ئیمه‌ى كورد گه‌ردیمنه‌ شوون تاریخ و پشت له‌كلتوور كه‌یم!!

شفق نيوز

و باپیره‌یلمان كردیمنه‌سه‌ قوربان ئه‌و پیشكه‌فتنه‌ ك ئیسه‌ باس له‌ كریه‌یگ  و جایه‌ڵ جوانه‌یلمان وه‌پیه‌وه‌ خه‌ریكن وه‌بى ئه‌وه‌ك له‌بان بنه‌مایگ كلتوورى و  فه‌رهه‌نگى په‌یمانه‌ى بكه‌ن. جى داخه‌ ئمڕوو وه‌ناو پیشكه‌فتنه‌وه‌ جوانترین و ڕه‌سه‌نترین سه‌رمایه‌ له‌ده‌س دریاگه‌، ك ئه‌ویش داب ونه‌ریت و كلتوور پاك وبیگه‌ردیگه‌ ك گشت بیگانه‌یگ ئاره‌زوومه‌ندیه‌!!

بیگومان هه‌ر ملله‌تیگ یا هه‌ر نه‌ته‌وه‌یگ بگر له‌ى دونیا شوونه‌واریگ له‌جه‌هان كلتوورى دیریگ ، داب ونه‌ریتیش یه‌كیگه‌ له‌و كلتوور و تاریخه‌ ك گشت ملله‌تیگ شانازى وه‌پیه‌وه‌ ئه‌كا. وه‌لى له‌یوا دیاره‌ كورد جویر ئه‌وه‌ك پیشینه‌یل ئویشنه‌ى(سویر دوینیگ سه‌ما له‌هویریه‌و چووگ). ئیمه‌ وه‌ناو كورد هه‌وه‌جه‌ وه‌تاریخیگ  دیریم گشت مه‌یدانه‌یل ژیانمان بگریگه‌وه‌و له‌لى نه‌فه‌وتنیم. نوڕید بڕیگ له‌هه‌وڵ و ته‌قلاى رووشنهویره‌یل كورد ئه‌وه‌سه‌ تاریخیگ پڕه‌و بكه‌ن و كه‌لى له‌تى نه‌یلن، وه‌لى له‌لایگ تره‌وه‌ نوڕید كه‌سه‌یلیگیش تاریخ شیونن و له‌سه‌نگ و نه‌ریت كورده‌وارى كه‌مه‌و كه‌ن ك یه‌یش به‌شیگه‌ له‌تاریخ ره‌سه‌نایه‌تى ملله‌ت. فره‌جار ئیمه‌ ژنه‌فیم ك په‌یكه‌ریگ یا سكه‌یگ كوردى یا شوونه‌واریگ دوینریاسه‌وه‌و ئسپات تاریخ كورد ئه‌كا، یا نویساننیگ كویه‌ن ك گوزارش له‌ملله‌ت كورد ئه‌كاو گشت میدیاو رووژنامه‌یل كوردى خه‌نه‌ى وه‌رباس و له‌یه‌كه‌وداین و لاپه‌ڕه‌یل رووژنامه‌ وه‌و باس و به‌ڵگه‌ى تاریخیه‌ پڕه‌و كه‌ن، وه‌لى له‌لایگیشه‌وه‌ خود كورد دوینید وه‌ئاشكرا له‌داب ونه‌ریت خوه‌ى لاداگه‌و هویر له‌وه‌ نیه‌كه‌ن ئى داب ونه‌ریته‌ مه‌ندنه‌وه‌ى راسه‌قینه‌ى كورده‌ وه‌ زنگى و له‌هه‌مان وه‌خت تاریخ كویه‌ن و وه‌رده‌وامیگه‌ له‌رووژگار كویه‌ن و ئیسه‌و ئاینده‌مانیش!! یا وه‌ختى دوینیم كه‌سیگ بیگانه‌ باس له‌تاریخ كورد ئه‌كا چه‌نیگ خوه‌شحاڵیم وه‌پى، وه‌لى نوڕید وه‌گووره‌ى ئه‌و ره‌فتار و هه‌ڵسووكه‌فته‌ ك ئیسه‌ هاته‌سه‌ وجوود وه‌ناو دونیاى مۆدیرن و پیشكه‌فتگ حاشا له‌و تاریخه‌ كریاگه‌و مه‌سه‌له‌ى دابو نه‌ریت بویه‌سه‌ چشتیگ قیزدار له‌زوورم ئه‌ندامه‌یل كومه‌ڵگاو هویچ رینمایى و ئامووژگارى خاسیگیش له‌ى لایه‌نه‌وه‌ نیه‌كه‌فیگه‌ وه‌رچه‌و تا وه‌لاى كه‌مه‌وه‌ كاریگه‌رى داشتووگ له‌بان ئه‌وانه‌ك كلتوور ملله‌ته‌گه‌یان شیواننه‌.

