يه‌كمين سه‌ياره ‌و شه‌مه‌نده‌فه‌ر و فيته‌ر له ‌عراق

شفق نيوز

يه‌كيگ له‌و رويداگه‌يل مه‌يلكيشه‌ ، په‌يابوين يه‌كم سه‌ياره‌ بوی له‌ به‌غدا له‌ساڵ (١٩٠٨) و له‌شوون ئه‌وه‌يش له‌ ساڵ (١٩٢٠) په‌ياپوين يه‌كم ميكانيكی يا فيته‌ر سه‌ياره‌ له‌ شار به‌غدا ، وه‌ل ئه‌وه‌يشا هاتن يه‌كم (شه‌مه‌نده‌فه‌ر) له‌ساڵ (١٩١٥) ك له‌ناونی به‌غداو سامه‌ڕا كه‌فته‌ كار .تاريخنويسه‌يل ئويشن : يه‌كم سه‌ياره‌ له‌ ساڵ (١٩٠٨) ك هاته‌ به‌غداوه‌ ، خاوه‌نه‌گه‌ی (حه‌مدی پاشای بابان) بوی و له‌و وه‌خته‌ حه‌مدی پاشا ئه‌ندام ئه‌نجوومه‌ن شاره‌وانی (عضومجلس البلدی) به‌غدا بوی ، ئمجا چشت ئه‌ڵڵاجه‌ويگ بوی له‌لای مه‌ردم ك ئه‌و سه‌ياره‌ وه‌بی ئه‌وه‌ك وڵاخ بكيشيگه‌ی و ڕی كردياگ .تاريخنويسه‌يل باس ئه‌وه‌يش كه‌ن يه‌كه‌مين شه‌مه‌نده‌فه‌ر ك له‌ساڵ (١٩١٥) كه‌فته‌ كار له‌بان خه‌ت ئاسن ناونی سامه‌ڕاو به‌غدا كار كردياگ و له‌شوون ئه‌وه‌ له‌ساڵ (١٩١٨) حوكمڕانی بريتانی له‌ عراق بڕيار يا قه‌رار ئه‌وه‌ دان ئه‌و شه‌مه‌نده‌فه‌ره‌ ئه‌را جيوازكردن كاڵای هاووڵاتيه‌يل باريه‌يگه‌ كارله‌ناونی به‌غداو فه‌لووجه‌ ، دويای ئه‌وه‌يش وه‌ڕيه‌وبه‌رايه‌تی خه‌ت شه‌مه‌نده‌فه‌ر عراق بڕيار فراوانكردن خه‌ت شه‌مه‌نده‌فه‌ره‌گه‌ دا ئه‌را هه‌ڵگرتن گشت جووره‌ بارهه‌ڵگريگ له‌ناونی كووت و به‌غداو خانه‌قی و حله‌ .له‌ ساڵ (١٩٢٠) هه‌واڵێگ ئه‌را خاسكردن سه‌ياره‌ له‌ناو شار به‌غدا په‌خشه‌و كريا له‌ شوونيگ ك كه‌فيگه‌ ناوچه‌ی (حه‌بيب) له‌بازاڕ مه‌زادخانه‌ی (مه‌يدان) له‌لايه‌ن هاووڵاتييگه‌وه‌ وه‌ناو (ئوسا ماهر) ك شاره‌زايی خاسيگ داشت له‌مه‌يدان خاسكردن سه‌ياره‌و ناوبانگ وه‌ ئوسا يا فيته‌ر سه‌ياره‌ ده‌ركرد .له‌لايگ تره‌وه‌ له‌ساڵ (١٩١٩) كاروه‌ده‌سه‌يل فه‌رمانڕه‌وا بڕيار يا قه‌رار ئه‌وه‌ دان خاوه‌ن به‌له‌مه‌يل ناو ئاو دجله‌ بايه‌سه‌ مووڵه‌ت يا ئجازه‌ی وه‌كارهاوردن به‌له‌م داشتوون و شماره‌ی ره‌سمی ئه‌را به‌له‌مه‌يليان له‌ دوياو نواوه‌ بكوتن ، وه‌ل ئه‌وه‌يشا بايه‌س بوی عومر شوفێر يا سايه‌ق به‌له‌مه‌گه‌ له‌ (١٦) ساڵ كه‌متر نه‌وگ و شه‌وانه‌يش گڵۆبيگ له‌ناو به‌له‌مه‌گه‌يان رووشنا بكه‌ن .وه‌ی جووره‌ تاريخ يه‌كه‌مين سه‌ياره‌و شه‌مه‌نده‌فه‌ر و فيته‌ر له‌ عراق ئه‌رامان ئاشكرا بوی وه‌گووره‌ی لاپه‌ڕه‌يل ماوه‌ی سه‌ده‌ی (٢٠) گوزه‌يشت .