ئه‌وه‌ك فكرمه‌نه‌یل ئه‌ڵمانى تاریفى كردنه‌و یه‌كه‌مین كه‌سیگ بوینه‌ ئاماژه‌ وه‌پى كردنه‌، چوینكه‌ یه‌كگرتگى زووان نه‌خش بنه‌ڕه‌تییگ دیرید له‌ پیشكه‌فتن نه‌ته‌وه‌، وه‌ل ئه‌وه‌یشا نه‌زه‌ریه‌یل تر هه‌س باس له‌وه‌ كه‌ن ك بنه‌ڕه‌ت دروسبوین نه‌ته‌وه‌ چووده‌و ئه‌را مه‌یل و لایه‌نگرى ملله‌ت له‌ ژیان هاوبه‌ش شان وه‌ شان كلتوور و مێژوو، وه‌لى نه‌ته‌وه‌ له‌بان بنه‌ماى یه‌كێتى ژیان ئابوورى مه‌سه‌له‌یگ تره‌و به‌رژه‌وه‌ندى ئابوورى له‌تى بنه‌ڕه‌تیگ بته‌و ئه‌را هس نه‌ته‌وه‌یى.

هه‌ردى حه‌بیب

ج . أ