ئیمه‌ى كورد ئمڕوو گه‌ردیمنه‌ شوون تاریخ و پشت له‌كلتوور كردیمه‌، ئیمه‌ هه‌رچى بپووشیم و ڕه‌فتارمان هه‌رچى بوود، هه‌ر كوردیم و  بیگانه‌یل وه‌كورد ناسنه‌مان، ئه‌ى دى له‌وه‌رچه‌ تاریخ خوه‌مان وه‌و كلتوور ده‌وڵه‌مه‌نه‌ ك له‌باوگ وباپیره‌یلمان ئه‌ڕامان مه‌نده‌سه‌جى نیشان نه‌یه‌یم و پشت له‌ڕه‌سه‌نایه‌تى خوه‌مان بكه‌یم! ئمڕوو ئه‌وانه‌ك له‌ڕوى بى هوشیاریه‌وه‌ كلتوور ملله‌ت خوه‌یان فڕه‌دانه‌و جووریگ تر خوه‌یان نیشانده‌ن، دیاره‌ نیه‌زانن ك یه‌یش خزمه‌تیگه‌ وه‌بیگانه‌و دژ وه‌تاریخ كورده‌، چوینكه‌ هه‌ر ملله‌تیگ پابه‌ند نه‌وگ وه‌ شوونه‌وار كوینیگه‌وه‌و بیبه‌ش بوى له‌لى ماناى ئه‌وه‌سه‌ له‌ناو تاریخ هویچ پله‌و پایه‌یگ نه‌یریگ .

كلتوور و هونه‌ر ئیمه‌ى كورد له‌كلتوور و هونه‌ر هویچ ملله‌تیگ تر كه‌متر نیه‌، ئیمه‌یش جویر ملله‌ته‌یل تر دونیا تاریخ و داب ونه‌ریت ره‌سه‌نیگ دیریم، وه‌لى حه‌یفه‌ پشت له‌لى بكه‌یم و بیلیم بیگانه‌یل نه‌ف له‌لى وه‌ربگرن، وه‌تایبه‌ت ئیمه‌ى كورد به‌شبه‌شیم و هه‌ر به‌شیگمان كه‌فتیمنه‌سه‌ ژیر كاریگه‌رى وڵات و مه‌ردمانیگ بیگانه‌. ئه‌وه‌سه‌ له‌جیاى ئه‌وه‌ك كوڕه‌یلمان مقه‌یه‌تى له‌كلتوور بكه‌ن، دوینید وه‌چه‌واشه‌وه‌ هه‌ر یه‌كیگ له‌لیان له‌ده‌یشت وڵات وه‌شیواز و ڕه‌فتاریگه‌وه‌ تیه‌یگه‌وه‌و 180 پله‌ له‌كورده‌وارى خوه‌ى لاداگه‌و كاریگه‌رییش له‌خیزانى كردگه‌، له‌هه‌مان وه‌خت دویه‌ته‌یلمانیش وه‌ناو ئازادیه‌وه‌ جنگ بیگانه‌ له‌وه‌ر كه‌ن و ناو بیگانه‌ نه‌نه‌ قه‌ى مناڵه‌یلیان و چه‌و بڕنه‌ ره‌فتار و هه‌ڵسووكه‌فت بیگانه‌و حاشا كه‌ن له‌چشتیگ ناو كلتوور له‌تى بوودو خوه‌یانیش وه‌ پیشكه‌فتگ و رووشنهویر ده‌نه‌ قه‌ڵه‌م. راسه‌ پیشكه‌فتن و تازه‌گه‌رى خوه‌شه‌، وه‌لى وه‌ل ئه‌وه‌یشا ئیمه‌ى كورد جویر ئه‌وه‌ك گه‌ردیمه‌نه‌ شوون تاریخا بایه‌سه‌ كلتوور راسكانى خوه‌مانیش له‌هویر نه‌وه‌یم.

 

جه‌ماڵ ئه‌ركه‌وازى