دامه‌زرانن فراكسیۆنیگ چاودێرى ئه‌را ئنتقامه‌

شفق نيوز

پاڵ بنه‌یده‌ پیانه‌و ئه‌را دامه‌زرانن فراكسیۆنیگ په‌رله‌مانى چاودێرى له‌ بان كاركردن وه‌زاره‌ته‌گان له‌ قوناغ هاتى، و جیا له‌ كار لوجنه‌یل هه‌میشه‌یى په‌رله‌مانى كار كه‌ید، ك پیكهاتیه‌ له‌ 26 لوجنه‌ ئه‌را چاودێریكردن له‌بان كار وه‌زاره‌ت و داموده‌زگایه‌یل حكوومى، و بنیات ئه‌را پرۆژه‌یگ نیشتمانى دانه‌ید دویر له‌ وه‌كه‌سایه‌تیكردن یا شه‌خصه‌نه‌ى سیاسى؛ وه‌گووره‌ى قسه‌ى چه‌ن ئه‌ندامیگ.

له‌ى باوه‌ته‌ دكتۆره‌ وه‌حده‌ جومه‌یلى نوێنه‌ر لیست عیراقیه‌ له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:"چاودێریكردن ده‌سڵات جیوه‌جیكردن یا ته‌نفیزى له‌ وه‌زاره‌ت و داموده‌زگایه‌یل حكوومى، یه‌كیگه‌ له‌ ئه‌ركه‌یل سه‌ره‌كى ئه‌نجوومه‌ن نوێنه‌ره‌یل، چوینكه‌ لایه‌نیگ چاودێریه‌ زیاتر له‌وه‌گ ده‌سڵاتیگ ته‌شریعى بوود".

جومه‌یلى سه‌رسامى خوه‌ى نیشاندا له‌ دامه‌زرانن "فراكسیۆنیگ په‌رله‌مانى چاودێرى" له‌بان كاركردن وه‌زاره‌ته‌یل و ئه‌وه‌یشه‌ ئاشكراكرد ك :"كار ئه‌نجوومه‌ن نوێنه‌ره‌یل وه‌شیوه‌یگ سه‌ره‌كى چاودێریكردنه‌، ئه‌ى دى مه‌عناى چه‌س ك ئیجووره‌ فراكسیۆنیگ له‌ ئه‌نجوومه‌ن نوێنه‌ره‌یل دامه‌رزیه‌ید؟!". وزیاتریش وت :" دامه‌زرانن ئیجووره‌ فراكسیۆنیگ گوزارش كه‌ید له‌ (حاڵه‌تیگ له‌ تۆڵه‌سه‌نین یا ئنتقام و گه‌نگیركردن یا ئبتزاز) له‌ لایه‌ن ئه‌و كه‌سه‌یله‌ ك توان ئى لوجنه‌ دامه‌زرانن، چوینكه‌ یانه‌ ئه‌وه‌گ له‌به‌رژه‌وه‌ندى خوه‌یان تواستنه‌ى ئه‌رایان نه‌وى". وه‌گووره‌ى قسه‌گان جومه‌یلى.

له‌باوه‌ت كار ئى لوجنه‌ ك جیایه‌ له‌ كار لوجنه‌یل په‌رله‌مانى، جومه‌یلى ئه‌وه‌ ئاشكراكرد :" دامه‌زرانن ئیجووره‌ لوجنه‌یگ كار ناده‌ستوورییگه‌ و وه‌چه‌واشه‌ى په‌یڕه‌وى ناوخۆ یا نیزام داخلى ئه‌نجوومه‌ن نوێنه‌ره‌یله‌". و ئه‌وه‌یشه‌ ڕووشنه‌وكرد ك :" لوجنه‌ى په‌رله‌مانى ئه‌رك و تایبه‌تمه‌ندى خوه‌ى دیرید له‌ وه‌شوونكه‌فتن یا متابعه‌ى وه‌زاره‌تیگ یا ده‌زگایگ حكوومى، و نیه‌ود وه‌چه‌واشه‌ى ئه‌و ئه‌ركه‌ كار بكه‌ید، ئه‌را نموونه‌ نیه‌ود لوجنه‌ى ئاسایشى چاودێرى له‌ وه‌زاره‌ت كشتوكاڵ بكه‌ید".

له‌لاى خوه‌یه‌و عه‌لى شلاه‌ نوێنه‌ر هاوپه‌یمانى نیشتمانى له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:"دامه‌زرانن فراكسیۆنیگ په‌رله‌مانى ك چاودێرى وه‌خوه‌یه‌و به‌ن بكه‌ید كاریگ ناده‌ستووریه‌، چوینكه‌ كار په‌رله‌مان قانوون نویسانن و چاودێریكردنه‌، و وه‌میكانیزمه‌یل فره‌یگه‌وه‌ ئه‌نجام گرید و یه‌كیگیانیش لوجنه‌یل په‌رله‌مانیه‌، و ریكخستن كاره‌یل وه‌ى میكانیزمه‌ چشت نموونه‌ییگه‌، هه‌رچه‌نى ك تاكه‌ ڕیگه‌یش نیه‌".

و ئه‌وه‌یشه‌ ڕووشنه‌وكرد ك:"كار گرنگیگ نیه‌ ك ئۆپۆزیسیۆن سیاسى وجوود داشتوود تا گوزارش له‌ هووڵى ئه‌را به‌رژه‌وه‌ندى ملله‌ت بكه‌ید، وه‌ڕیگه‌ى چاودێریكردن كار حكوومى".

زیاتریش وت:" ئه‌ندامه‌یل ئه‌نجوومه‌ن نوێنه‌ره‌یل له‌ قوناغ هاتى، زیاتر له‌ وسیانیگ وه‌رانوه‌ر  وه‌زیره‌یل و كاروه‌ده‌سه‌یل كه‌مته‌رخه‌م و سس وسیه‌ن، چوینكه‌ ئیمه‌ باس له‌ وژدانیگ نیشتمانى كه‌یمن ك نیه‌تواید واز له‌ ئه‌ركه‌یل خوه‌ى بارید له‌ وه‌په‌نكردن گه‌ناته‌كارى و گه‌ناته‌كاره‌یل".

دكتۆر واسق هاشمى شیه‌وكه‌ر سیاسى له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ ئه‌وه‌ ڕووشنه‌وكرد ك :"دامه‌زرانن فراكسیۆنیگ په‌رله‌مانى چاودێرى له‌بان وه‌زاره‌ته‌یل تویه‌نیمن له‌ قوناغ هاتى سوود له‌لى وه‌ربگریمن ئه‌را ڕه‌سانن زانیارى خاسیگ ئه‌را په‌رله‌مان، چوینكه‌ وه‌زاره‌ته‌یل وداموده‌زگایه‌یل حكوومى گیروگرفته‌یل فره‌یگ دیرن".

له‌باوه‌ت دامه‌زرانن لوجنه‌ى ناوبریاى، ك جیاله‌ له‌ لوجنه‌یل په‌رله‌مانى كار كه‌ید هاشمى ئاماژه‌ وه‌وه‌دا ك :" هویچ ڕیگر قانوونییگ نیه‌ له‌ ڕیگه‌ى دامه‌زراننى، چوینكه‌ دۆسیه‌یل گه‌ناته‌كارى فره‌س و لوجنه‌ى نه‌زاهه‌ له‌هه‌ق گشتى نیه‌تیه‌ید".

ئه‌وه‌یشه‌ وت ك :" داشتن ئیجووره‌ فراكسیۆنیگ په‌رله‌مانى له‌ ژیر گومه‌زى په‌رله‌مان بووده‌ هووكاریگ ده‌سمیه‌تده‌ر و سه‌رچاوه‌یگ گرنگ له‌ ده‌سنیشانكردن و وه‌شوون كه‌فتن ئه‌و له‌قى یا خه‌له‌له‌ ك هاله‌ناو وه‌زاره‌ته‌یل و داموده‌زگایه‌یل حكوومى، چوینكه‌ ئه‌ندامه‌یل ئه‌نجوومه‌ن نوێنه‌ره‌یل گشتیان له‌ناو لوجنه‌یل په‌رله‌مانى نین".

شایان باسه‌ ك شماره‌ى لوجنه‌یل په‌رله‌مانى له‌ى خول حازریه‌ 26 لوجنه‌یه‌، و فراكسیۆنه‌یل سیاسى له‌بان ئه‌وه‌ ڕیككه‌فتن ك سه‌رۆكایه‌تى لوجنه‌گه‌ له‌ ئه‌و فراكسیۆنه‌ نه‌ود ك وه‌زیره‌گه‌ له‌ خوه‌یه‌ و لوجنه‌گه‌یش چاودێرى كار وه‌زاره‌ته‌گه‌ى كه‌ید.